Транспортым игъэ­кIэ­жьын ыкIи зыпхы­рыкIырэ чIыпIэхэм язегъэушъомбгъун, гъогууанэхэу зэрыкIощтыр нахь тэрэзэу къыхэхыгъэныр ыкIи гъогурыкIоныр щынэ­­гъон­чъэныр — лъэныкъо шъхьэIэ пстэу­ми яхэхъоныгъэкIэ, шъолъы­рыр инвестициехэм якъы­хэлъхьанкIэ, зекIохэмкIэ хъопсапIэу зэрэщытым зы­къегъэIэтыгъэнымкIэ лъапсэх. Мы гупшысэр къащыриIотыкIыгъ Адыгеим и ЛIышъхьэ социальнэ нэкIубгъохэм.

Зигугъу къышIыгъэхэр яIэубытыпIэхэу гъогухэм ренэу анаIэ зэрэтетыр ащ къыхигъэщыгъ. Лъэпкъ проектэу «ШэпхъэшIухэм адиштэрэ гъогу щынэгъончъэхэр» зыфиIорэр пхыращы зэхъуми, 2025-рэ илъэсым Адыгеим лъэпкъ проектыкIэр зыщагъэцэкIэ лъэхъанми Адыгеир гъогу хъызмэ­тымкIэ анахь дэгъухэм ясатыр хэт зэпыт.

«Мы илъэсым лъэпкъ проектэу «ЩыIэныгъэм пае инфраструктурэр» зыфиIорэм къыдыхэлъытагъэу республикэм лъэмыджи 5 щыдгъэцэ­кIэ­жьыгъ. Ахэм, яIухьапIэхэри зэрахэтэу, зэкIэмкIи метрэ 900 фэдиз якIыхьагъ. Псэолъэ пстэуми псэолъэшI IофшIэнхэр арашIылIэхэ зэхъум лъэ­хъаным диштэрэ шIыкIэхэу зэрэлэжьэщтхэ пIалъэмрэ гъогурыкIоныр щынэгъончъэным­рэ яхэгъэхъон къыздыхэ­лъы­тагъэхэр агъэфедагъэх», — къытхыгъ КъумпIыл Мурат.

Шапхъэхэм адырагъэштэ­жьыгъэх:

• Кощхьэблэ районым ипсэупIэхэу Майскэмрэ Натырбыерэ азыфагу рыкIорэ гъогум илъэмыджэу псыкIуапIэм телъыр;
• Мыекъопэ районым ипсэупIэхэу Дагестанскэмрэ Къурджыпсрэ азыфагу дэлъ гъогум илъэмыджэу псыхъоу Працюха телъыр;
• Красногвардейскэ районым ипсэупIэхэу Некрасовскэмрэ Хьатикъуаерэ ягъогукIэ псыхъоу Псынэф телъ лъэмыджыр;
• Джэджэ районым ипсэупIэу Дондуковскэм дэжь псыхъоу Фарзэ телъ лъэмыджыр;
• Тэхъутэмыкъое районымкIэ гъогоу Яблоновскэр — Шапсыгъэ псыIыгъыпIэм идамбэ илъэмыджэу Чибийскэ псырыкIуапIэм телъыр.

«ЩыIэныгъэм пае инфраструктурэр» зыфиIорэ лъэпкъ проектым къыдыхэлъы­тэгъэ IофшIэнхэу 2025-рэ илъэсым телъытагъэхэр аухыгъэх.
Лъэмыджхэм ягъэцэкIэжьын имыза­къоу, мыгъэ шъолъыр ыкIи муниципальнэ мэхьанэ зиIэ гъогухэр, общественнэ транспортыр агъэкIэжьыгъэх, гъогурыкIоным ишапхъэхэр зыукъохэрэр къэзыгъэлъэгъорэ камерэхэр агъэуцугъэх. Лъэпкъ проектым игъэцэкIэн телъытагъэу мы илъэсымкIэ аухэсыгъэ пстэури, 2026-мкIэ агъэнэфагъэхэм ащыщхэри зэшIуахыгъ.
ЦIыфхэмкIэ анахь мэхьанэшхо зиIэхэм ащыщ хъугъэ Мыекъопэ районымкIэ гъогоу Краснооктябрьскэр — Дагестанскэр зыфиIорэм изы Iахьэу километри 5,9-рэ зикIыхьагъэр. Гъогур еджапIэм блэкIы — псэупIэу Краснооктябрьскэм игъэсэныгъэ гупчэу N 2-м. Джащ пае гъэцэкIэжьын закъокIэ къэмыуцухэу кIэлэцIыкIухэм ящынэгъончъагъи агъэлъэшыгъ: лъэсрыкIо зэпырыкIыпIэ фашIыгъ, нэфрыгъуазэр, сабый теплъэ зиIэ пкъыгъохэр тырагъэуцуагъэх, IэрышI зэщимызхэр фашIыгъэх, лъэсэу зыщыкIохэрэр къашIыхьагъ.
Мыекъуапэ имуниципальнэ гъогу псэолъи 7 агъэкIэжьыгъ зэкIэмкIи километри 3 икIыхьагъэу, джащ фэдэу 2026-рэ илъэсым ашIэнэу щытыгъэхэм ащыщэу Гоголым ыцIэ зыхьырэ урамым иIахьэу метрэ 900 зикIыхьагъэр агъэцэкIэжьыгъ.
ПсэупIэу Яблоновскэм гъогуиплIымэ яIахьхэр километри 3-м ехъу якIыхьагъэу зэтырагъэуцожьыгъэх. ПсэолъэшI IофшIэнхэр зэшIуахыхэ зэхъум светодиод нэфынэу, ощхыпсыр дезыщэхэу, гъогубгъу мыжъохэу лъэхъанэм диштэ­хэрэр къыдыхалъытагъэх; урамхэм ялъэныкъуитIуи лъэсрыкIо гъогухэмкIэ зэтырагъэпсыхьагъэх, унэе щагу дэхьапIэхэри агъэкIэжьыгъэх.
КъумпIыл Мурат къызэрэхигъэщыгъэм­кIэ, зэкIэмкIи мы илъэсым шапхъэхэм шъолъыр гъогу псэолъэ 27-рэ адырагъэ­штэжьыгъ зэкIэмкIи километрэ 74-м ехъу якIыхьагъэу, ащ сомэ миллиарди 2,7-рэ апэIухьагъ.