Адыгэ Республикэм и Концерт зэхахьэ и Къэралыгъо симфо­ническэ оркестрэ хэтхэм ачIыпIэ ихьащт лIэужыкIэр егъэхьазыры.

Ащ пае Мыекъуапэ искусствэхэмкIэ икIэлэцIыкIу еджапIэу N 6-м апэрэ республикэ кIэлэцIыкIу симфоническэ оркестрэ щызэхащагъ, мыщ сэнаущыгъэ зыхэлъ ныбжьыкIэхэр зэрипхыгъэх.
АР-м изаслуженнэ IофышIэу Елена Шурыгинам, дзэ дирижерэу Игорь Пахомовым, Москва культурэмкIэ иIофышIэ гъэшIуагъэу Ирина Усачевам, Къэралыгъо симфоническэ оркестрэм иартисткэу ыкIи кIэлэегъаджэу Елена Тимошенкэм ягукъэкIкIэ оркестрэ ныбжьыкIэр экспериментальнэу зэхащагъ. Мыекъуапэ искусствэхэмкIэ икIэлэцIыкIу еджапIэу N 6-м ипащэу Дмитрий Гордиенкэм проектыкIэм дыригъэштагъ.
Мыекъуапэ искусствэхэмкIэ икIэлэцIыкIу еджапIэхэм япащэхэр кIэу зыгорэ аушэтыным, яIофышIэхэр кIэщакIо зы­фэхъухэрэм япхырыщынкIэ IэпыIэгъу аратыным зэрэфэхьазырхэм шIуагъэу къытырэр къэлъэгъуагъ. КIэлэцIыкIу оркестрэм мэзищым къыкIоцI ыгъэхьазырыгъэ программэу «Оркестровая феерия» зыфиIорэр тыгъэгъазэм и 20-м къыгъэлъэгъуагъ. Симфоническэ оркестрэм музыкальнэ произведение 11 къыригъэIуагъ.
— Апэрэ республикэ кIэлэцIыкIу симфоническэ оркестрэу зэхэтщагъэм мэхьанэшхо етэты. ИскусствэхэмкIэ еджапIэхэм хэхъоныгъэ ашIыныр, кIэлэ­еджакIохэм сэнаущыгъэу ахэлъыр къы­хэгъэщыгъэныр, ар къагъэшъыпкъэжьын алъэкIэу гъэсэгъэнхэр, академическэ музыкэр шIу ягъэлъэгъугъэныр, ныбжьы­кIэхэр культурнэ щыIакIэм хэщэгъэнхэр, пшъэрылъ гъэнэфагъэхэр зыфагъэуцужьынхэр, щыIэныгъэм ахэр щыпхыращыжьынхэм фэщэгъэнхэр проектымкIэ анахь шъхьаIэу щытых. Музыкант ныбжьыкIэхэми янэ-ятэхэми тигукъэкI ашIогъэшIэгъонэу къыддырагъэштагъ, — къыIуагъ Дмитрий Гордиенкэм.
Мыекъуапэ искусствэхэмкIэ икIэлэцIыкIу еджапIэу N 6-м, еджапIэу Лъэцэ­рыкъо Кимэ ыцIэ зыхьырэм, искусст­вэхэмкIэ кIэлэцIыкIу еджапIэу псэупIэу Тульскэм дэтым, искусствэхэмкIэ кIэлэцIыкIу еджапIэу N 1-м ямузыкант ныбжьыкIэхэр кIэлэцIыкIу оркестрэм хэхьагъэх.
Адыгеим икультурэ хэхъоныгъэ егъэ­шIыгъэным искусствэхэмкIэ кIэлэцIыкIу еджапIэхэр игъэкIотыгъэу дэлажьэх.
Лъэпшъыкъо Фатим.