ЦIыф зэрымыс быбырэ пкъыгъо­хэм яоператор сэнэхьатым фырагъэджэщтхэм яугъоин фэгъэ­хьыгъэ пресс-зэIукIэ Мыекъуапэ идзэ комиссариат тыгъуасэ щыкIуагъ. Ар зэрищагъ къалэм идзэ комиссарэу Алексей Санташовым.

Джырэ дзэм мыр анахь ищыкIэгъэ сэнэхьатхэм ащыщ, ащ хэшIыкI фызиIэхэр ары дронхэр зыгъэIорышIэхэрэр, пшъэрылъ шъхьаIэхэр зэшIозыхыхэрэр. Аэроразведкэр зэрехьэ, пыим ипытIапIэхэм алъэплъэ, зыщызэощтхэ чIыпIэр егъэнафэ.
— Мы уахътэм Мыекъуапэ идзэ комиссариат цIыф зэрымыс быбырэ авиацием зэзэгъыныгъэ шIыкIэм тетэу къулыкъу щызыхьыщтхэм яугъоин ригъэ­жьагъ. Нахь игъэкIотэгъэу къэпIон зыхъукIэ, ащ фэдэ пкъы­гъохэм яоператорхэм яегъэ­джэн, нэужым ахэм къулыкъур зэзэгъыныгъэ шIыкIэм тетэу хэушъхьафыкIыгъэ дзэ операцием щылъагъэкIотэныр. УФ-м зыкъэухъумэжьынымкIэ и Министерствэ мэзитIурэ хэушъхьафыкIыгъэ дзэ частым щыригъэджэщтых, — хигъэунэфыкIыгъ Алексей Санташовым.
Мыекъуапэ идзэ комиссар къызэри­IуагъэмкIэ, БПЛА-м иоператор ухъуным шэпхъэ гъэнэфагъэхэр пылъых. Илъэс 18-м къыщегъэжьагъэу 45-м нэс аныбжьын фае (FPV-дронхэр зыгъэIорышIэщтхэм аныбжь илъэс 35-м шIокIы хъущтэп), «базовэ» шапхъэм диштэу ин­джылыбзэр, компьютерыр зэрагъэфедэщтыр ашIэнхэ фае. Зэзэгъыныгъэм зы илъэс пIалъэкIэ кIатхэх, зэтыгъо ахъщэ тынэу сомэ миллиони 2,4-рэ къыратыщт. А пIалъэр зиухыкIэ къэкIожьын ылъэ­кIыщт, шIоигъоныгъэ зиIэм лъигъэкIотэн фит. Джащ фэдэу ипсауныгъэ медицинэ комиссием ыуплъэкIущт, купэу «А-м» ыкIи «Б-м» диштэнхэ фае. Мы уахътэм ехъулIэу нэбгыритIу зэзэгъыныгъэм кIэтхэгъах.
Iэшъынэ Сусан.