Лъэс зекIонымкIэ Урысыем ичемпионат текIоныгъэр къыщыдэзыхыгъэхэм зыщафэгушIогъэхэ мэфэкI зэхахьэ Мыекъуапэ игупчэу Лениным ыцIэ зыхьырэм щыкIуагъ.

Мы илъэсым чъэпыогъум ыкIэм Iофтхьабзэу «ЗекIорэ цIыфыр – 2025-рэ» зыфиIорэм изэфэхьысыжьхэр ашIыгъэх. Мыщ къэралыгъом ишъолъыр зэфэшъхьафхэм ащыпсэурэ нэбгырэ мин 65-м ехъу хэлэжьагъ, ахэр командэ мини 2,5-рэ хъущтыгъэх.
Зэнэкъокъум илъэныкъоу «Муниципальнэ командэхэр» зыфи­Iорэм Адыгэ Республикэр къы­щызыгъэлъэгъогъэ «Мыекъуапэ 01-м» ящэнэрэ чIыпIэр къыфагъэ­шъошагъ. Бзаго Рустам зипэщэ купым нэбгырэ 23-рэ хэтыгъ. Зызыушэтыгъэхэм пшъэрылъэу яIагъэр мафэ къэс лъэбэкъу мин 25-м нахь мымакIэу къакIуныр ары. Шъолъырым икъэлэ шъхьаIэ икомандэ 2023-рэ илъэсым ящэнэрэ чIыпIэр къыдихыгъ, 2024-м ятIонэрэ хъугъэ. Мызыгъэгуми текIоныгъэр къыдихы­шъугъэп, ау ащ пэблэгъагъ.

Командэу «Мыекъуапэ 01-м» хэтыгъэхэм къалэжьыгъэ кубокыр, дипломхэр, медальхэр аратыжьыгъэх. Джащ фэдэу ахэм респуб­ликэм икъэлэ шъхьаIэ физическэ культурэмкIэ ыкIи спортымкIэ и Комитет шIухьафтынхэр афишIыгъэх.