ИлъэсыкIэ мэфэкIхэм ялъэхъан цIыфхэр жъугъэу зыщызэрэугъоирэ чIыпIэхэм террористическэ актхэр ащызэрамыхьанхэмкIэ амалхэм, транспорт инфраструктурэм ипсэуалъэхэр зэрэухъумагъэхэм, терроризмэм пэшIуекIорэ чIыпIэ комиссиехэм Iофэу ашIагъэм, политическэ, социальнэ-экономическэ Iофхэр зэрауплъэкIухэрэм ыкIи нэмыкI Iофыгъохэм щатегущыIагъэх АР-м терроризмэм пэшIуекIогъэнымкIэ икомиссиерэ иоперативнэ штабрэ язэхэсыгъо.

ЩынэгъончъэнымкIэ Федеральнэ къу­лыкъум АР-мкIэ и ГъэIорышIапIэ ипащэу Михаил Кемеровым зэхэсыгъор зэрищагъ. Iофтхьабзэм хэлэжьагъэх АР-м и Къэралыгъо Совет — Хасэм и Тхьаматэу Владимир Нарожнэр, министрэхэм я Кабинет и Тхьаматэу КIэрэщэ Анзаур, федеральнэ инспектор шъхьаIэу Сергей Дрокиныр, хэбзэухъумэкIо, уплъэкIокIо къулыкъухэм япащэхэр, министрэхэм я Кабинет хэтхэр, муниципалитетхэм япащэхэр.
АР-м хэгъэгу кIоцI IофхэмкIэ иминистрэ ипшъэрылъхэр пIалъэкIэ зыгъэцэкIэрэ Лъэустэнджэл Махьмуд зэхэсыгъом къызэрэщиIуагъэмкIэ, илъэсыкIэ мэфэкIхэм ялъэхъан терроризмэм пэшIуекIорэ амалхэр зэкIэ къулыкъум зэрихьащтых. Мы лъэныкъомкIэ къулыкъу зэфэшъхьафхэм зэпхыныгъэ зэдыряI, къэбарлъыгъэIэс амалхэмрэ интернет хъытыухэмрэ къарыхьэрэ материалхэр зэхафых, оперативнэ-пэшIоры­гъэшъ Iофтхьабзэхэр зэхащэх. Хабзэр амыукъоным ыкIи цIыфхэм ярэхьатныгъэ къэухъумэгъэным атегъэпсыхьагъэу АР-м хэгъэгу кIоцI IофхэмкIэ и Министерствэ, Росгвардием АР-мкIэ и Гъэ­IорышIапIэ, унэе ухъумэкIо предприятиехэм яIофышIэ мин фэдизмэ, народнэ дружинэхэм ахэтхэм Iоф ашIэщт. ЗекIонымкIэ псэуалъэхэм якъэухъумэни нахь агъэлъэшыщт.
Росгвардием АР-мкIэ и ГъэIорышIапIэ ипащэу Дмитрий Зима мэфэкI мафэхэм яIофышIэхэр къулыкъум ихьын зэрэфэхьазырхэр къыIотагъ. Къулыкъу зэфэ­шъхьафхэм якомиссиехэм цIыфхэр жъугъэу зыщызэрэугъоирэ чIыпIэ 22-р куп-купэу республикэм зэрэщызэтыраутыгъэр хагъэунэфыкIыгъ.
Урысыем ошIэ-дэмышIэ IофхэмкIэ и Министерствэ АР-мкIэ и ГъэIорышIэпIэ шъхьаIэ ипащэу Станислав Илющенкэр илъэсыкIэ, рождественскэ мэфэкIхэр зыщыкIощт псэуалъэхэмкIэ къулыкъум АР-м гъэсэныгъэмрэ шIэныгъэмрэкIэ и Министерствэ, культурэмкIэ Министерствэм, Мыекъуапэрэ Адыгеимрэ яепархие, муниципалитетхэм яадминистрациехэм игъо афилъэгъугъэхэм къатегущыIагъ. МэшIоустхъохэр зыщыдафыенхэ алъэкIыщт чIыпIэхэр зэрауплъэкIущтхэр, пиротехническэ пкъыгъохэр амыгъэнэфэгъэ чIыпIэхэм ащызыщэхэрэр зэрагъэ­пщынэщтхэр къыхагъэщыгъ.
Транспорт инфраструктурэм ипсэуа­лъэхэмрэ транспортымрэ террористическэ актхэр ащызэрамыхьанхэм фэшI ашIэрэр къыIотагъ АР-м псэолъэшIынымкIэ, транспортымкIэ, псэупIэ-коммунальнэ, гъогу хъызмэтымкIэ иминистрэ игуадзэу Лафышъэ Рэмэзан.
Мыекъуапэ имэшIокугъогу вокзалрэ иавтовокзалрэ ащызэхащэгъэ Iофтхьабзэхэр шъхьафэу ащ къыхигъэщыгъэх. Мы чIыпIэхэм стационар гъучI детектор­хэр, видеохэр ащагъэуцугъэх, цIыфхэмрэ ахэм яIалъмэкъхэмрэ зэрауплъэкIурэ Iэмэ-псымэр ачIэт, чэщи-мафи ахэр къаухъумэх. Вокзалхэм япащэхэм игъо афалъэгъугъ мэфэкI мафэхэм ялъэхъан зэрэзекIонхэ фаемкIэ яIофышIэхэм джыри зэ адэгущыIэнхэу, видеокамерэхэм автобусхэми, къэуцупIэхэми Iоф ащашIэным иамал зэхащэнэу. Федеральнэ, республикэ мэхьанэ зиIэ гъогухэм ателъ лъэмыджи 133-р зэраухъумэхэрэми ягугъу мыщ къыщашIыгъ.
Терроризмэм пэшIуекIогъэнымкIэ комиссием иаппарат ипащэу ЛIые Азэмат терроризмэм пэуцужьырэ муниципальнэ комиссиехэм яIофшIэн нахь дэгъоу зэрэзэхащэн, политическэ, социальнэ-экономическэ мэхьанэ зиIэ Iофхэм яуплъэкIун нахьышIоу зэрэрагъэкIокIын фаер зэхэсыгъом къыщи­-Iуагъ.
«Терроризмэм пэшIуекIорэ комиссием ышIыгъэ унашъохэм адиштэу илъэсыкIэ, рождественскэ мэфэкIхэм яхэгъэ­унэфыкIын епхыгъэ Iофхэр зэрахьанхэ фае. Адыгеим и ЛIышъхьэ а Iофыгъохэм ышъхьэкIэ гъунэ алъефы. СиIофшIэгъу­хэр, пшъэрылъэу къышъуфашIыгъэхэр икъоу жъугъэцэкIэнэу сышъолъэIу», —къыIуагъ Михаил Кемеровым зэхэсыгъом икIэухым.