Лъэпкъ гъэзетэу «Адыгэ макъэм» иIофышIэхэм якIэлэцIыкIухэм апае илъэсыкIэ мэфэкI лэжьапIэм щыкIуагъ. Зэпыугъо зыфэхъугъэгъэ шэн-хэбзэ дахэм редакцием къыригъэгъэзэжьыгъэу, ятIонэрэ илъэс хъугъэу ар регъэкIокIы.

КIэлэцIыкIухэмкIэ ар хъугъэ-шIэгъэ шъыпкъ. Ны-тыхэм, ныжъхэм ялэжьапIэ щызэхэщэгъэ илъэсыкIэ мэфэкIыр ахэм ясабыигъокIэ гукъэкIыжь дахэ хъущт. МэфэкI Iофтхьабзэр, зэрэхабзэу, адыгабзэкIэ рекIокIыгъ. Лъэпкъ шъуашэр щыгъэу пщынэ къеозэ ЛIыжъ Щтыргъу­кIыр къафэкIуагъ, къыгъэшъуагъэх, усэхэм къаригъэджагъэх, ыгъэчэфыгъэх. «Адыгэ макъэм» иунэ щыкIощт илъэсыкIэ мэфэкIым ехъулIэу кIэлэцIыкIухэм адыгабзэкIэ усэхэр къызэрагъэшIагъэх. Ащ пае гъэзетым ыцIэ зытетхэгъэ блокнотхэмрэ къэлэмхэмрэ шIухьафтынэу аратыгъэх.
— Унагъоуи шIы, лэжьапIэуи орэхъу лIэужхэм зэIэпахырэ шэн-хабзэхэр иIэнхэ фае. ИлъэсыкIэ чъыгэу тиIофшIапIэ щыдгъэуцурэр ащ фэдэнэу тыфай, сыда пIомэ мыщ фэдэ мэфэкI зэха­хьэхэм узэрапхы, нахь зэпэблагъэ уашIы, тикIэлэцIыкIухэр зэхещэх, зы гукъэкIыжь яIэ мэхъу. Ар лъапIэ, — къыIуагъ «Адыгэ макъэм» иредактор шъхьаIэу МэщлIэкъо Саидэ.
АдыгабзэкIэ мэфэкIыр зэрэрекIокIыгъэм фэшъхьафэу АР-м иIэпэIасэхэм я Ассоциацие иилъэсыкIэ джэгуалъэхэмкIэ пцыикъ чъыгыр гъэдэхэгъагъэ. Ассоциацием гъэ къэс зэхищэрэ зэнэкъокъоу «Лъэпкъ нэшанэ зиIэ илъэсыкIэ джэ­гуалъ» зыфиIорэм хэлэжьагъэхэм ахэр агъэхьазырыгъэх. Джэгуалъэхэр зыпы­лъыгъэ илъэсыкIэ чъыгыр АР-м мэзхэмкIэ и ГъэIорышIапIэ редакцием шIухьафтын къыфишIыгъ.
Адыгэ мэкъамэхэр мэфэкIым къырашIэкIыгъэх Шэуджэн районым лъэпкъ культурэмкIэ и Гупчэ иIофышIэхэу ПашIо Адамрэ (пщынэм къеуагъ, ЛIыжъ Щтыр­гъукIыгъ) Ламэкъо Асхьадрэ (пхъэкIычыр ыгъэжъынчыгъ). Адыгэ шэн-хабзэм тетэу хъярыр уджым зэфишIыжьыгъ. Ини цIыкIуи зэгъусэхэу мэфэкI чъыгым къа­шъохэзэ къекIокIыгъэх. МэфэкIыр кIэм зэрэфэкIуагъэм ишыхьатэу ЛIыжъ Щтыр­гъукIым IэшIу-IушIу къэмланхэу кIэлэцIыкIухэр зэжагъэхэр аритыгъэх, илъэсыкIэ хъяр техьанхэу афэлъэIуагъ.
Анцокъо Ирин.