Урысые Федерацием чIыпIэ зэжъу ифэгъэ цIыфхэр къэгъэнэжьыгъэнхэмкIэ икъулыкъу иIофышIэ и Мафэ фэгъэхьыгъэ мэфэкI зэIукIэ щыкIуагъ АР-м и ЛIышъхьэ и Координационнэ гупчэ.

Iофтхьабзэм хэлэжьагъэх Адыгеим и ЛIышъхьэу КъумпIыл Мурат, АР-м и Къэралыгъо Совет — Хасэм и Тхьаматэу Владимир Нарожнэр, федеральнэ инспектор шъхьаIэу Сергей Дрокиныр, УФ-м ошIэ-дэмышIэ IофхэмкIэ и Министерствэ и ГъэIорышIапIэу АР-м щыIэм ипащэу Станислав Илющенкэр, программэу «ЛIыхъужъхэм яуахът» зыфиIорэм хэлэжьэрэ Сергей Ковалевыр, АР-м иминистрэхэм я Кабинет хэтхэр, Прокуратурэм, АР-м хэгъэгу кIоцI IофхэмкIэ и Министерствэ, Урысыем щынэгъончъэ­нымкIэ и Федеральнэ къулыкъу и Гъэ­IорышIапIэ, УФ-м и Следственнэ комитет и Следственнэ гъэIорышIапIэу АР-м щыIэм, Адыгеим и Апшъэрэ хьыкум яIэшъхьэтетхэр, джащ фэдэу Урысыем ошIэ-дэмышIэ IофхэмкIэ и Министерствэ и ГъэIорышIапIэу шъолъырым щыIэм щылажьэхэрэр.
ЗэIукIэр заублэм Адыгеим имэшIогъэ­кIуасэхэмрэ икъэгъэнэжьакIохэмрэ яIофшIэн фэгъэхьыгъэ видеороликыр къагъэлъэгъуагъ.
Адыгеим и ЛIышъхьэ къекIолIагъэхэм закъыфигъазэзэ къызэрэхигъэщыгъэмкIэ, къэгъэнэжьэкIо къулыкъухэм яIофшIэн мафэ къэс къыхэщы ялIыхъужъныгъэрэ япшъэдэкIыжьыныгъэрэ зынэсырэр.
«Анахьэу етIани Хэгъэгум иухъумакIо и Илъэсрэ, ТекIоныгъэ­шхом ия 80-рэ илъэсрэ зыщыхагъэунэфыкIырэ уахътэм ащ мэхьанэу иIэм хэхъо. ЦIыфхэм ящыIэныгъэ цыхьэшIэгъоу къэшъуухъу­мэзэ, уи Хэгъэгу къэу­ухъумэныр, ащ уфэгумэкIыныр хэбзэ шIагъоу зэрэщытыр къэшъогъэшъыпкъэжьы. ШъуиIэпэIэсэныгъэ, ащ лъыпытэу цIыфым шъуишIуагъэ ежъу­гъэкIынэу шъузэрэлъыIэсырэр тицIыфхэм ярэхьатныгъэ къэу­хъумэгъэнымкIэ лъэпсэшIу мэ­хъух», — къыIуагъ КъумпIыл Мурат.
ЛIышъхьэм къызэрэхигъэщыгъэмкIэ, илъэсэу икIырэм республикэм имэшIогъэкIуасэхэмрэ икъэгъэнэжьакIохэмрэ къэгъэнэжьын ыкIи машIом игъэкIосэн япхыгъэ Iофтхьэбзабэ зэшIуахыгъ. Нэбгырэ 30 машIохэм ахамыгъэкIодэн алъэкIыгъ, гъогухэм къатехъухьэрэ хъу­гъэ-шIагъэхэм якIэуххэр дэгъэзыжьыгъэн­хэмкIэ, лъыхъон IофшIэнхэр зэшIохыгъэн­хэмкIэ анахьэу анаIэ зытырагъэтыгъэр, IэпыIэгъу зыфэхъугъэхэр нэбгырипшI пчъагъэ хъущт.
ХэушъхьафыкIыгъэу къыхагъэщыгъэр цIыф зэрымыс быбырэ пкъыгъохэр къы­затебыбэхэм ошIэ-дэмышIэ IофхэмкIэ Министерствэм иIофышIэхэм псынкIэу, IэпэIэсэныгъэ ин зэрахэлъыр къахэщэу япшъэрылъхэр зэрагъэцэкIагъэр ары.
«Зэдегъэштэныгъэ шъухэлъэу Iоф зэрэшъушIагъэм ишIуагъэкIэ зы нэбгыри фыкъуагъэ хъугъэп. ШIуагъэ хэлъэу, шъуипшъэрылъхэр дэгъоу зэрэжъугъэцэкIа­гъэхэм пае сышъуфэраз», — къыIуагъ КъумпIыл Мурат.
Республикэм ипащэ анаIэ тыраригъэ­дзагъ къэгъэнэжьакIохэм пшъэдэкIыжь инэу ахьырэм, язэдегъэштэныгъэ джырэ лъэхъаным анахьэу мэхьанэшхо зэриIэм. Республикэм тапэкIи хэхъоныгъэ ышIынымкIэ, псэолъакIэхэр гъэпсыгъэнхэмкIэ, гъогухэр, коммуникациехэр шIыгъэнхэмкIэ, инвестиционнэ проект инхэр пхырыщыгъэнхэмкIэ ащ фэдэ екIолIакIэхэм ямэхьанэ зэрэиныр Адыгеим и ЛIышъхьэ къыхигъэщыгъ.
«Илъэс къэс зекIоу тиреспубликэ къихьэрэр нахьыбэ мэхъу. ТимэшIогъэкIосэ-къэгъэнэжьэкIо къу­лыкъухэм нахьыпэм фэдэу джыри япшъэрылъ шъхьаIэр цIыфхэр, псэуалъэхэр ыкIи чIыпIэхэр ошIэ-дэмышIагъэ зыхэлъ тхьамыкIагъохэм цыхьэшIэгъоу ащаухъумэнхэр ары», — къы­Iуагъ КъумпIыл Мурат.
Къулыкъум иIофышIэхэм тапэкIи цIыфхэм якъэгъэнэжьынкIэ амалыкIэхэр зэрагъэфедэщтхэм, къин къыкъокIымэ, ахэр зыщагъэбылъын алъэкIыщт чIыпIэхэр псынкIэу гъэнэфэгъэнхэмкIэ, гуфакIохэм адэлэжьэнхэмкIэ, цIыфхэм гурыгъэIон IофшIэныр адызэрахьанымкIэ къатефэрэр зэрашIэщтым ицыхьэ зэрэтелъыр республикэм и ЛIышъхьэ къыхигъэщыгъ.
ИкIэухым къулыкъум ипащэхэм ыкIи зэкIэ Iоф щызышIэхэрэм гъэхъагъэу ашIыгъэхэм апае зэрафэразэр КъумпIыл Мурат къыIуагъ ыкIи ежьхэм ямэфэкIрэ къэблэгъэрэ ИлъэсыкIэмрэ афэшI афэгушIуагъ. Рэзэныгъэ гущыIэхэр анахьэу зыфэгъэзэгъагъэхэр къулыкъум иветеранхэу цIыфхэм ящынэгъончъэн зиIахьы­шхо хэзышIыхьагъэхэр ары.
Iофтхьабзэм икIэухым къэгущыIагъэх АР-м и Къэралыгъо Совет — Хасэм и Тхьаматэу Владимир Нарожнэр, Урысыем щынэгъончъэнымкIэ и Федеральнэ къулыкъу и ГъэIорышIапIэу Адыгеим щыIэм ипащэу Михаил Кемеровыр, Урысыем ошIэ-дэмышIэ IофхэмкIэ и Министерствэ и ГъэIорышIапIэу АР-м щыIэм ипащэу Станислав Илющенкэр.
Анахь IофышIэ дэгъоу къыхагъэщыгъэхэм къэралыгъо шIухьафтынхэр ара­тыгъэх. ЩытхъуцIэу «АР-м изаслуженнэ къэгъэнэжьакIу» зыфиIорэр афагъэ­шъошагъ Урысыем ошIэ-дэмышIэ IофхэмкIэ и Министерствэ икъутамэу АР-м щыIэм ипащэу Дмитрий Голубевым, а къулыкъум икъэгъэнэжьакIоу Александр Варламовым.
ЩытхъуцIэу «АР-м изаслуженнэ мэшIогъэкIуас» зыфиIорэр фагъэшъошагъ Урысыем ошIэ-дэмышIэ IофхэмкIэ и Министерствэ и ГъэIорышIапIэу АР-м щыIэм и Къэралыгъо мэшIогъэкIосэ къулыкъу ипащэ игуадзэу Дэчлэжь Казбек.
Адыгеим и ЛIышъхьэ ирэзэныгъэ тхылъхэр аратыгъэх Урысыем ошIэ-дэмышIэ IофхэмкIэ и Министерствэ и ГъэIорышIапIэу АР-м щыIэм ипащэ игуадзэу Щыщэ Эдуард, а къулыкъу дэдэм иотдел ипащэу Татьяна Очкасовам ыкIи иотдел ипащэу Пхэнэе Дмитрий. Нэбгырэ заулэмэ АР-м и Къэралыгъо Совет — Хасэм, ФСБ-м и ГъэIорышIапIэу АР-м щыIэм ярэзэныгъэ тхылъхэр, къулыкъу тынхэр ыкIи хэу­шъхьафыкIыгъэ цIэхэр афагъэшъоша­гъэх.
ИкIэухым республикэм итворческэ купхэм концерт къафатыгъ.
АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.