ГандболымкIэ къэралыгъом иныбжьыкIэ первенствэ хэлэжьэрэ «АГУ-Адыиф-2-м» мэхьанэшхо зиIэ текIоныгъитIу къыдихыгъ. Мы мафэхэм тихьэкIагъ командэу «Ростов-Дон-3-УОР-р». Адыгеим илIыкIохэм мы ешIэгъухэр къызахьыхэкIэ, ростовчанкэхэм апэ ишъынхэ алъэкIыщтыгъ ыкIи а пшъэрылъыр агъэцэкIагъ.

Командэхэм яIэгъэ зэIукIэгъуитIум дэгъу дэдэу закъыщагъэлъэгъуагъ Елизавета Зарецкаямрэ Джамиля Утаровамрэ. Зарецкаям къэлапчъэм Iэгоо 19, Утаровам — 16 дадзагъ. Апэрэ ешIэгъур 34:30-у, ятIонэрэр – 27:23-у аухыгъ. Мы гъэхъагъэм ишIуагъэкIэ тикомандэ турнир таблицэм къыщыдэкIоягъ ыкIи я 7-рэ чIыпIэр еубыты.
Щылэ мазэм и 25-м нэс тикомандэ зигъэпсэфыщт, ащ ыуж зэнэкъокъур рагъэжьэжьыщт.
Командэхэр зыдэщыт чIыпIэхэр ыкIи очко пчъагъэу рагъэкъу­гъэр:

1. «ЦСКА-2» — 47.
2. «СК КК Черноморочка-2» — 37.
3. «Лада-СШОР» — 36.
4. «Кубань-2» — 34.
5. «Динамо-Синара-2» — 32.
6. «Астраханочка-СШОР» — 31.
7. «АГУ-Адыиф» — 18.
8. «Звезда-2» — 17.
9. «Ростов-Дон-3» — 16.
10. «Луч-2» — 12.
11. «СШОР N 5 — Университет-2» — 7.
12. «СШ N 13 Алиса» — 1.