Урысые шIушIэ Iофтхьабзэу «ШIоигъо­ныгъэхэм яостыгъэе чъыг» зыфиIорэм къыдыхэлъытагъэу Адыгэ Республикэм и ЛIышъхьэу КъумпIыл Мурат Кремлым хэт Ордэунэшхом щагъэуцугъэ остыгъэе чъыгым открыткэхэр зэрылъ шарищ къыпихыгъ.
Республикэм ипащэ къутырэу Гавердовскэм щыщ Светланэ, къалэу Мые­къуапэ дэс Вероникэ, Херсон хэкум икъалэу Геническэ щыпсэурэ Дмитрий зыкIэхъопсыхэрэр афигъэцэкIэщт. Ахэр зыфаехэр: 3D-принтер, кушъхьэфачъэ ыкIи швед стенк. КъумпIыл Мурат шIухьафтынхэр шIэхэу зэраIэкIахьащтхэмкIэ ахэр ыгъэгугъагъэх.
«ИлъэсыкIэр къызщыблагъэрэм а унэгъо мэфэкI хьалэлым зэкIэ кIэлэцIыкIухэр дэгуIэхэу ежэх, хьалэмэт ыкIи шIухьафтын гъэшIэгъонхэм ащэгугъых. Ахэр дгъэрэзэнхэр, лъэшэу зыкIэхъо­псыхэрэр аIэкIэдгъэхьанхэр тэ тфызэшIокIынэу щыт. Президентыр кIэщакIо зыфэхъугъэ социальнэ Iофтхьабзэу «ШIоигъоныгъэхэм яостыгъэе чъыг» зыфиIорэм илъэс къэс сигуапэу сыхэлажьэ. «Апэрэхэм я Движение» ишъо­лъыр къутамэ тыригъусэу зэкIэ кIэлэцIыкIухэр зыкIэхъопсыщтыгъэ шIухьафтынхэр яттыжьыщтых», — къыIуагъ Адыгеим и ЛIышъхьэ.
Шъугу къэтэгъэкIыжьы: мыщ ыпэкIэ республикэм и Правительствэ зычIэт унэм щагъэуцугъэ ИлъэсыкIэ остыгъэе чъыгым КъумпIыл Мурат къыпихыгъагъэх открыткэхэр зэрылъ шархэр ыкIи Адыгеимрэ Херсон хэкум и Геническэ районэу тыздеIэрэмрэ якIэлэцIыкIуи 4-мэ яшIоигъоныгъэхэр афигъэцэкIэщтых.
Илъэс къэс Iофтхьабзэу «ШIоигъоныгъэ­хэм яостыгъэе чъыг» зыфиIорэм къыхэ­лажьэх республикэм ихэбзэ къулыкъу­хэр, депутатхэр, бизнесменхэр, шIушIакIохэр, шъолъырым щыпсэухэрэр. ИлъэсыкIэр къыз­щихьащтым кIэлэцIыкIухэмрэ ныбжьыкIэхэмрэ я Урысые общественнэ-къэ­ралыгъо движениеу «Апэрэхэм я Движение» Iофтхьабзэр зэхещэ, ащ IэпыIэгъу къыфэхъу ныбжьыкIэхэм яIоф­хэм афэгъэзэгъэ Федеральнэ агентст-вэр.