Урысыем и ДОСААФ Iоф зишIэрэ илъэс пчъагъэхэм къакIоцI дзэм ыкIи флотым, дзэкъулыкъушIэным афытегъэпсыхьэгъэ IэпэIэсэныгъэ ин зыхэлъ специалист нэбгырэ мин пчъагъэ къыгъэхьазырыгъ. Ахэр щэрыоным, автомобилыр, къухьэлъатэр зэрафэнхэм, парашютым къырепкIэхынхэм зэрафэIазэхэм адакIоу, IофшIэным ыкIи зыкъэухъумэжьыным щыфагъэсагъэх, я Хэгъэгу шIу алъэгъуным фапIугъэх.

Адыгеим и ДОСААФ ныбжьыкIэхэр къулыкъум кIонхэм ыпэкIэ дзэ-учетнэ сэнэхьатхэм зэрафырагъаджэхэрэм «Адыгэ макъэм» зыщигъэгъозагъ. ЦIыфхэр дзэ къулыкъум фэгъэхьазырыгъэнхэмкIэ ыкIи дзэ-патриотическэ пIуныгъэ ягъэгъотыгъэнымкIэ Гупчэм ипащэу Важа Стражевскэм гущыIэгъу тыфэхъугъ.
— Общественнэ-къэралыгъо организациеу ДОСААФ-р цIыфхэр дзэ къулыкъум фэгъэ­хьазэрыгъэнхэмкIэ, дзэ патриотическэ пIуныгъэ ягъэгъотыгъэнымкIэ граждан обществэмрэ УIэшыгъэ КIуачIэхэмрэ зэзыпхыхэрэ лъэныкъоу щыт. Тигупчэ АР-м идзэ комиссариат зэзэгъыныгъэ дыриIэу тызэдэлажьэ. ТиеджапIэ къычIэ­хьащтхэр ащ къыхехых. Ахэр аныбжьыкIэ къатефэу дзэм къулыкъу щызыхьынэу изыхъу­хьэгъэ кIэлэ ныбжьыкIэхэу гурыт еджа­пIэр, техникумыр, училищыр, апшъэрэ еджапIэр къэзыухыхэрэр ары, — еIо Важа Стражевскэм.
Мы уахътэм гъэтхэ дзэ дэщыгъом къыхиубытэщтхэм яугъоин макIо, чъэпыогъум и 1-м гупчэм егъэджэнхэр щырагъэжьагъэх. Мыщ лъэныкъуищкIэ водительхэр къегъэхьазырых.
Дзэ-учетнэ сэнэхьатхэр ягъэгъотыгъэ­нымкIэ Гупчэм амалышIухэр IэкIэлъ. Классищыр компьютерхэмкIэ зэтегъэ­псыхьагъэх, интерактивнэ доскэр, макетхэр ачIэтых. ЗепщэнкIэ щынэгъо гъэстыныпхъэр зыщырагъэхъон алъэкIыщтым фэдэ щагум дашIыхьагъ, зэрэтехьащтхэм, бензиныр е дагъэр зэрэрагъэхъощтым, зэрэрагъэчъыщтым ащ щыфагъасэх. Егъэджэным фэгъэзэгъэ кIэлэегъаджэхэр ыкIи инструкторхэр илъэс пчъагъэ хъугъэу щэлажьэх, IэпэIэ­сэныгъэ дэгъу аIэкIэлъ. Джащ фэдэу шъолъыр ДОСААФ-м и Гупчэ хэушъхьафыкIыгъэ машинэхэр иIэх.
— Мы автомобильхэр дзэ частым къытитыпагъэх. НыбжьыкIэхэм дзэ-учетнэ сэнэхьат зыщызэрагъэгъотырэ тиорганизацие икъутамэхэр Тэхъутэмыкъое, Джэджэ, Кощхьэблэ ыкIи Красногвардейскэ районхэм ащыIэх. УФ-м зыкъэухъумэжьынымкIэ и Министерствэ къытфигъэуцугъэ пшъэрылъыр дгъэцэкIагъэ, республикэмкIэ нэбгыри 137-рэ къэдгъэхьазырыгъ, — хигъэунэфыкIыгъ Гупчэм ипащэ.
Егъэджэн программэр зэрэгъэпсыгъэ­ми тыкIэупчIагъ. ТигущыIэгъу къызэрэхигъэщыгъэмкIэ, УФ-м ихэбзэгъэуцугъэ диштэу ар зэхэгъэуцуагъ ыкIи ащ ылъап­сэр зэкIэ водительхэм афэгъэхьыгъэ къэралыгъо программэр ары. Ау зыкъэу­хъумэжьынымкIэ Министерствэм иунашъо горэхэри тедзэу хагъэхьагъэх. ЗэрэхъурэмкIэ, егъэджэн программэ къызэрыкIор сыхьат 244-м телъытагъэмэ, дзэ-учетнэр — сыхьат 272-м.
— ТиеджакIохэм апэ Гупчэм ушэтынхэр щатых. УФ-м зы­къэухъумэжьынымкIэ и Министерствэ, ДОСААФ-м, дзэ комиссариатым ялIыкIохэр зы­хэхьэрэ дзэ-ушэтын комиссиеу мыщ щызэхэщагъэм уасэ афе­шIы. ГъогурыкIоным ишапхъэ­хэм, автомобилыр зэрэзэрафэшъурэм имызакъоу, ащ изэхэлъы­кIэ хэшIыкIэу фыряIэр еджакIохэм къагъэлъагъо. Нэужым Къэралыгъо автоинспекцием ушэтынхэр щаты­жьых, — къыIуагъ Важа Стражевскэм.
Дзэ-учетнэ сэнэхьатхэм афегъэджэгъэнхэмкIэ зэнэкъокъум Гупчэр зыхэла­жьэм, УФ-м зыкъэухъумэжьынымкIэ и Министерствэ игенералитет осэшIу къыфи­шIыгъ ыкIи материальнэ базэу Адыгеим и ДОСААФ и Гупчэ IэкIэлъыр УрысыемкIэ анахь дэгъухэм ахалъытагъ.
Гупчэм ипащэ къызэриIуагъэмкIэ, амалэу аIэкIэлъхэр шэпхъэ гъэнэфагъэ­хэм адештэ. Ащ ишIуагъэкIэ дзэм фыте­гъэпсыхьэгъэ специалист дэгъухэр къа­гъэхьазырынхэ алъэкIы. ГумэкIыгъо къызхэкIырэ закъор дзэ комиссариатым ныбжьыкIэхэр игъом къафигъэкIонхэ зэримылъэкIырэр ары. Ар къызхэкIырэр кIэлакIэхэр джыри гъэсэныгъэм иучреж­дениехэм зэращеджэхэрэр ары. Егъэ­джэныр нахь Iэрыфэгъуным фэшI пчэдыжьрэ пчыхьэрэ ар афызэхащэу ауб­лагъ.
ЗыкъэухъумэжьынымыкIэ организациер ежь-ежьырэу зызыIыгъыжьхэм ащыщ, зэрифэлъэкIэу ыкIи къэралыгъо субсидиехэр къызфигъэфедэхэзэ ибюджет егъэпсы. Ау хэбзэ къулыкъушIэхэми анаIэ къызэратетыр пащэм къыхигъэщыгъ.
— Республикэм ипащэхэм ятхьылIэрэ Iофыгъо пстэури къыт­фызэшIуахы. Дэщыным зыфэгъэхьазырыгъэным, дзэ-патриотическэ пIуныгъэм япхыгъэ Iоф­тхьабзэхэр редгъэкIокIынхэмкIэ ахъщэкIэ IэпыIэгъу къытфэхъух, — хигъэунэфыкIыгъ Важа Стражевскэм.
НыбжьыкIэхэр дзэ Iофым фэгъэсэгъэн­хэм, дзэм ищыкIэгъэ сэнэхьатхэр ахэм ягъэгъотыгъэнхэм ДОСААФ-м ынаIэ тет, хэбзэшIоу зэрихьэхэрэм укъапкъырыкIымэ, непэкIэ анахь мэхьанэ зиIэ организациеу щыт.
Iэшъынэ Сусан.