Мыекъопэ район хьыкумыр Кристина Карпенкэрэ Галя Дроменкэрэ яIоф хэплъагъ. Урысыем и Уголовнэ ко­декс ия 322.1-рэ статья ия 2-рэ Iахь диштэу кощыным ылъэныкъокIэ Iофтхьабзэхэр хэбзэнчъэу зэха­ща­гъэхэу ахэр агъэмысагъэх.

ЩынэгъончъэнымкIэ Федеральнэ къулыкъум АР-мкIэ и ГъэIорышIапIэ иIофышIэхэм зэрагъэунэфыгъэмкIэ, 2025-рэ илъэсым игъэтхапэ К. М. Карпенкэмрэ Г. Ф. Драменкэмрэ IэкIыбым къикIыгъэхэр УФ-м зэрэщатхыщтхэм пылъ шапхъэхэр аукъозэ, хэбзэнчъэу Урысыем къихьагъэм пае тхылъ нэпцIхэр учетым зы­щыхагъэуцохэрэ къулыкъум рахьылIагъэх. IэкIыбым къикIыгъэм Урысыем игражданствэ фашIынэу ары гухэлъэу яIагъэр.
Урысыем СледствиехэмкIэ и Комитет СледствиехэмкIэ и ГъэIорышIапIэу АР-м щыIэм уголовнэ Iоф къызэIуихыгъ.
Мыекъопэ район хьыкумым К.М.Карпенкэмрэ Г. Ф. Драменкэмрэ мысэхэу ылъытагъ, нэбгырэ пэпчъ условнэу илъэси 5, ушэтыпIэ пIалъэу илъэси 3 тырилъхьагъ.
Хьыкумым иунашъо кIуачIэ иIэ хъугъэ.
Урысыем щынэгъончъэнымкIэ и Федеральнэ къулыкъу АР-мкIэ и ГъэIорышIапIэ ипресс-къулыкъу