Адыгеим иIэпэIасэхэм яIэшIагъэхэр Москва къыщагъэ­лъэгъуагъэх. Художественнэ лъэпкъ IэшIагъэхэмкIэ къэгъэлъэгъон-ермэлыкъэу «Ладья. Зимняя сказка» зыфиIоу къэралыгъом икъэлэ шъхьаIэ щыкIуагъэм ахэр хэлэжьагъэх. Дышъэ идагъэмкIэ яIофшIагъэхэр ащ къыщагъэлъэгъуагъэх IэпэIасэхэу Сет Сафиет, Джарымэкъо Зурет ыкIи Мыгу Рузанэ.

Iофтхьабзэм хэлэжьагъэхэр къэралыгъом ишъолъыр пстэуми къарыкIыгъэх. IэпэIэсэ нэбгыришъэ пчъагъэмэ апае къэгъэлъэгъопIэ инитIумэ Iоф ашIагъ. Фарфорым, апчым, бжъэм, пхъэм, цым, Iуданэм ыкIи нэмыкIхэм ахэшIыкIыгъэ пкъыгъо мин пчъагъэу къырахьылIагъэр нэм фэплъэкIыщтыгъэп. ИлъэсыкIэ мэфэкIыр къызэрэблагъэрэм къыхэкIэу IофшIагъэхэм янахьыбэр ащ фэгъэхьыгъагъ. Шъолъыр пэпчъ ежь игъэлъэгъуапIэ иIэу гъэпсыгъагъ. Адыгеир ичIыпIэ дышъэ идагъэмкIэ къахэщыщтыгъ. Дышъэ IуданэкIэ шIыгъэ ыкIи хэдыкIыгъэ гъэдэхалъэхэр, адыгэ лъэпкъ шъуашэм инэшанэхэр зыхэлъ щыгъынхэр, тхыпхъэхэр зыхэдыкIыгъэ Iалъмэкъхэр, шъхьэрыхъонхэр ащ къыщыгъэлъэгъо­гъагъэх.

— Шъыпкъэр пIощтмэ, мы къэгъэлъэгъоным бэшIагъэ тызхэмылэжьагъэр, илъэс зытфых фэдиз хъугъэ. Арышъ, мыгъэ тигуапэу тыкъеблэгъагъ. ТиIэшIагъэхэр ашIогъэшIэгъонхэу, ашIодахэхэу къытэкIуалIэх, зэрытшIыгъэ шIыкIэм, зыхэтшIыкIыгъэм къакIэупчIэх. Адыгэ идагъэр зыкIоцI ибзэгъэ Iалъынхэр, тхьакIумпылъхэр лъэшэу агу рехьых. Ахэр гъучIы ашIошIы, ау теIабэхэу зэрэ­Iуданэр къызашIэкIэ, агъэшIагъо. ЕтIанэ, къалэу Торжок идышъэ идагъэ тырагъапшэ. Ари мыщ фэдэ IэшIагъэ­хэмкIэ цIэрыIу. ТишIыкIэхэр зэрагъапшэх, зэтекIыныгъэхэр къыхагъэщых. Тэтыер бэмэ агу нахь рихьэу къытаIо, — къыддэгощагъ УФ-м лъэпкъ IэшIагъэхэмкIэ иIэпэIасэу Сет Сафиет.
ПстэумкIи тхьамафэ фэдизрэ, тыгъэгъазэм и 17 — 21-м, къэгъэлъэгъон-ермэлыкъыр кIуагъэ. Къэралыгъом къыщыдагъэкIыхэрэм яIугъэкIынкIэ IэпыIэгъу афэхъугъэныр, IэпэIасэхэм художественнэ амалэу аIэкIэлъым зыкъегъэIэтыгъэныр ыкIи ар цIыфхэм зэлъягъэшIэгъэныр ипшъэрылъ шъхьаIэу Iофтхьабзэр зэхащэ. Ащ фэшъхьафэу ежь IэпэIасэхэри нэIуасэ зэфэхъух, шIэныгъэхэмкIэ, шIыкIэ амал гъэшIэгъонхэмкIэ зэхъожьых.
Анцокъо Ирин.