Адыгэ Республикэм испорт­сменхэм илъэс къэс гъэхъэгъэшIухэр ашIых, къэралыгъо ыкIи дунэе мэхьанэ зиIэ зэнэ­къо­къухэм текIоныгъэхэр, хагъэунэфыкIырэ чIыпIэ­хэр къащыдахых. Мыгъи ащ фэдагъ, узэрыгушхон къэгъэлъэгъонхэр тиIэх.

Хабзэ зэрэхъугъэу, тибэнакIохэм тагъэгушIуагъ. СамбэмкIэ, дзюдомкIэ, шъхьафит ыкIи урым-рим бэнэнымкIэ текIоныгъабэ къытфахьыгъ. ДзюдомкIэ Европэм и Кубок икъыдэхын фэгъэхьыгъэ зэнэкъокъум Мерэм Дамир ичемпион хъугъэ, Еутых Рэмэзанрэ Датхъужъ Алыйрэ джэрз ме­даль­хэр къафагъэшъошагъэх. АР-м и ЛIышъхьэу КъумпIыл Мурат Адыге­им ыцIэ дахэкIэ рязыгъэIогъэ спортсменхэм аIукIагъ, афэгушIуагъ, шIухьафтынхэр афи­шIыгъэх. Бжыхьэм республикэм ипа­щэ спортсменхэр ыкIи тренер­хэр ригъэблэгъагъэх. Ащ ушъхьагъоу фэхъугъэр тисамбист цIэ­ры­Iоу Наш Расул Урысыем ыкIи дунаим ячемпионатхэм текIо­ныгъэ къазэращыдихыгъэр ары. Джащ фэдэу Расул самбэмкIэ Гранприр, Урысыем ыкIи дунаим якубокхэр къыфагъэшъошагъэх. Мы зэIукIэгъум хэлэжьагъэх тибоксерхэу Евгений Жоровымрэ Мушег Баяндурянрэ, мыхэм Ев­ропэм ипервенствэ текIоны­гъэр къыщыдахыгъ. Адыгеим и ЛIы­шъхьэ спортсменхэм ямызакъоу, ахэм ятренерхэу Джарымэкъо Нурбый, Александр Ким ыкIи Карлен Восканян афэгушIуагъ, шIухьафтынхэр афишIыгъэх.

АдыгеимкIэ спорт лъэпкъыкIэу щытхэми шъолъырым зыщаушъом­бгъу. ГущыIэм пае зэдегъэштэн есынымкIэ Мыекъуапэ испорт­сменкэ ныбжьыкIэхэм Урысые зэнэкъокъоу «Выше радуги» зы­фиIорэм дэгъу дэдэу зыкъыща­гъэлъэгъуагъ, спортым имастер хъунхэмкIэ шапхъэр агъэцэкIагъ. Ханты-Мансийскэ щыкIогъэ зэ­нэкъокъум къэралыгъом ишъолъыр зэфэшъхьафхэм къарыкIыгъэ спортсмен 300 фэдиз хэлэжьагъ, ахэр командэ 33-рэ хъущтыгъэх. Адыгеир къэзыгъэлъэгъуагъэхэр олимпийскэ резервым испорт еджапIэу В. С. Максимовым ыцIэ зыхьырэм зыщызыгъасэхэрэр ары. Ахэр: Анастасия Анисимовар, Джанхъот Элана, Анас­тасия Мороз, Владислава Хлу­пинар, Елизавета Шестаковар, Диана Михайловар ыкIи Виктория Исаковар.

Щэбзэ щэрыонымкIэ гъэхъэгъэ­шIухэр зышIыгъэ Иван Лемешевым Урысыем спортымкIэ имас­терыцIэ шIэхэу къыфагъэшъо­шэщт. Къэралыгъо мэхьанэ зиIэ зэнэ­къокъоу «Надежды России» зыфиIорэм ащ дэгъоу зыкъыщигъэлъэгъуагъ, очко 600-у къэпхьын плъэкIыщтым щыщэу 579-рэ ригъэкъугъ. Щэ щэрыонымкIэ ти­пшъашъэхэм тагъэгушIуагъ. Спорт еджапIэу С. Г. Алифиренкэм зы­щызыгъасэхэрэм Московскэ хэкум ипсэупIэу Игнатовэм щы­кIогъэ зэнэкъокъум апэрэ чIыпIэр къыщыдахыгъ. Чемпионкэ хъу­гъэх: Анна Андращук, Хьажьджэрые Бэллэ ыкIи Мария Бушуевар.
Художественнэ гимнастикэмкIи къэгъэлъэгъонышIухэр тиIэх. Анастасия Ким, Дарья Ларионовар, Милена Капковар, Арина Щербаневар, Милана Матевосян, Карина Сильченкэр, Василиса Гарбузовар ыкIи Анна Алексеевар спортымкIэ мастер хъугъэх. Ахэм къафэгушIуагъ ыкIи къа­лэжьыгъэ тынхэр аритыжьыгъэх Мыекъопэ къэлэ администрацием ипащэу Геннадий Митрофановым.

Республикэм икъэлэ шъхьаIэ икомандэу «Мыекъуапэ 01-м» лъэс зекIонымкIэ Урысые зэнэ­къокъум ящэнэрэ чIыпIэр къыщыдихыгъ.
Спортым ыкIи физическэ культурэм апыщагъэхэм япчъагъэ на­хьыбэ хъуным республикэм ипащэхэм анаIэ тырагъэты. Мы лъэныкъомкIэ гъэхъэгъэшIухэр тиIэх, шъолъырым спорт псэо­лъакIэхэр щашIых, щызэтыра­гъэпсыхьэх, ахэм япчъагъэ непэ 1000-м шIокIыгъ.
Сэнаущыгъэ зыхэлъ спортсмен ныбжьыкIэхэр, IэпэIэсэныгъэ зы­IэкIэлъ тренерхэр тиIэх, арышъ, мы лъэныкъомкIэ республикэм тапэкIи гъэхъэгъэшIухэр зэри­шIыщтхэм щэч хэлъэп.