Адыгеим и ЛIышъхьэу КъумпIыл Муратрэ Сбербанкым и Адыгэ къутамэ пэщэныгъэ дызезыхьэрэ ДышъэкI Асхьадрэ АР-м и Правительствэ зычIэт унэм IофшIэгъу зэIукIэгъу щызэдыря­Iагъ.
Республикэмрэ банкымрэ азыфагу илъ зэдэлэжьэныгъэм тапэкIи хэхъоныгъэу фашIыщтым ахэр тегущыIагъэх. Ащ хэлэжьагъэх АР-м иминистрэхэм я Кабинет и Тхьаматэ игуадзэу ЛIыхэсэ Махьмуд, экономикэ хэхъоныгъэмкIэ ыкIи сатыумкIэ министрэм иапэрэ гуа­дзэу Александр Павловскэр.
АР-м и ЛIышъхьэ къызэрэхигъэщы­гъэмкIэ, республикэмрэ Сбербанкымрэ шIуагъэ къэзытырэ зэдэлэжьэныгъэ азы­фагу илъ хъугъэ, УФ-м и Президентэу Владимир Путиным IофшIэным илъэныкъо шъхьаIэхэу цIыфхэм ящыIакIэ на­хьышIу хъунымкIэ къызыпкъырыкIынхэ фаехэр Адыгеим щыпхырыщыгъэнхэмкIэ ахэм язэфыщытыкIэхэм яшIуагъэ къэкIо.
«Республикэм хэхъоныгъэ ышIынымкIэ, цифрэ шIыкIэм зиушъомбгъунымкIэ гухэлъыбэ тиI. Ахэм инновационнэ тех­нологиехэр, мылъкумкIэ амал зэфэшъхьафхэр ахэхьэх, Сбербанкым ишIуагъэ къыгъэкIонымкIэ шIыкIэ зэфэшъхьафхэри агъэфедэх. Экономикэм илъэныкъо шъхьаIэхэм зыкъаIэтынымкIэ анахь зи­шIуагъэ къакIохэрэм ащыщых бизнесым чIыфэхэр IэкIэгъэхьэгъэнхэр ыкIи нэмыкI мылъку Iофтхьабзэхэр игъо фэлъэгъугъэнхэр. Арышъ, Сберым зэ­дэлэжьэныгъэу дытиIэр лъыдгъэкIотэщт, бизнес цIыкIумрэ гурытымрэ IэпыIэгъоу яттырэм нахь зегъэушъомбгъугъэным, социальнэ проектхэр пхырыщыгъэнхэм тадэлэжьэщт», — къыIуагъ КъумпIыл Мурат.
ДышъэкI Асхьад къызэрэхигъэщыгъэм­кIэ, ащ фэдэ зэдэлэжьэныгъэм мэхьанэшхо иI ыкIи Сбербанкым и Адыгэ ­къутамэ иIофшIэн ипэшIорыгъэшъ кIэух­хэм афэгъэхьыгъэу къыIотагъ. 2025-рэ илъэсым къыкIоцI цIыфхэм ахъщэу ралъ­хьагъэр проценти 9-кIэ нахьыбэ хъугъэ ыкIи сомэ миллиард 46-м нэ­сыгъ. ЧIыфэу аштагъэр проценти 4-кIэ нахьыбэ хъугъэ, сомэ миллиард 41,3-м нэ­сыгъ. Бизнесым ифэIо-фашIэхэм алъэныкъокIэ угущыIэн хъумэ, ар бэкIэ нахьыб: юридическэ лицэхэм чIыфэу аратыгъэр процент 37-кIэ нахьыбэ хъугъэ, сомэ миллиард 15,6-м нэсыгъ. Юридическэ лицэхэм — процент 14-кIэ нахьыбэ хъугъэ, сомэ миллиарди 5,6-м нэсыгъ.
Урысые Федерацием и Президент предпринимательствэ цIыкIумрэ гурытымрэ къэралыгъо IэпыIэгъу ятыгъэнымкIэ игъоу ылъэгъугъэ Iофыгъохэм язэшIохын Адыгеим и ЛIышъхьэ шъхьафэу къащыуцугъ. Ащ фэдэ программэхэм ахэхьэх фэгъэкIотэныгъэ зыхэлъ чIыфэ­хэр ятыгъэнхэр. Предпринимательхэм федэу къаIэкIахьэрэр нахьыбэ хъунымкIэ ахэм яшIуагъэ къэкIо. Сбербанкым къызэритыгъэмкIэ, фэгъэкIотэныгъэ зы­хэлъ программэхэм ыкIи Сбербанкым игъо ылъэгъурэ Iофтхьабзэхэм къады­хэлъытагъэу Адыгеим ибизнес инрэ гурытымрэ зэзэгъыныгъэ адашIыгъ сомэ миллион 830-м нэсэу, ащ хэхьэх къыдэгъэкIыжьыным пае илъэсым проценти 5-м нэсырэ чIыфэхэр. ПсэолъэшIыным ихэхъоныгъэкIэ ишIогъэшхо къэкIуагъ амыгъэкощырэ мылъкумкIэ проектым сомэ миллиард 17,8-рэ фэдиз хъурэ ахъщэу Сберым къыIэкIигъэхьагъэр.
ПIэлъэ кIыхьэм телъытэгъэ программэхэр республикэм щызэшIохыгъэнхэм иIофыгъуи зэдэгущыIэгъум илъэхъан къаIэтыгъ. Республикэм цифровизациемкIэ ыкIи АI-трансформациемкIэ гу­гъапIэу иIэхэм атегущыIагъэх. Респуб­ликэм ищыIэныгъэ илъэныкъо зэфэшъхьафхэм Сберыр зикIэщэкIо инновационнэ технологиехэмрэ цифрэ зэшIохыкIэ амалхэмрэ гъэфедэгъэнхэм мэхьа­нэшхо зэриIэр Адыгеим и ЛIышъхьэ къыхигъэщыгъ. ГущыIэм пае, 2025-рэ илъэ­сым Адыгэ Республикэм «ТурпомошниккIэ» заджэхэрэм Iоф щишIэу ригъэжьагъ, ащ лъапсэ фэхъугъэр ней­росетэу «ГигаЧат» зыфиIорэр ары.
Ащ нэмыкIэу общественнэ транспортым Iэрылъхьэу ахъщэр щамытынымкIэ IофшIэн гъэнэфагъэ республикэм ихэ­бзэ къулыкъухэм ягъусэхэу зэшIуахы. Урысыем и Банк и Къутамэу АР-м щыIэм къызэритыгъэмкIэ, автобус ыкIи троллейбус 350-рэ, процент 84-рэ фэдиз, электрон терминалхэмкIэ зэтегъэпсы­хьагъ.
АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.