Республикэм ижурналистхэм азыфагу щызэхащэрэ зэнэкъокъухэу «Патриот», «Адыгеир зэдытиун», «Стоп, коррупция!» зыфиIохэрэм якIэуххэр зэфахьысыжьыгъэх.

Зитхыгъэ ыкIи зикъэтын анахь дэгъоу алъытагъэхэм Адыгэ Рес­публикэм лъэпкъ IофхэмкIэ, IэкIыб къэралхэм ащыпсэурэ тилъэпкъэ­гъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет ищытхъу тхылъхэр аратыжьыгъэх.
Зэхэсыгъор къызэIуихызэ ащ итхьаматэу Долэ Долэтбый игуапэу журналистхэм ягъэхъагъэхэмкIэ къафэгушIуагъ, мыщ фэдэ зэнэкъокъухэм мэхьэнэ ин зэряIэр къыхигъэщыгъ.
ЩыIэныгъэм илъэныкъо пстэури IэпэIэсэныгъэ хэлъэу къызэдырагъэубытызэ журналистхэр зэнэкъокъум зэрэхэлажьэхэрэр шIукIэ афилъэгъугъ. Темэ шъхьа­Iэу хэушъхьафыкIыгъэ дзэ операциер зэрэкIорэм фэгъэхьыгъэу къэбарлъыгъэIэс амалхэм къыхаутыхэрэм ыкIи телевидениемкIэ къагъэлъагъохэрэм уасэ къафишIыгъ. Ащ дакIоу, къыткIэ­хъухьэрэ лIэужхэм яхэгъэгу шIу алъэгъоу пIугъэнхэм, дзэ къулыкъум зыщамыдзыеным афэ­гъэхьыгъэ тхыгъэхэр ыкIи къэ­гъэлъэгъонхэр нахьыбэ зэра­шIын фаем анаIэ тыраригъэдзагъ. Къи­хьащт илъэсым ахэр лъыгъэ­кIотэгъэнхэ, цIыфхэм къэбарыр икъоу, игъэкIотыгъэу алъыгъэ­Iэсыгъэн зэрэфаер къыкIигъэ­­тхъыгъ.
Лъэныкъоу «Патриот» зыфи­IорэмкIэ апэрэ чIыпIэр республикэ гъэзетэу «Советскэ Адыгеим» ижурналистэу Валерия Ломешинам, ятIонэрэр гъэзетэу «ЗыкIыныгъэм» иредактор шъхьаIэу Пхъэ­чыяшIэ Суандэ ыкIи ящэнэрэ чIыпIэр «Адыгэ макъэм» иIофы­шIэу Хьабэхъу Иринэ афагъэшъошагъэх.
ТелерадиокъэтынхэмкIэ къахэщыгъэхэр телерадиокомпаниеу «Адыгеим» тематическэ къэтынхэмкIэ къулыкъум иотдел ипащэу ТIэшъу Светланэ, Мые­къопэ телевидением иIофышIэу Андрей Грюнер, телерадиокомпаниеу «Адыгеим» адыгабзэкIэ къыдэкIырэ тематическэ къэтынхэмкIэ программэм изещакIоу Тхьар­къохъо Аминэт.

«Адыгеир зэдытиун» зыфиIорэ лъэныкъом апэрэ чIыпIэр къыщыфагъэшъошагъ гъэзетэу «Майкопские новости» зыфиIорэм иобозревателэу А. Колядинам, ятIонэрэ хъугъэ «Кошехабльские вести» зыфиIорэм пшъэ­дэкIыжь зыхьырэ исекретарэу Бэлокъо Риммэ, ящэнэрэ чIыпIэр гъэзетэу «ЗыкIыныгъэм» иIофы­шIэу Устэкъо Маргаритэ къылэжьыгъ.
Теле ыкIи радиокъэтынхэмкIэ КъТРК-у «Адыгеим» тематическэ къэтынхэмкIэ иотдел ипащэ игуа­дзэу Къудаикъо Алый апэрэ чIыпIэр къыдихыгъ. ЯтIонэрэ хъугъэ гъэзетэу «Кошехабльские вести» зыфиIорэм ипащэ игуадзэу Хъуп­сэрэкъо Нэфсэт, ящэнэрэ чIыпIэр радио къэтынхэмкIэ отделым ипащэу Тыгъужъ Саният фагъэшъошагъ.
Лъэныкъоу «Стоп, коррупция!» зыфиIорэмкIэ хагъэунэфыкIырэ чIыпIэхэр къыдахыгъэх гъэзетэу «Советскэ Адыгеим» иобозревательхэу Елена Марковам ыкIи Дмитрий Кизяновым, гъэзетэу «Майкопские новости» зыфиIорэм иобозревателэу Вера Корниенкэм. ТелекъэтынхэмкIэ журналистхэу Евгения Федосеевар, Хьаткъо Иринэ, Браукъо Вячеслав текIоныгъэхэр къыдахыгъэх.
КIарэ Фатим.