Тыгъуасэ джыри тиреспубликэ осышхо къыщесэу ригъэжьагъ.Гидрометеогупчэм къызэ­ритыгъэмкIэ, шъолъырым пчыкIэ хэтэу ощх-ос зэхэт щыIэщт, жьыбгъэм илъэшыгъэ зы нэ­гъэупIэпIэгъум метрэ 25-м нэсыщт. Псы­хъохэм адэт псым зыкъыIэтын ылъэкIыщт.

Электропсэуалъэхэм яIофшIэн зэпыу фэмыхъуным фэшI ащ фэгъэзагъэхэр гъэлъэшыгъэ шIыкIэм техьагъэх. Джащ фэдэу республикэм имуниципалитетхэм ащыIэ коммунальнэ ыкIи гъогу къулыкъухэм а шIыкIэм тетэу Iоф ашIэ, гъогухэр атхъух. Мыекъопэ районым ыкIи нэмыкIхэми ащыпщагъу.
Тэхъутэмыкъое районым пчэдыжьым къыщыублагъэу шъолъыр ыкIи чIыпIэ гъогухэр техникэ 20-м ехъумэ ащаукъэ­бзых. Анахьэу анаIэ зытырагъэтыхэрэр гупчэ урамхэр, социальнэ мэхьанэ зиIэ псэуалъэмэ — сымэджэщмэ, кIэлэцIыкIу IыгъыпIэмэ, еджапIэмэ, нэмыкIхэм яIу­хьапIэхэр арых. Красногвар­дейскэ, Джэджэ районхэми гъогухэр етIупщыгъэу ащагъэкъабзэх, Адыгэкъалэ, лъэшэу къызэресырэм емылъытыгъэу, коммунальнэ къулыкъухэр щынэгъон­чъэным яшъыпкъэу щыдэлажьэх.

Адыгеим и ЛIышъхьэу КъумпIыл Мурат тыгъоспчыхьэ муниципальнэ псэупIэхэм япащэхэм зэхэсыгъо адыриIагъ, чIыпIэхэм ащыкъэбархэм ядэIугъ.
Шэуджэн районым икъуаджэу Хьакурынэхьаблэ фабэм икъэтын зыщызэпыугъэ чIыпIэ къыщыхъугъ. Район пащэр ащ ышъхьэкIэ лъэплъэ. КъумпIыл Мурат псэолъэшIынымкIэ министерствэм пшъэ­рылъ фишIыгъ мы гумэкIыгъомкIэ Iэпы­Iэгъу афэхъунэу ыкIи уни 8-у фабэ зи­мыIэу къэнагъэхэм ар арагъэгъотыжьынэу.
Осыр непэ джыри уцущтэп. Электрикхэр, коммунальнэ хъызмэтым иIофышIэхэр, гъэIорышIэкIо компаниехэр ошIэ-дэмышIэ Iофыгъохэм ядэгъэзыжьын афэхьазырых.
«Осыр къызыжъукIэ, республикэ шIыхьаф зэхэтщэщт – республикэм ипсэупIэхэр зэкIэ дгъэкъэбзэщтых. Муниципальнэ псэупIэхэм зэкIэми япащэхэм пшъэрылъ афэсшIыгъ зэпыкIыгъэ чъыгхэр, къутамэхэр, нэмыкI хэкIыр игъом Iуащынэу», — къыIуагъ Адыгеим и ЛIы­шъхьэ.
КъумпIыл Мурат къыфэджагъ гъогу­бгъухэм автомобильхэр къаIуамыгъэнэнхэм осыр Iузыхырэ транспортым иIоф­шIэн пэрыохъу фэмыхъунхэм фэшI.
Гъогум сакъыныгъэ къыщызхагъэ­фэнэу гъогурыкIоныр щынэгъончъэ­нымкIэ къулыкъур цIыфхэм къяджэ. ИмыщыкIэгъэ шъыпкъэу гъогум утемы­хьэмэ нахьышIу, лъэшыщэу узекIо хъущтэп, машинэхэм язэпэчыжьагъэкIэ шапхъэхэр агъэцэкIэнхэ фае, кIымэфэ щэрэхъхэр агъэфедэнхэр шIокI зимыI.
АIэ зэкIэдзагъэу ­пэшIуекIуагъэх
Ом изытет къыхэкIэу зыгъэпсэфыгъо мафэхэм республикэр гумэкIыгъошхоу зыхэтыгъэр шъугу къэдгъэкIыжьын. Мые­къуапэ, Мыекъопэ, Кощхьэблэ, Красногвардейскэ, Шэуджэн районхэм осышхо къащесыгъ, псэупIэхэм ащыщыбэм электричествэр ыкIи фабэр ямыIэу чIыпIэ къин итыгъэх.
АР-м и ЛIышъхьэу КъумпIыл Мурат елбэтэу оперативнэ штаб зэхищагъ, ежь ышъхьэкIэ Iофхэм язытет лъыплъагъ.

ЭлектрорыкIуапIэу зэпычыгъэхэм ягъэцэкIэжьынкIэ энергетикхэм Iофы­шхо ашIагъ, нэмыкI шъолъырхэм къары­кIыгъэхэри къадэIэпыIагъэх. Чэщи, мафи зэпыу ямыIэу гъогухэм ягъэкъэбзэн хэу­шъхьафыкIыгъэ техникэ пчъагъэ хагъэлэжьагъ.
Ом къыздихьыгъэ гумэкIыгъор охътэ кIэкIым дэгъэзыжьыгъэным фэшI Мые­къуапэ, Мыекъопэ, Джэджэ, Красногвардейскэ, Шэуджэн ыкIи Кощхьэблэ районхэм ошIэ-дэмышIэ IофхэмкIэ якъулыкъухэр гъэлъэшыгъэ шIыкIэм тырагъэ­хьагъэх.
Мыекъуапэ игъогухэм ателъ осым игъэкъэбзэнкIэ IэпыIэгъу хъугъэх Адыге­им иныбжьыкIэхэр, муниципальнэ псэу­пIэхэм, министерствэхэм ялIыкIохэр, гумэкIылэ цIыфхэр. Осыр макIэу къызщесыгъэхэу Адыгэкъалэ, Теуцожь ыкIи Тэхъутэмыкъое районхэм къарыкIыгъэ купхэр, япащэхэри ахэтхэу, Мыекъуапэ къэкIуагъэх. АР-м и ЛIышъхьэу КъумпIыл Мурати осыр Iузыхыхэрэм ахэтыгъ.
Мэфищым ехъум электричествэр ыкIи фабэр псэупIэхэм ащыщхэм яIагъэхэп. Россетим къызэритыгъэмкIэ, гъэцэ­кIэ­жьын IофшIэнхэм зэкIэмкIи бригадэ 92-рэ (нэбгырэ 529-рэ) ыкIи техникэ 242-рэ ахагъэлэжьагъ.
Социальнэ мэхьанэ зиIэ учреждениехэм пэрыохъу ямыIэу зыпкъ итэу Iоф ашIагъ.
— Осышхоу къесыгъэм ыпкъ ­къикIэу ушэтынэу тызхэтыгъэм нафэ къытфи­шIыгъ тIэ зэкIэдза­гъэу, тызэгъусэу ащ тыпэшIуекIон зэрэтлъэкIыгъэр. Гумэ­кIыгъом идэгъэзыжьын къыхэлэжьагъэ пэпчъ сирэзэныгъэ гущыIэхэр есэIо. Шъугу къэкIи, шъуишIуагъэ къэзэ­рэ­жъугъэкIуагъэр бэхэмкIэ щысэтехыпIэ хъущт, — къащитхыгъ АР-м и ЛIышъхьэ исоциальнэ нэкIубгъохэм.
Щылэ мазэм и 6-м ошIэ-дэмышIэ Iофхэм алъэны­къокIэ гъэлъэшыгъэ шIыкIэр тырахыжьыгъ.
Щылэ мазэр зыфэдэщтыр
ГидрометеорологиемкIэ ыкIи тыкъэзыуцухьэрэ дунаим иуплъэкIункIэ Гупчэм ипащэу Александр Митровым тызэрэщигъэгъозагъэмкIэ, гурытымкIэ мазэм температурэу щыIэщтыр шапхъэхэм анахьыбэщт, ощх ыкIи ос цIынэу къы­хьыщтыр шапхъэхэм тIэкIу къяхъущт. Фабэмрэ чъыIэмрэ чэзыу-чэзыоу къызэкIэлъыкIощтых, пчыкIэр хэтэу ощх къещхыщт. КъызыщыучъыIырэ уахътэм мылыр чъыгхэм ыкIи электрорыкIуапIэхэм апишIыхьащт.
Щылэ мазэм иятIонэрэ мэфипшIым чэщхэр чъыIэщтых градуси 3 — 8-м нэсэу, мафэхэм чъыIэр градус 15-м кIэхьащт.
Ящэнэрэ мэфипшIым икIэухым чэщым чъыIэр градуси 4 — 9-м нэсыщт. КъыхэкIыщтых градус 11 — 16-м нэсэу къызыщыучъыIыщтхэри. Мафэхэм фабэу градуси 3 — 2 щыIэщт.
Къушъхьэхэм осыр бэу къащесын ыкIи ос зэхэлъыр къецохъохын ылъэкIыщт.
КIАРЭ Фатим.