Мыекъуапэ ипрокуратурэ кIэух зэ­фэхьысыжь унашъор ыухэси, поли­цием иучастковэ уполномоченнэ къы­фызэIуахыгъэ уголовнэ Iофыр Мыекъопэ къэлэ хьыкумым IэкIи­гъэхьагъ.

Урысые Федерацием и Уголовнэ кодекс ия 285-рэ статья иа 1-рэ Iахь зигугъу къышIырэ бзэджэшIа-
гъэ зэрихьагъэкIэ, иIэнатIэ къызфигъэфедагъэкIэ ар агъэмысэ.
Следствием зэригъэунэфыгъэмкIэ, 2024-рэ илъэсым иIоныгъо кафем иадминистратор Урысыем хэгъэгу кIоцI IофхэмкIэ и Министерствэ къалэу МыекъуапэкIэ иотдел иучастковэ уполномоченнэ фытеуагъ, къапэIулъ чIыпIэм чъыгхэр зэрэщатыгъурэр риIуагъ. Участковэ уполномоченнэр зигугъу къашIыгъэ чIыпIэм зэкIом, чъыгхэр зэратыгъугъэр нэрылъэгъу къыфэхъугъэми, бзэджэшIагъэ зэрэзэрахьагъэмкIэ тхылъ зэхигъэу­цуагъэп.
Полицием иIофышIэ хабзэр ыукъуагъэу, къыфэгъэ­зэгъэ чIыпIэм зэрэщытыгъуагъэхэр къызыраIом, Iофхэр дэгъоу ащ щызэпыфэхэу къащигъэхъуным пае протокол зэхимыгъэуцуагъэу следствием ылъытагъ.
Участковэм гугъуемылIыныгъэ къызэрэзхигъэфа­гъэм ыпкъ къикIыкIэ кафем иадминистратор ифитыныгъэхэр игъом къыгъэгъунэнхэ ылъэкIыгъэп. Амыгъэпщынэгъэ бзэджашIэр а чIыпIэ дэдэм етIани пчъагъэрэ щытыгъуагъ. ЦIыфхэм дежурнэ частым зыкъызыфагъэзэ нэуж ары ныIэп бзэджэшIагъэ зэрэзэрахьагъэмкIэ тхылъ зызэхагъэуцуагъэр, тыгъуакIор псынкIэу загъэу­нэфыгъэр.
Участковэр хабзэм зэрэдэхыгъэм ыпкъ къикIыкIэ кафем иадминистратор ифитыныгъэхэр укъуагъэ хъу­гъагъэ, къэралыгъом чIэнагъэ рагъэшIыгъагъ, полицием уасэу фашIырэр къеIыхыгъагъ.
Урысыем и Следственнэ комитет Адыгэ Респуб­ликэмкIэ иследственнэ гъэIорышIапIэ къалэу Мые­къуапэкIэ иследственнэ отдел уголовнэ Iофым хэп­лъагъ. Мыекъуапэ ипрокуратурэ уплъэкIунхэр зэхищэхэзэ, мы бзэджэшIагъэр зэхафыгъ.