ТекIоныгъэм и Музееу Москва дэтым илъэсыкIэ Iофтхьабзэу «ТекIоныгъэм иостыгъэе чъыг» зыфиIорэр тыгъэгъазэм и 21-м щыкIуагъ.

ХэушъхьафыкIыгъэ дзэ операцием хэлэжьагъэхэм, хэкIодагъэ­хэм, зыдэхъугъэр амышIэхэрэм якIэлэцIыкIухэу Адыгеим щыпсэухэрэр ащ рагъэблэгъагъэх. Iоф­тхьабзэр зэшIуихыгъ шъолъыр фондэу «Хэгъэгум иухъумакIохэр» зыфиIорэм АР-м и Правительствэ иIэпыIэгъоу.
МэфэкI Iофтхьабзэм хэлэжьагъэх илъэси 6 — 14 зыныбжь кIэ­лэцIыкIу 16, ахэм алъыплъэгъэ фондым илIыкIо ыкIи нахьыжъхэу нэбгырэ 12. Программэ гъэшIэгъон дэдэ кIэлэцIыкIухэм къафагъэхьазырыгъ. АщкIэ тарихъ нэшанэ зыхэлъ пкъыгъохэмкIэ музеим ыкIоцI агъэдэхагъ, пшысэхэм къахэхыгъэ лIыхъужъхэм шъуа­шэхэр ащыгъхэу джэгукIэ зэфэшъхьафхэр афызэхащагъ. Тикъэралыгъо иблэкIыгъэ къыхэхыгъэ хъугъэ-шIагъэхэм ягъогоу афызэхагъэуцуагъэм къырыкIуагъэх, ЛIыжъ ЩтыргъукIым шIухьафтынхэр къаритыгъ.
Мы илъэсым узIэпищэу джэгукIэм исюжет зэхагъэуцуагъ: ижъырэ дзэ кинопленкэм ихъытыу ифэгъэ Ос Пшъашъэр кIэлэцIыкIухэм къагъэнэжьын фэягъ. Те­кIоныгъэшхом иилъэсхэм ягъогу зэпачызэ, зэкIэ дзэ пэрыохъухэм апхырыкIхэзэ а пшъэрылъыр ныбжьыкIэ цIыкIухэм зэшIуахыгъ. КIэухым остыгъэе чъыгыр къызэпэнэфыгъ.
Фондэу «Хэгъэгум иухъумакIохэр» зыфиIорэм игупчэ аппарат автобус къафыхигъэкIи, мэфэкI Iофтхьабзэм хэлэжьагъэхэр Москва къыщыращэкIыгъэх, зарагъэплъыхьагъ.
КIэлэцIыкIухэм язещэн, зыщыпсэугъэ­хэм, ашхыгъэм атефэгъэ мылъкур Адыгеим и Правительствэ къафитIупщыгъ.