АР-м и Къэралыгъо Совет — Хасэм я LIII-рэ зэхэсыгъоу иIагъэр мы илъэсымкIэ аужырагъ. Iофтхьабзэр зэрищагъ Парламентым и Тхьаматэу Владимир Нарожнэм.
Зэхэсыгъом хэлэжьагъэх АР-м и ЛIышъхьэу КъумпIыл Мурат, министрэхэм я Кабинет хэтхэр, федеральнэ ыкIи рес­публикэ къулыкъухэм япащэхэр, нэмыкIхэр.
2025-рэ илъэсэу икIырэм ибюджет фэгъэхьыгъэ хэбзэ­гъэу­цугъэм зэхъокIыныгъэхэр фашIыгъэх. Ахэм къызэращиIо­рэмкIэ, хахъохэмкIэ бюджетым иIахьэ сомэ миллион 225,8-кIэ нахьыбэ хъугъэ. Ахъщэр хэу­шъхьафыкIыгъэ цIыф купхэм гъэстыныпхъэ шхъуантIэм пае оборудование афэщэфыгъэным, ащ фэдэ купхэм псэупIэхэр ягъэ­гъотыгъэнхэм, Советскэ Союзым ыкIи Урысыем я ЛIы­хъужъ­хэм, Щытхъум иорден икавалерхэм социальнэ Iэпы­Iэгъу яты­гъэным, сабыеу къэхъу­гъа­кIэхэм япсауныгъэ изытет иуплъэ­кIун, мэкъумэщ хъыз­мэт­шIэпIэ цIыкIухэм язегъэушъомбгъун, нэмыкIхэм апэIуа­гъэ­хьагъ.

АР-м и ЛIышъхьэу КъумпIыл Мурат гущыIэр зештэм, зэхэсы­гъом хэлажьэхэрэм къэблэгъэрэ мэфэкIхэмкIэ къафэгушIуагъ, шъолъыр Парламентым идепутатхэм 2025-рэ илъэсым Iофы­шхоу ашIагъэм пае къызэрафэразэм къыкIигъэтхъыгъ.
ХэушъхьафыкIыгъэ дзэ операцием хэлажьэхэрэмрэ ахэм яунагъохэмрэ IэпыIэгъу ятыгъэ­ныр, Херсон хэкум ирайонэу Адыгеир зыфэгъэзагъэм изэтегъэуцожьын, социальнэ псэуа­лъэхэм яшIын, ягъэцэкIэжьын, цIыфхэм япсауныгъэ изытет уплъэкIугъэныр, кIэлэцIыкIухэм языгъэпсэфыгъо уахътэ изэхэщэн апшъэ щытхэм ащыщхэу къэнэжьых.

Илъэсыр хъугъэ-шIагъэхэмкIэ зэрэбаигъэр, къызэрыкIоу зэрэщымытыгъэр, ау гъэхъагъэхэр зэрэщыIэхэр КъумпIыл Мурат къыхигъэщыгъ. Хэбзэ къулы­къухэмрэ обществэмрэ зэгурыIо­ныгъэ азыфагу илъэу зэрэзэдэ­лэжьагъэхэм ишIуагъэкIэ агъэ­нэфэгъэгъэ пстэури пхырыщыгъэ хъугъэ. Республикэм исоциальнэ-экономикэ къэгъэлъэгъонхэм ар къахэщы.
ЛэжьапкIэхэм ахэхъуагъ, дэеу псэоу шъолъырым исым ипчъа­гъэ къеIыхыгъ, IофшIэпIэ чIыпIэ зимыIэхэр процент 0,3-рэ ныIэп зэрэхъурэр.
2020-рэ илъэсым къыщыу­бла­гъэу республикэм ежь къы­лэ­­жьы­гъэу бюджетым хилъ­хьагъэр фэди 2,2-кIэ нахьыбэ хъу­гъэ.
Гъогухэм яшIынкIэ Адыгеир пэрытныгъэр зыIыгъхэм зэращыщэу къэнэжьы. ПсэупIэхэм яшIын зеушъомбгъу.
Мэкъумэщ хъызмэтым мыгъэ къэгъэлъэгъон дэгъухэр иI. Коцэу къырахыжьыгъэмкIэ тичIыгулэжьхэм хэгъэгум пэрытныгъэр щаубытыгъ, чъыгхатэхэм зэлъаубытырэм хэхъо. Къоджэ псэупIэхэм хэхъоныгъэ ашIыным фытегъэпсыхьэгъэ программэм ипхырыщын чанэу республикэм щылъагъэкIуатэ.
АР-м и ЛIышъхьэ социальнэ инфраструктурэм изегъэушъомбгъун, анахьэу гъэсэныгъэм, культурэм, спортым, псауны­гъэм икъэухъумэн япхыгъэ псэуалъэ­хэм ягъэцэкIэжьын, лъэшэу Iоф зэрэдашIэрэр къыIуагъ. Медицинэм ылъэныкъокIэ пчъагъэу къатIорэ пэпчъ цIыфхэм япсауныгъэрэ ящыIэныгъэрэ зэрепхыгъэм КъумпIыл Мурат къыкIигъэтхъыгъ. Ащ фэшI мы лъэ­ныкъомкIэ псэолъакIэхэр гъэуцугъэнхэр, медицинэ IэпыIэгъур джыри нахьышIу шIыгъэныр пшъэрылъ шъхьаIэхэм ащыщ.
«Хэгъэхъуагъэу къэIуагъэу щымытэу, Адыгеим IофшIэны­шхо щышIагъэ хъугъэ. Илъэсэу икIырэм пшъэрылъэу тапашъхьэ къиуцуагъэр зэкIэ игъом ыкIи икъоу зэрэдгъэцэкIагъэм къыкIэзгъэтхъымэ сшIоигъу. Депутатхэр тигъусэхэу а зэкIэри тшIагъэ. Лъэныкъо пстэумкIи республикэм ихэбзэ къулыкъу­хэр хэгъэгум и Президентэу Владимир Путиным, Урысыем и Правительствэ яIэпыIэгъугъэх. ФедерациемкIэ Советым Адыге­им ыцIэкIэ хэт сенаторхэмрэ УФ-м и Къэралыгъо Думэ идепутатхэмрэ яшIушIагъэкIэ бэ зэшIохыгъэ хъугъэр. Тизэдэлэ­жьэныгъэ лъытэгъэкIуатэ. Iоф­тхьабзэу дгъэнэфагъэхэр къызэтедгъэуцохэрэп. ПIалъэхэм зэкIэри адештэх. Пшъэрылъэу тапашъхьэ итхэр игъом ыкIи шIуагъэ къатэу тапэкIи пхырыт­щынхэр анахь шъхьаI. ­Лъэпкъ проектхэм, къэралыгъо программэхэм, республикэм хэхъоныгъэ егъэшIыгъэнымкIэ унэе программэм амалэу къытатырэр хэзыгъэ имыIэу гъэфедэгъэным къулыкъу пстэури ыуж итыным мэхьанэ иI. ЛъэныкъуабэхэмкIэ IэпэчIэгъанэхэр тиI, ахэр дгъэфедэнхэ фае. ТиIофшIэн шIуагъэу къытырэр цIыфхэм зэхашIэным, ящыIакIэ нахьышIу тшIыным тыпылъын фае», — къы­Iуагъ КъумпIыл Мурат.
ХЪУТ Нэфсэт.