ИлъэсыкIэм инэшэнэ шъхьаIэхэм ащыщ къэорэ пкъыгъохэр — хло­пушкэхэр, петардэхэр ыкIи мэшIоустхъур. МэфэкIыр гум къинэжьэу ахэм къагъэкIэракIэ. ИлъэсыкIэр къэблагъэ зыхъукIэ къэорэ пкъыгъохэм ягъэ­фе­дэн нахь жъугъэу къежьэ.

Анахьэу ар джэгуалъэ зышIыхэрэр Iэтахъохэр ары. Арэу щытми, машIом зыкъымыштэнымкIэ щы­нэгъончъагъэр къызыдамылъытэкIэ, тхьамыкIагъоу къыхэкIырэр макIэп. Мы пкъыгъохэр псэупIэхэм яща­гухэм къащызыгъаохэрэм тазыр е уголовнэ пшъэ­дэкIыжь атыралъхьан алъэкIыщтэу хэбзэгъэуцугъэм къегъэнафэ.
Къэорэ пкъыгъохэм ящынэгъончъагъэ классхэмкIэ зэтефыгъ, «пиротехникэкIэ» заджэхэрэ пкъыгъохэр я 5-рэ классым, мэшIоустхъур ыкIи петардэр я 4 — 5-м хэхьэх. ПсэупIэхэм, балконым, унашъхьэхэм, гъэстыныпхъэр зэрыкIорэм, электрическэ линием апэгъунэгъоу, цIыфхэр бэу зыщызэхэхьэрэ чIыпIэхэм мэшIоустхъум щыхэбгъанэ хъущтэп, машIом зыкъы­штэным ищынагъо щыI.
Шапхъэхэр аукъохэзэ мэшIоустхъур ошъогум дэзыфыехэрэм тазырэу сомэ мини 5-м нэс арагъэтын алъэкIыщт. Ащ нэмыкIэу машIор къэхъуным ищынагъо зыдэщыIэ чIыпIэм пэгъунэгъоу мэшIоустхъур щызыгъэфедэхэрэм сомэ мини 10-м къы­щыублагъэу сомэ мин 20-м нэс тазыр атыралъхьан фитых.
ЦIыфым сакъыныгъэ къызхимыгъэфагъэу къэорэ пкъыгъом ыпкъ къикIэу машIор къызэкIэнагъэмэ ыкIи цIыфым ипсауныгъэ зэрар рихыгъэмэ, тазырэу сомэ мин 50 фэдиз рагъэтыщт.
Мы пкъыгъохэм якъэщэфынкIэ, ягъэфедэнкIэ шап­хъэхэм тащигъэгъозагъ УФ-м ошIэ-дэмышIэ IофхэмкIэ и Министерствэ и ГъэIорышIэпIэ шъхьаIэу Адыгэ Республикэм щыIэм.
Ахэр хэушъхьафыкIыгъэ щапIэхэм къащыпщэфынхэу щыт. Ащ дакIоу къыхэпхырэ пкъыгъом
сертификат пылъмэ, узэрэдэзекIощт шIыкIэр уры­сыбзэкIэ зэрытхэгъэ тхьапэр игъусэмэ, пIалъэу иIэм игъо имыкIыгъэмэ уакIэупчIэн фае. Ахэр къызы­щышъуамыгъэ­лъэгъугъэ щапIэм шъущымыщафэмэ
нахь тэрэз.
Джащ фэд, къэорэ пкъыгъохэр къэшъущэфыхэ зыхъукIэ, итеплъэ дэгъоу шъуеплъ: зэхэцIыцIагъэу, уцIыныгъэу, зыкIоцIылъым чагъэхэр иIэнхэу щытэп.
Къэорэ пкъыгъор нэпцIымэ къызэрэпшIэщт нэшэнэ шъхьаIэр: зыкIоцIылъ щыхьагъэм къыдэзыгъэкIыгъэм иреквизитхэр, щынэгъончъэу узэрэдэзекIощтыр, зыщыбгъэфедэщт чIыпIэр тетхэгъэнхэу щыт.
Хабзэ зэрэхъугъэу, илъэс къэс ошIэ-дэмышIэ Iоф­хэмкIэ ыкIи хэгъэгу кIоцI IофхэмкIэ министерствэхэм ялIыкIохэр зэгъусэхэу къэорэ пкъыгъохэр хэбзэнчъэу зыщащэрэ чIыпIэхэр къызэдакIухьэх.
МэфэкI Iофтхьабзэхэр зыщызэхащэщтхэ псэупIэхэм ошIэ-дэмышIэ IофхэмкIэ ыкIи хэгъэгу кIоцI IофхэмкIэ министерствэхэм яIофышIэхэм къулыкъур ащахьыщт. Джащ фэдэу къэорэ пкъыгъохэр зыщащэрэ чIыпIэхэм алъыплъэщтых. Социальнэ мэхьанэ зиIэу чэщи мафи цIыфхэр зыщаIыгъ псэуалъэхэм машIор къащымы­хъуным анаIэ тырагъэтыщт.
КIарэ Фатим.