ИлъэсыкIэ зыгъэпсэфыгъо мафэхэм Адыгэ Республикэм ипсэупIэ зэфэшъхьафхэм спорт Iофтхьа­бзэхэр ащыкIуагъэх. Ахэм цIыфыбэ ахэлэжьагъ.

Красногвардейскэр

Теннис цIыкIумкIэ зэнэкъокъухэр физкультурэ-зыгъэпсэфыпIэ комплексэу «Кавказым» щыкIуагъэх.

Хъулъфыгъэхэр, бзылъфыгъэ­хэр, ветеранхэр текIоныгъэм ыкIи хагъэунэфыкIырэ чIыпIэхэм афэбэнагъэх. Красногвардейскэ районым иадминистрацие ипащэу Гъубжьэкъо Темур мы спорт лъэпкъыр лъэшэу ыгу рехьы, ащ къыхэкIэу ащи турнирым зыщиушэтыгъ.
Зэнэкъокъум изэфэхьысыжьхэмкIэ, къуаджэу Джамбэчые щыщ Шъэожъ Анзоррэ Хьатикъуае щыпсэурэ Надежда Тро­фимовамрэ текIоныгъэр къыда­хыгъ. ВетеранхэмкIэ пэрытны­гъэр зыубытыгъэр Хьатикъуае къэзыгъэлъэгъогъэ Джолэ Хъусен.

Тэхъутэмыкъуай

СамбэмкIэ зэнэкъо­къухэр мы районым щыра­гъэкIокIыгъэх.

Зыныбжь илъэс 16-м емыхъугъэхэр ары зызыушэтыгъэхэр. ТекIоныгъэм ыкIи хагъэунэфыкIырэ чIыпIэхэм афэбэнагъэх 2011 — 2012-рэ, 2013 — 2014-рэ ыкIи 2015 — 2016-рэ илъэсхэм къэ­хъугъэхэр.

Пэнэжьыкъуай

БаскетболымкIэ Теуцожь районым ипервенствэ ­къуаджэу Пэнэжьыкъуае щыкIуагъ.

Мыщ кIалэхэр ыкIи пшъашъэхэр (командэм нэбгырэ щырыщ хэтыгъ) хэлэжьагъэх, ахэр 2012 — 2014-рэ илъэсхэм къэхъугъэх.
Пшъашъэхэм язэнэкъокъу те­кIо­ныгъэр къыщыдихыгъ къуаджэу Аскъэлае икомандэ, Очэ­пщыерэ Лъэустэнхьаблэрэ ха­гъэунэфыкIырэ чIыпIэхэр афа­гъэшъошагъэх. КIалэхэмкIэ Очэ­пщые икомандэ анахь лъэшыгъ. Аскъэлаехэм ятIонэрэ чIыпIэр къыдахыгъ, Лъэустэнхьаблэ ибас­кетболистхэр ящэнэрэх.
ТекIоныгъэр ыкIи хагъэунэфыкIырэ чIыпIэхэр къыдэзыхыгъэхэм щытхъу тхылъхэмрэ шIухьафтынхэмрэ афагъэшъошагъэх.

Мыекъуапэ

ГандболымкIэ ыкIи волейболымкIэ зэнэкъокъухэр республикэм икъэлэ шъхьаIэ щыкIуагъэх.

ГандболымкIэ турнирым спорт еджапIэу С.М. Джэнчатэм ыцIэ зыхьырэр къэзыгъэлъэгъогъэ бзылъфыгъэ командиплI хэлэ­жьагъ. ТекIоныгъэр къыдихыгъ командэу «Мыекъуапэ-1-м».
ВолейболымкIэ хъулъфыгъэхэм язэнэ­къокъу пэрытныгъэр щиубытыгъ Славянск-­на-Кубани икомандэ. ПшъашъэхэмкIэ — Луганскэ Народнэ Республикэм.
Мыекъуапэ икIалэхэм ящэнэрэ чIыпIэр къыдахыгъ, ипшъашъэхэр ятIонэрэх.
НыбжьыкIэхэр зэнэкъокъухэм зэрахэлэжьагъэхэм дакIоу мэфэкI мафэхэр шIуагъэ къытэу агъэкIуагъэх, япсауныгъэ агъэпытагъ.