Адыгеим иIэпэIасэхэм я Ассоциацие илъэсым изэ­фэ­хьысыжь къэгъэлъэгъон зэхищагъ. Iофтхьабзэр куль­турнэ хэхъоныгъэмкIэ гупчэу «Ошъадэм» щыкIуагъ.

АР-м культурэмкIэ и Министерст­вэрэ лъэпкъ культурэмкIэ шъолъыр Гупчэмрэ ащ изэхэщэнкIэ Iэпы­Iэгъух.
Зэфэхьысыжь къэгъэлъэгъоным хэлэжьагъэх АР-м иIэпэIасэхэм язэхахьэ хэтхэр ыкIи ахэм яIофшIагъэ­хэр: лъэпкъ художественнэ IэшIа­гъэхэр, музеим чIэлъ пкъыгъохэм атешIыкIыгъэхэу республикэм игранткIэ гъэцэкIагъэхэр, дышъэидагъэр, адыгэ лъэпкъ шъуашэхэр, художест­веннэу псыхьэгъэ пхъэр. Джащ фэдэу езыгъэжьэгъэкIэ Iэпэ­Iасэхэм яIэшIагъэхэри къэгъэлъэгъо­ным къыра­хьылIагъэх. ГущыIэм пае, ащ фэдэх хы ШIуцIэ Iушъом къикIы­гъэхэу, культурнэ гупчэу «Аше» зы­гъэлажьэхэу ТIэшъу зэшыпхъухэр. Ахэр Ассоциацием мыгъэ щыщ хъугъэх ыкIи ащ зэхищэрэ Iофтхьабзэхэм чанэу ахэлажьэх. Зэ­фэхьысыжь зэха­хьэми ягуапэу къеблэгъагъэх, гъэшIэ­гъоныбэ къыздахьыгъ.
— Шъагъэм иIахьхэр зыхэлъ адыгэ нысхъапэ къэдгъэхьазырыгъ. Мыхэр ашIэу зырагъэжьагъэр бэшIагъэ, илъэс минитфым нахьыбэкIэ узэкIэIэбэжьмэ ары. Пэсэрэ цIыфхэр зыдэщысыщтыгъэ­хэу археологическэ IофшIэнхэр зыщыкIуагъэхэм мыщ фэдэхэу, хъэдэным хэшIыкIыгъэхэу бэ къащагъотыжьырэр. Дэнэ гъогум фэгъэхьыгъэ тхылъым ахэр игъэкIотыгъэу къыщыгъэлъэгъуагъэх. Адыгэ, шапсыгъэ, къэбэртай ыIоу зэхэушъхьафыкIыгъэу дэтых. Сэри сятэу ТIэшъу Мурдин ащ фэдэхэр ицIыкIугъом щыIагъэхэу къышIэжьыщтыгъэх. Ахэм анэгухэр ромб сурэтымкIэ зэхэ­хъыхьэгъагъэх. Тэри мары ар къыкIэтшIыкIыжьыгъ, — къыддэгощагъ ТIэшъу Сафиет.
Адыгеим иIэпэIасэхэм я Ассоциацие непэ нэбгырэ 16 хэхьэ. Республикэм имэфэкIхэм зэкIэми ахэр чанэу ахэла­жьэх, шъолъырыр урысые зэнэкъокъу­хэм къащагъэлъагъо, проект гъэшIэгъонхэр агъэцакIэх, лIэужыкIэхэр апIух.
— Сэ зэрэслъытэрэмкIэ, мы илъэсым дэгъоу Iоф тшIагъэ. Итхъухьагъэр зэкIэ дгъэцэкIагъэ. Ары пакIошъ, Iофым дакIоу тшIагъэри бэ. Тэ къытхахьэхэрэр Iэпэ­Iэсэ закъохэр арэп. Тикультурэ, тилъэпкъ зыгу фэузэу, IэпэIэсэныгъэ ежьым хэмылъыми, Iэпэщысэхэм яшIыкIэ зышIэхэрэри къыддэлажьэх, — еIо АР-м иIэпэIасэхэм я Ассоциацие ипа­щэу Гумэ Ларисэ.
Зэфэхьысыжь къэгъэлъэгъоным къыдыхэлъытэгъагъэх мастер-классхэр, адыгэ джэгукIэхэр. Анахь чанхэм шIу­хьафтынхэр аратыгъэх. Джащ фэдэу 2025-рэ илъэсым иIэпэIасэхэм къалэжьыгъэ дипломхэр афагъэшъошагъэх.
Анцокъо Ирин.