Адыгеим и ЛIышъхьэу КъумпIыл Мурат республикэм и Правительствэ зычIэт унэм зэIукIэгъу щыдыриIагъ АР-м цIыфым ифитыныгъэхэмкIэ иуполномоченнэу Михаил Шебанец. Зэдэгущы­Iэгъум хэлэжьагъ АР-м и ЛIы­шъхьэрэ иминистрэхэм я Кабинетрэ я Администрацие ипащэу Владимир Свеженец. 2025-рэ илъэсым уполномоченнэм иаппарат Iофэу ышIагъэм икIэ­уххэмрэ илъэсэу къихьащтым анаIэ анахьэу зытырагъэтыщт пшъэрылъхэмрэ ахэр атегущыIагъэх.

Мыгъэ имэзэ 11 уполномоченнэм иаппарат лъэIу тхылъ 731-рэ къыIэкIэ­хьагъ. Илъэсэу икIыгъэм иджырэ лъэ­хъан егъэпшагъэмэ, фэдитIукIэ ар нахьыб. ЗэкIэ зыфэзгъэзагъэхэм ящыкIэгъэ правовой IэпыIэгъур тхыгъэу е жэрыIоу къаIэкIэхьагъ, зэхэфынхэм, лъэIу тхылъхэм ыкIи нэмыкIхэм язэхэгъэуцонкIэ яшIуагъэ арагъэкIыгъ.
«ЦIыфхэм ялъэIу тхылъхэм Iоф адэпшIэныр унаIэ лъэшэу зытетын фэе ыкIи пшъэдэкIыжь ин зыхэлъ Iофэу щыт. ЦIыфхэм хабзэм ыгъэнэфэгъэ яфедэхэр къэу­хъумэгъэнхэмкIэ анахь мэхьанэ зиIэ амалхэм ар ащыщ. ЗэрищыкIагъэм лъыкIахьэу, зэфагъэ хэлъэу зыкъышъуфэзгъэзэрэ цIыфхэм ялъэIу тхылъхэм япхырыщын шъузэрэдэлажьэрэм бэкIэ елъытыгъэщт цIыфхэми цыхьэу къышъуфашIыщтыр», — къыIуагъ КъумпIыл Мурат.

Адыгеим и ЛIышъхьэ зэIукIэгъум илъэхъан пшъэрылъ къыгъэуцугъ хэушъхьафыкIыгъэ дзэ операцием хэлажьэ­хэрэм ыкIи ахэм яунагъохэм арысхэм ялъэIу тхылъхэм пстэуми анахьэу анаIэ атырагъэтынэу. КъызэрэхигъэщыгъэмкIэ, лъэIу тхылъ 520-м ехъу мы илъэсэу икIырэм а купым хэхьэрэ цIыфхэм къагъэхьыгъ. НахьыбэмкIэ ахэр зэпхыгъэхэр ахъщэу къаратыщтым игъэпсын, къулыкъум ихьын, медицинэ IэпыIэгъур ятыгъэныр, зыдэхъугъэр амышIэу кIодыгъэ дзэкъулыкъушIэхэм якъэгъотын.
Михаил Шебанец къызэрэхигъэщыгъэм­кIэ, ащ фэдэ Iофыгъохэм язэшIохынкIэ АР-м цIыфхэм яфитыныгъэхэр къэухъу­мэгъэнхэмкIэ иуполномоченнэ иаппарат Урысыем зыкъэухъумэжьынымкIэ и Министерствэ, Къыблэ дзэ коим идзэ прокуратурэ, Къащ Плъыжьым и Дунэе комитет, Адыгеим и ЛIышъхьэ, респуб­ликэм иминистрэхэм я Кабинет, депутатхэм, фондэу «Хэгъэгум иухъумакIо­хэр» зыфиIорэм ыкIи нэмыкI къулыкъу­хэмрэ организациехэмрэ гъусэныгъэ адыриI.
Республикэм и ЛIышъхьэ къызэриIуа­гъэмкIэ, Адыгеим щыпсэухэрэм ялъэIу тхылъхэм ежь ышъхьэкIэ уполномоченнэм ынаIэ атыригъэтыным мэхьанэшхо иI. КъумпIыл Мурат къызэрэхигъэщыгъэм­кIэ, цIыфхэм яIофыгъохэр зэшIохыгъэ хъунхэмкIэ ащ фэдэ екIолIакIэм кIэ­ухышIухэр къыздихьыщтых.

АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет