Адыгэ Республикэм и ЛIышъхьэу КъумпIыл Мурат Урысые Iофтхьабзэу «ШIоигъоныгъэхэм яостыгъэе чъыг» зыфиIорэм — Урысыем и Президентэу Владимир Путиныр кIэщакIо зыфэхъугъэ шIушIэ проектым хэлэжьагъ.
ИлъэсыкIэм ехъулIэу Iофтхьабзэр зэхэзыщэрэр кIэлэцIыкIухэмрэ ныбжьыкIэхэмрэ я Урысые общественнэ-къэралыгъо движениеу «Апэрэхэм я Движение» зыфиIорэр ары. НыбжьыкIэхэм яIофхэмкIэ Федеральнэ агентствэр ащ IэпыIэгъу къыфэхъугъ. Хабзэ зэрэхъугъэу, КъумпIыл Мурат мэфэкI Iофтхьабзэм хэлэжьагъ. Адыгеим и Правительствэ зычIэт унэм чIагъэуцогъэ осты­гъэе чъыгым пылъэгъэ джэгуалъэхэр респуб­ликэм и ЛIышъхьэрэ федеральнэ программэу «ЛIыхъужъхэм яуахът» зыфи­Iорэм хэлэжьэрэ Сергей Ковалевымрэ къыпахыгъэх.
Адыгеим и ЛIышъхьэ Кощхьаблэ щыщ Тамирлан, Мыекъуапэ дэс Елизаветэ, Ханскэм щыпсэурэ Алисэ, Херсон хэкумкIэ Геническэ районым щыщ Павел яшIоигъоныгъэхэр афигъэцэкIэщтых. КIэлэцIыкIухэр синтезаторым, пшэхъо сурэтхэр зыщашIырэ Iанэм, проекторым, кимоном, акIэхъопсых.
«Мы мэфэ благъэхэм кIэлэцIыкIу пстэуми агу раубытэгъэ шIухьафтынхэр аратыщтых. АщкIэ IэпыIэгъу къытфэхъущтых Апэрэхэм я Движение ишъолъыр къутамэ хэтхэр. Пшысэ горэм хэтхэм фэдэу кIэ­лэцIыкIухэм илъэсыкIэ мэфэкI­хэр агъэкIоныр нахьыжъхэм зэдытипшъэрылъ. Мыщ фэдэ IофышIум хэлажьэрэ пэпчъ амал иI кIэлэцIыкIухэр ыгъэгушIонхэу, ахэр зыкIэ­хъопсыщтыгъэхэр афигъэцэкIэнхэу», — къыIуагъ КъумпIыл Мурат.
Адыгеим и ЛIышъхьэ агу къыгъэ­кIыжьыгъ хэти кIэлэцIыкIухэм яшIоигъо­ныгъэхэр афигъэцэкIэн зэрилъэкIыщтыр. Ащ пае сайтэу «елкажеланий.рф» зыфиIорэм щыкIорэ Iофтхьабзэм хэлэжьэнхэ фае. Республикэм ихэбзэ къулыкъу­хэм, депутатхэм, бизнесменхэм, меценатхэм, республикэм ис цIыф къызэрыкIохэм илъэс къэс мы социальнэ проектым яIахь хашIыхьэ.
ИлъэсыкIэм ехъулIэу Адыгеим остыгъэе чъыгхэр щагъэкIэракIэх, утренникхэр, нэмыкI илъэсыкIэ Iофтхьабзэхэр щызэхащэх. Адыгеим и ЛIышъхьэ игу­къэкI­кIэ шIушIэ Iофтхьабзэу зэрахьащтхэм республикэм ис кIэлэцIыкIу 10000 фэдиз ахэлэжьэщт. Ахэр хэушъхьафыкIыгъэ дзэ операцием хэлажьэхэрэм, социальнэу мыухъумэгъэ унагъохэм арысхэр, зипсауныгъэ пыч фэхъугъэхэр, кIэлэеджэкIо сэнаущхэр ары. Пшысэхэм атехыгъэ спектаклэхэмрэ театрэ къэгъэ­лъэгъонхэмрэ АР-м и Театрэ зэхахьэрэ АР-м и Концерт зэхахьэрэ ащыкIощтых. КIэлэцIыкIухэм пшысэхэу «Золушка», «По щучьему велению» зыфиIохэрэм атехыгъэ спектаклэхэр къафагъэлъэгъо­щтых. Нахь такъырыIо кIэлэцIыкIу 1800-р фильмэу «Батырищ» зыфиIорэм еплъы­щтых. IэшIу-IушIухэмрэ пхъэкIычрэ зэ­рылъ Iалъмэкъхэр кIэлэцIыкIухэм апагъохыщтых.
Республикэм иублэпIэ еджапIэхэм ачIэсхэм илъэсыкIэ шIухьафтынхэмрэ Адыгеим и ЛIышъхьэ защыфэгушIорэ открыткэхэмрэ афагъэхьазырыгъэх — а 1 — 4-рэ классхэм арысхэм апае шIухьафтын 26000-рэ муниципалитетхэм арагъэщэгъах. Краснодар краим икъуа­джэхэм адэт еджапIэхэм яа 1 — 4-рэ классхэм арыс нэбгырэ 730-ми шIухьафтынхэр аратыщтых. Ащ нэмыкIэу Херсон хэкум ичIыпIэхэу Адыгеим ынаIэ зытыригъэтыхэрэм ащыпсэурэ кIэлэцIыкIухэ­ми шIухьафтын 10200-рэ афарагъэщагъ.
АР-м и ЛIышъхьэ ипресс-къулыкъу къытырэ къэбархэмкIэ
ЛIышэ Саныет.