Адыгеим и ЛIышъхьэу КъумпIыл Мурат обществэу «Рос­сети Юг» зыфиIорэм и Генеральнэ пащэ игуадзэу, а обществэм икъутамэу «Кубань­энерго» иIэшъхьэтетэу Эдгар Армаганян АР-м и Правительствэ зычIэт унэм зэIукIэгъу щыдыриIагъ. Республикэм иэнергетическэ комплекс ихэхъоныгъэкIэ Iофыгъоу щыIэхэм ахэр атегущыIагъэх.

ЗэдэгущыIэгъум хэлэжьагъэх АР-м иминистрэхэм я Кабинет итхьаматэу КIэрэщэ Анзаур, ащ игуадзэу ЛIыхэсэ Махьмуд, предприятиеу «Адыгэ электрическэ сетьхэр» зыфиIорэм ипащэу Дмитрий Рязанцевыр.
КъумпIыл Мурат купэу «Россети» зыфиIорэм дыряIэ зэдэлэжьэныгъэм икIэуххэм уагъэрэзэнэу зэрэщытыр къыхигъэщыгъ ыкIи республикэм энергием ылъэныкъокIэ ифэныкъоныгъэхэм къакIегъэчыгъэнымкIэ тапэкIэ зэшIуахыщт Iофтхьабзэхэр къыгъэнэфагъэх.
«Россетьхэм» яинвестиционнэ политикэ ишIуагъэкIэ Адыгеим иэнергетическэ инфраструктурэ нахь зэтегъэпсыхьагъэ мэхъу. ПсэолъакIэхэр электросетьхэм нахьыбэу апышIагъэ мэхъух. Рес­публикэм хэхъоныгъэшIухэр зэришIы­хэрэм ар изы нэшан. Экономикэм зиушъомбгъунымкIэ, инвестициехэр нахьыбэ шIыгъэнхэмкIэ гухэлъыбэ тапэ илъ. Арышъ, республикэм иэнергосистемэ тапэкIи хэхъоныгъэ егъэшIыгъэныр апшъэрэ мэхьанэ зэттырэ пшъэрылъхэм ащыщ. Адыгеир ыпэкIэ лъыкIотэнымкIэ ыкIи цIыфхэм ящыIакIэ нахьышIу шIыгъэнымкIэ амалышIухэр ащ къетых», — къыхигъэщыгъ КъумпIыл Мурат.
Адыгеим энергетикэм ылъэныкъокIэ амалэу иIэхэм нахь заушъомбгъунымкIэ, инвестициехэр нахьыбэ хъунхэмкIэ, проект инхэу къытпыщылъхэр — зыгъэ­псэфыпIэу «Лэгъонакъэрэ» псэупIэу Инэм щагъэпсырэ промышленнэ шъолъы­рымрэ яшIын лъыгъэкIотэгъэнымкIэ «Кубаньэнергэм» дытиIэ зэдэлэжьэныгъэм зегъэушъомбгъугъэным мэхьанэшхо иI.
«Энергием икъэкIуапIэхэр гъэцэкIэ­жьы­гъэнхэмкIэ, кIэхэр шIыгъэнхэмкIэ компанием IофшIэнхэр Адыгеим щылъе­гъэкIуатэх, ащ амал къеты энергием икъэкIуапIэхэм псэолъакIэхэр апышIэгъэнхэмкIэ. ТапэкIи тынаIэ тедгъэтыщт инвестиционнэ программэр республикэм щыгъэцэкIэгъэным, ащ пае республикэм ихэбзэ къулыкъухэм шIуагъэ къэзытырэ зэдэлэжьэныгъэ адытиIэным, зэдытие пшъэрылъхэр зэшIохыгъэнхэм тадэлэ­жьэщт», — къыхигъэщыгъ Эдгар Армаганян.
Обществэу «Кубаньэнерго» ипащэ къызэриIуагъэмкIэ, 2025-рэ илъэсым къутамэм зэзэгъыныгъэ минитIум ехъу ыгъэцэкIагъ, ахэр зэпхыгъагъэхэр технологическэу мегаватт 39-рэ зиIэ псэуалъэхэр къыпышIэгъэнхэр ары. Джащ фэдэу мы илъэсыр къызихьагъэм къыщегъэжьагъэу подстанцие 60-мэ яэнергооборудование гъэцэкIэжьыгъэ хъугъэ ыкIи техникэм ылъэныкъокIэ зэтырагъэ­псыхьагъэх.