ЦIыфлъэпкъым къин макIэп пэкIэкIыгъэр, гуимыкIыжь хьа­забыгъ Хэгъэгу зэошхоу 1941 — 1945-рэ илъэсхэм чIыгур зылыбжьагъэу, нэбгырэ миллион 26-м ехъу зыхэкIо­да­гъэу, лъыр псыхъоу зыщычъагъэр. Ау тинасыпкIэ ТекIо­ныгъэшхор советскэ народым къыдихыгъ.

«Узэкъотмэ, улъэш» аIуагъ цIыфхэм. Тизэкъотныгъэ-зэдеIэжь, тищэIэгъэ мыухыжь, типсэемыблэжьныгъэ, шIулъэ­гъоу ти Хэгъэгушхо фытиIэм мамырныгъэм, шъхьафитныгъэм тыкъыфащэжьыгъ.
Мы илъэсэу икIырэмкIэ журналэу «Зэкъошныгъэм» ия 4-рэ номерэу къы­дэкIыгъэр къызэIуехы Хьабэхъу Иринэ итхыгъэу «Нэхэе Даут. Ацумыжъ Айдэмыр» зыфиIорэм.
МэщбэшIэ Исхьакъ ироманыкIэу охътищыр зэзыпхырэр — «Неп. Тыгъуас. Неущ» зыфиIорэм изы Iахь мыщ къыдэхьагъ.
ГъукIэлI Нурбый ипоэмэу «Нарт Пэтэрэз», Дэрбэ Тимур иповестэу «Туманбый», Къуекъо Асфар итхыгъэу «Жьыбгъэмрэ лIыжъ губзыгъэмрэ» зыфиIорэ трилогием щыщ пычыгъор, Сихъу СултIан иповестэу «Зыгъэгус», Хьакъунэ Заремэ ирассказэу «Насыпым игухьарэхэр» «Зэкъошныгъэм» къыдэхьагъэх, художественнэ тхыгъэхэр зикIасэхэр ахэм агъэгушIощтых.
Журналым чIыпIэ щагъотыгъ лъэп­къым ицIыф инхэм афэгъэхьыгъэ тхыгъэхэм: Мамырыкъо Нуриет истатьяу «УагурыIонымрэ къыпфэныкъонхэмрэ насыпыгъ» зыфиIорэр шIэныгъэлэжьышхоу ХъутIыжъ Кимэ Къэншъао ыкъом фэгъэхьыгъ.
Шъхьэлэхъо Светланэ итхыгъэу «ИшIу­шIагъэ къытхэт» зышъхьэр зыфэгъэ­хьыгъэр Псэйтыку щыщэу Бастэ Аскэр (щыIэжьэп) А. С. Пушкиным иусэ-­романэу «Евгений Онегиныр» адыга­бзэкIэ зэрэзэридзэкIыгъэр ары.
ШIэныгъэлэжьэу ЖакIэмыкъо Заримэ истатьяу тхакIоу Пэнэшъу Сэфэр фэ­гъэхьыгъэр, юбилярхэу Мэхъош Рус­лъан, Хъалыщ Сэфэрбый яхьылIэгъэ тхыгъэ кIэкIхэр, ШэкIо Мирэ усакIоу, шIэныгъэлэжьэу ЩэшIэ Щамсэт иилъэс 75-рэ ехъулIэу ытхыгъэр, шIэныгъэлэжьэу Цуекъо Нэфсэт адыгэ IорIуатэмкIэ «ТхыдэIуат» зыфиIоу къыгъэхьазырыгъэр къыдэхьагъэх.
Тхылъеджэныр зикIасэхэм журналым гъэшIэгъоныбэ дагъотэщт.
Мамырыкъо Нуриет.