АР-м и Къэралыгъо академическэ ансамблэу «Налмэсым» республикэм щыпсэухэрэм ыкIи ихьакIэхэм апае IофшIэгъакIэу «Налмэс-Налкъутэр мэшIэты» зыцIэ программэ къыгъэлъэгъуагъ.

ИлъэсыкIэм къытфесыгъэ осышхом емылъытыгъэу, «Налмэсым» иконцерт зал тIысыпIэ нэкI иIэжьыгъэп. Илъэс 90-рэ хъугъэу лэжьэрэ ансамблэм ирепертуар зиушъомбгъугъ, лъэпкъ къашъо­хэр гум лъэIэсыхэу, купкI яIэу гъэпсыгъэх. «Налмэс-Налкъутэр мэшIэты» зыфиIорэ концертыр «ШIуфэс къашъомкIэ» къызэIуахыгъ. Чэрэгъурэ сценэм къэшъуа­кIохэр лъапэкIэ зэрэщыуджыхэрэр цIыфхэм ашIогъэшIэгъоныгъ. Концертыр къэзыгъэбаигъэмэ ащыщ экранышхоу пчэгум щагъэпсыгъэр.
Купым ихудожественнэ пащэу ыкIи ибалетмейстер шъхьаIэу, Урысыем, Абхъазым, Пшызэ шъолъыр язаслуженнэ артистэу, Адыгеим инароднэ артистэу Хъоджэе Аслъан къызэриIуагъэмкIэ, пшъэрылъ шъхьаIэу яIагъэр къадэхъугъ, ау джыри зыхэIэзыхьажьыщтхэ чIыпIэхэр къыхигъэщыгъ.
— «Налмэсым» лъэпкъ искусствэр лъагэу зэриIэтыщтым пылъ. Мыгъэ ансамблэм ыныбжь илъэс 90-рэ зэрэхъурэр хэдгъэунэфыкIыщт, концертхэр бэу редгъэкIокIыщтых. Непэрэ я 10-рэ концертыр дгъэхьазырыным фэшI АР-м и ЛIышъхьэу КъумпIыл Мурат иIэпыIэгъушхо къытигъэ­кIыгъ, лъэшэу тызэрэфэразэр хэзгъэунэфыкIы сшIоигъу. Адыгэхэм яшэн-хабзэхэр къашъохэм ахэгъэщагъэх. Пэсэрэ адыгэмэ ящыIэныгъэ къыхэхыгъэ къашъо­хэмрэ, непэрэ уахътэм икъашъохэмрэ концертнэ программэм щызэхэугъоягъэх. Сценэр чэрэгъузэ укъыщышъоныр IэшIэ­хэп, ау ари «Налмэсым» фызэшIокIыгъ, — къыIуагъ Хъоджэе Аслъан.
Концертым еплъыгъэхэм ащыщхэр яшIошIхэмкIэ къыддэгощагъэх.
— Тилъэпкъ цIыкIу культурэ ин зэриIэр концертым щытлъэгъугъ. Тишэн-хабзэхэр, тикъашъохэм гъэпсыкIэу яIэр искусствэм ыбзэкIэ «Налмэсым» непэ къытфиIотагъэх, — къыIуагъ къэлэдэсэу Ордэн Фатимэ.
— Пчыхьэзэхахьэм лъэпкъ къашъоу щытлъэгъугъэр бэ. Анахь дахэр къыхэхыгъуай. Къашъо пэпчъ купкI хэхыгъэ иI. Артистхэм яшъуашэхэр лъэпкъ шIэжьым къыпкъырэкIых, уяплъынкIэ хъопсагъох, — къыIуагъ Сирием къикIыгъэ хьакIэу Цэй Джэбагъ.
«Налмэсым» иконцерт программэ баигъ, гъэшIэгъоныгъ, ижъырэ ыкIи непэрэ нэшэнакIэхэр зыхэлъыгъэ къэгъэлъэгъон хьалэмэт хъугъэ.
Лъэпшъыкъо Фатим.