КIыкI Артур Адыгэ Республикэм экономикэ хэхъоныгъэмкIэ ыкIи сатыумкIэ иминистрэ ипшъэрылъхэр ыгъэцэ­кIэнхэу зэрагъэнэ­фагъэм фэгъэхьыгъэ Указым Адыгеим и ЛIышъхьэу КъумпIыл Мурат кIэтхэжьыгъ.

АР-м и Правительствэ зычIэт унэм Адыгеим и ЛIышъхьэ щыIукIагъ министрэм ипшъэрылъхэр зыгъэцэкIэнхэу агъэнэфагъэм ыкIи пшъэрылъэу къулыкъум къыпыщылъхэр къыгъэнэфагъэх. ЗэдэгущыIэгъум хэлэжьагъэх АР-м иминистрэхэм я Кабинет и Тхьаматэу КIэрэщэ Анзаур, министрэхэм я Кабинет и Тхьаматэ игуа­дзэу ЛIыхэсэ Махьмуд, АР-м и ЛIышъхьэрэ иминистрэхэм я Кабинетрэ я Администрацие къэралыгъо къулыкъумкIэ ыкIи кадрэ политикэмкIэ и ГъэIорышIапIэ ипащэу Бэгугъэ Азэмат.
АР-м иминистрэхэм я Кабинет и Тхьаматэу КIэрэщэ Анзаур къызэриIуагъэмкIэ, республикэм экономикэ хэхъоныгъэмкIэ ыкIи сатыумкIэ и Министерствэ министерствэ шъхьа­Iэхэм зыкIэ ащыщ. Ащ ипшъэрылъхэм къахеубытэх мэхьанэшхо зиIэ лъэныкъохэр: инвестициехэр нахьыбэ шIыгъэнхэр, энергетикэм хэхъоныгъэ егъэшIыгъэныр, промышленнэ кIуа­чIэхэм ахэгъэхъогъэныр, продукцием иIугъэкIынкIэ ыкIи икъэщэфынкIэ къэралыгъо политикэр пхырыщыгъэныр.
Адыгеим и ЛIышъхьэ къызэрэхигъэщыгъэмкIэ, мы министерствэм пшъэрылъ шъхьаIэу иIэм нэмыкIэу федеральнэ Iофтхьабзэхэр зэкIэ гъэ­цэкIэгъэнхэм, 2030-рэ илъэсым нэс республикэм социальнэ-экономикэ хэхъоныгъэу ышIыщтым и Стратегие пхырыщыгъэным ахэлэжьэщт.
«Къулыкъум ыпашъхьэ пшъэрылъы­бэ ит. Ау ащ дакIоу ыгъэфедэн фэе къэкIуапIэхэри, амалхэри иIэх. Ахэм зыкIэ ащыщ Тэхъутэмыкъое районым щагъэпсырэ паркыр, резидентхэм япхыгъэ IофшIэныр непэ ащ щагъэцакIэ. Джащ фэдэу IофшIэпIэ чIыпIа­кIэхэр щыIэх, хэбзэIахьхэр бюджетым
ехьэх, бизнес Iофри лъэкIуатэ. Рес­публикэм щыпсэухэрэр шъолъырым джыри нахь псынкIэу хэхъоныгъэ ышIыным щэгугъых, тапэкIэ нахь псынкIэу тызэрэлъыкIотэщтым тыдэлэжьэн фае», — къыIуагъ КъумпIыл Мурат.
Республикэм и ЛIышъхьэ къыгъэнэфэгъэ пшъэрылъхэр зэшIохыгъэнхэм пае шIэныгъэу иIэри, IофшIэнымкIэ гъэсэныгъэу IэкIэлъ хъугъэри зэригъэфедэщтхэмкIэ КIыкI Артур къыгъэгугъагъэх. Республикэм иэкономикэ иIофхэм язытет хэшIыкI зэрэфыриIэр, федеральнэ пащэхэм зэпхыныгъэу адыряIэм, АР-м и ЛIышъхьэ, республикэм иминистрэхэм я Кабинет и Тхьаматэ игъоу алъэгъухэрэм атетэу иIофшIэн зэригъэ­псыщтыр къыхигъэщыгъ.
ШъушIэным пае: КIыкI Артур Юныс ыкъом сэнэхьатэу «Экономикэмрэ предприятием иIофхэм ягъэзекIонрэ» зыфиIорэмкIэ Адыгэ къэралыгъо университетыр къыухыгъ. 2002-рэ илъэсым IофшIэныр ригъэжьагъ, рес­публикэм ипредприятиехэм пэщэ IэнатIэхэр ащиIыгъыгъэх. 2014-рэ илъэсым къыщыублагъэу АР-м экономикэ хэхъоныгъэмкIэ ыкIи сатыумкIэ и Министерствэ Iоф щишIагъ, анахьэу зыфэгъэ­зэгъагъэр инвестициехэр, предпринимательствэр, сатыур, гъэстыныпхъэ-энергетическэ комплексыр ары. Аужырэ илъэсихым Адыгэ Республикэм предпринимательствэм IэпыIэгъу етыгъэнымкIэ и Гупчэ ипэщэ IэнатIэ ыIыгъыгъ.
АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.