Адыгэ кIэлэегъэджэ колледжэу Андырхъое Хъусен ыцIэ зыхьырэр зызэхащагъэр илъэси 100 зэрэхъугъэм фэгъэхьыгъэ мэфэкI Iофтхьабзэ мы мафэхэм искусствэмкIэ кIэлэцIыкIу еджапIэм щыкIуагъ. ЛIэшIэгъу зэпызычыгъэ еджапIэр тишъолъыр итарихъ пытэу хэхьагъ, илъэс зэкIэлъыкIохэм зисэнэхьат хэшIыкIышхо фызиIэ нэбгырэ мин пчъагъэ къычIитIупщыгъ. Ахэр яеджапIэ рэгушхох.

МэфэкI зэхахьэм къекIолIагъэх федеральнэ ыкIи хэбзэ къулыкъухэм ялIыкIохэр, колледжым илъэс зэфэшъхьафхэм Iоф щызышIагъэхэр, щеджагъэхэр, непэ щылажьэхэрэр, студентхэр.
Iофтхьабзэр рамыгъажьэзэ колледжым ыгъэхьазырыгъэ къэгъэлъэгъоным къэзэрэугъоигъэхэр еплъыгъэх. Илъэс пчъа­гъэхэм республикэ гъэзетхэу «Адыгэ макъэмрэ» «Советская Адыгеимрэ» къарыхьэгъэ тхыгъэхэр, кIэлэегъэджэ пэрытхэм ясурэтхэр ащ къыщагъэлъэгъуа­гъэх. Джащ фэдэу еджапIэм фэгъэхьыгъэ тарихъ фильмэ къагъэлъэгъуагъ, ащ мэфэкIым къекIолIагъэхэр блэкIыгъэ уахътэм хищагъэх.

АР-м и ЛIышъхьэу КъумпIыл Мурат ыцIэкIэ къэзэрэугъоигъэхэм къафэгу­шIуагъ АР-м иминистрэхэм я Кабинет и Тхьаматэ игуадзэу, финансхэмкIэ министрэу Виктор Орловыр.
— КIэлэегъэджэ колледжым гъогу дахэ къыкIугъ, шъолъырым щыпсэухэрэм гъэ­сэныгъэ ягъэгъотыгъэнымкIэ лIэшIэгъу хъугъэу пэрытныгъэ ыIыгъэу Iоф ешIэ. Анахь сэнэхьат шъхьаIэхэм ащыщхэу кIэлэегъаджэмрэ ыкIи кIэлэпIумрэ къы­чIэзыгъэкIырэ апэрэ еджапIэу шъолъырым иI. ЕджапIэм икIэлэ­егъаджэхэм ыкIи истудентхэм Хэгъэгу зэошхом илъэхъан тихэгъэгу къаухъумагъ. Ахэм ащыщхэу Ан­дырхъое Хъусен, Ацумыжъ Айдэмыр, Нэхэе Даутэ, Бжыхьэкъо Къымчэрые СССР-м и ЛIыхъужъ хъу­гъэх. 1967-рэ илъэсым щегъэжьа­гъэу еджапIэм тхакIоу Андырхъое Хъусен ыцIэ ехьы, — къы­Iуагъ министрэм.
Илъэс зэкIэлъыкIохэм еджапIэм ипэщагъэхэм шъхьафэу ащ ягугъу къышIыгъ. ЛIэшIэгъукIэу зытехьэхэрэм гъэхъагъэхэр ашIынхэу зэращыгугъыхэрэр, бэмышIэу мыщ пэщакIэу фашIыгъэ Марианна Михайловскаям ипшъэрылъхэр зэрифэшъуа­шэу зэригъэцэкIэщтхэм яцыхьэ зэрэте­лъыр Виктор Орловым къыIуагъ.

— Непэ колледжыр аужырэ шап­хъэхэм адиштэу зэтегъэпсыхьагъ, шъолъырым ищыкIэгъэ IофышIэхэр къычIегъэкIых. Гъэсэныгъэм исистемэ хэхъоныгъэхэр зэришIы­хэрэм, гурыт еджапIэхэр, кIэлэцIыкIу IыгъыпIэхэр кIэу зэрашIыхэрэм адакIоу мы лъэныкъом Iоф щызышIэщтхэр Адыгеим ищыкIагъэх. АщкIэ колледжыр IэпыIэгъу къытфэхъу, — къыIуагъ Виктор Орловым.
АР-м и ЛIышъхьэ Рэзэныгъэ тхылъ фагъэшъошагъ пащэм игуадзэу Терчыкъо Лидие, кIэлэегъа­джэхэу Татьяна Шангиреевам, Нэгъой Галинэ, Тхьабысымэ Фатимэ, Любовь Вербицкэм, ТIэшъу Фатимэ, Владимир Шевченкэм.
Нэужым АР-м и Къэралыгъо Совет — Хасэм и Тхьаматэу Владимир Нарожнэр Адыгэ кIэлэегъэджэ колледжым иветеранхэм, иIофышIэхэм, истудентхэм къафэгушIуагъ. МэфэкIэу хагъэунэфы­кIырэр АдыгеимкIэ мэхьанэшхо зиIэ хъугъэ-шIагъэу зэрэщытыр къыIуагъ.
Урысыбзэр ыкIи литературэр языгъэ­хьырэ Валерия Лебедь Парламентым ищытхъу тхылъ фагъэшъошагъ. Къэралыгъо Совет — Хасэм ирэзэныгъэ тхылъхэр къалэжьыгъэх кIэлэегъаджэхэу Анжелика Ковязинам, ГъукIэлI Симэ, Лидия Зябкинам ыкIи тхылъеджапIэм ипащэу Тхьаркъохъо Рузанэ.
Джащ фэдэу АР-м гъэсэныгъэмрэ шIэныгъэмрэкIэ иминистрэу Евгений Лебедевыр къэзэрэугъоигъэхэм къафэгушIуагъ. УФ-м IофшIэнымкIэ и ЛIыхъу­жъэу, адыгэ тхакIоу, мы еджапIэр къэзыухыгъэ МэщбэшIэ Исхьакъ игукъэкIыжьхэмкIэ зэхахьэм къекIолIагъэхэм къадэгощагъ.
Зисэнэхьат хэшIыкI фызиIэ IофышIэхэр гъэхьазырыгъэнхэм, къыткIэхъухьэрэ лIэужхэр зэрифэшъуашэу пIугъэнхэм еджапIэм ынаIэ зэрэтетыр Iофтхьабзэм къыщаIуагъ. Джащ фэдэу гъэсэныгъэ, культурнэ ыкIи общественнэ Iофтхьабзэхэм колледжыр ахэлажьэ, лъэпкъым ишэн-хабзэхэр къэухъумэгъэнхэр пшъэ­рылъ шъхьаIэу зыфегъэуцужьы. Ащ дакIоу тинахьыжъхэм ягъэхъагъэхэр зыщамыгъэгъупшэным, тарихъ шIэжьыр агъэлъэ­пIэным кIэлэегъаджэхэри студентхэри фепIух.
Непэ колледжым сэнаущыгъэ зыхэлъ кIэлэегъаджэхэм Iоф щашIэ. Ахэм ясэнэхьат хэшIыкIышхо фыряI, еджапIэм ишэн-хабзэхэр къаухъумэх ыкIи лъагъэ­кIуатэх, къэралыгъом, шъолъырым ящыкIэгъэ IофышIэхэм ягъэхьазырын яшъып­къэу дэлажьэх. ЕджапIэм хэхъоныгъэу ышIыгъэхэм яшIуагъэкIэ Адыгеим имызакъоу, Урысыем и Къыбли пэрытныгъэ щиIыгъ. Колледжым ипедагогхэм, истудентхэм ащыщхэр шъолъыр ыкIи къэралыгъо мэхьанэ зиIэ зэнэкъокъухэм пчъагъэрэ ащатекIуагъэх.
МэфэкI Iофтхьабзэм колледжым зэрифэшъуашэу зыфигъэхьазырыгъ. Сыд фэдэ лъэхъани Iоф щызышIагъэхэр ащыгъупшагъэхэп. Пащэу, кIэлэегъаджэу щылэжьагъэхэу непэ къытхэмытыжьхэм яшIэжь агъэлъэпIагъ. Нэужым еджапIэм итарихъ фэгъэхьыгъэ видеороликым еплъыгъэх, Андырхъое Хъусен лIыхъужъныгъэу зэрихьагъэр къизыIотыкIырэ къэгъэлъэгъоныр зэкIэми ашIогъэшIэгъо­ныгъ.
Адыгэ кIэлэегъэджэ колледжэу Андыр­хъое Хъусен ыцIэ зыхьырэм игъэхъагъэ­хэм ахигъахъозэ джыри лIэшIэгъу пчъа­гъэрэ Iоф ышIэнэу тыфэлъаIо.
ДЕЛЭКЪО Анет.