ШIуагъэ къэзыхьырэ Iофтхьабз
ИлъэсыкIэм ипэгъокIэу Урысые физкультурэ-спорт Iофтхьабзэу «IофшIэным ыкIи зыкъэухъумэжьыным сафэхьазыр» зыфиIорэм ифестиваль Мыекъуапэ щыкIуагъ.
Адыгэ Республикэм физическэ культурэмкIэ ыкIи спортымкIэ и Комитет кIэщакIо зыфэхъугъэ Iофтхьабзэм зыныбжь имыкъугъэхэр хэлэжьагъэх. Ахэм лъэныкъуиплIыкIэ заушэтыгъ, зэфэхьысыжьхэм ялъытыгъэу балл гъэнэфагъэхэр къахьыгъэх.
Iофтхьабзэм къыдыхэлъытагъэу ИлъэсыкIэмкIэ къэзэрэугъоигъэхэм къафэгушIуагъ ЛIыжъ ЩтыргъукIыр. КIэлэцIыкIухэр зэнэкъокъу ыкIи джэгукIэ зэфэшъхьафхэм ахэлэжьагъэх, орэдхэр къаIуагъэх, пстэуми шIухьафтынхэр афашIыгъэх.
Зэфэхьысыжьхэм къызэрагъэлъэгъуагъэмкIэ, Назар Козловым, Давид Авджян, Бэщыкъо Жасминэ, Илана Охладчук феcтивалым текIоныгъэ къыщыдахыгъ. КъыткIэхъухьэрэ лIэужхэм япсауныгъэ агъэпытэнымкIэ, физическэ культурэм ыкIи спортым пыщэгъэнхэмкIэ мыщ фэдэ Iофтхьабзэхэм яшIогъэшхо къызэрэкIорэр зэхэщакIохэм хагъэунэфыкIыгъ.