Адыгеим щыпсэурэ цIыф лъэпкъхэм язэныбджэгъуныгъэ фэгъэхьыгъэ барельефхэр Мэздэхэ дэкIояпIэм тырагъэуцуагъэх.

ЗыгъэпсэфыпIэу «Мэзда­хэм» изэтегъэпсыхьан изы Iахьэу ар хъугъэ. Адыгеим и ЛIышъхьэу КъумпIыл Мурат къызэритыгъэмкIэ, метрэ 45-рэ зикIыхьэгъэ дэкIояпIэм барельефипшI тырагъэуцуагъ. Ахэм къырагъэлъэгъукIы шъо­лъырым лъэпкъ зэгурыIоныгъэу, зэныбджэгъуныгъэу илъыр ыкIи икультурнэ кIэн.
— Мы проектыр Мыекъуапэ зекIонымкIэ итеплъэ зыкI гъэпсыгъэнымкIэ IофшIэнышхоу зэшIотхырэм изы Iахь. Ащ дэлэжьагъэх скульптор, гъэчъэкIо Iазэхэр. Ахэм ащыщых Урысыем культурэмкIэ изаслуженнэ IофышIэу, Адыгеим изаслуженнэ сурэтышIэу Бырсыр Абдулахь ыкIи Урысыем исурэтышIхэм я Союз хэтэу, скульпторэу Даур Аслъан, — къыIуагъ КъумпIыл Мурат.
ЧIыпIэм изэтегъэпсыхьанкIэ IофшIэнхэр лъагъэкIуатэх. Джырэблагъэ архитектурнэ гъэнэфыным тегъэпсыхьэгъэ псэуалъэхэр агъэуцущтых ыкIи барельеф пэпчъ къыриIотыкIырэм фэгъэхьыгъэ къэбарымрэ QR-кодхэмрэ атырагъэуцощтых яплъыхэрэмкIэ нахь гъэшIэгъон хъунхэу.
ЗыгъэпсэфыпIэу «Мэздахэр» Мые­къуапэ щыпсэухэрэмрэ ихьакIэхэмрэ анахь якIасэхэм ащыщэу зэрэщытыр ЛIышъхьэм къыхигъэщыгъ.
— Мы чIыпIэр гуIэтыпIэ хъуным имыза­къоу, шIэныгъэкъэкIуапIэу щытыными тыпылъ титарихъ, тикультурэ, лъэпкъэу Ады­геим щыпсэухэрэм азыфагу гуфэбэныгъэу илъыр къыщидгъэлъэгъукIынхэм пае, — къыкIигъэтхъыгъ КъумпIыл Мурат.