Адыгэ Республикэм и Лъэпкъ музей къэгъэлъэгъонэу «Магия камня» зыфиIорэр къыщызэIуахыгъ. Ар музеим чIыопсымкIэ иотдел иIофышIэхэм агъэхьазырыгъ. Отделым ипащэу Довлет Зотовым зэрэкIигъэтхъыгъэмкIэ, Лъэпкъ музеим иугъоигъэу мыжъо лъэпкъ зэфэшъхьафхэр ыкIи минералхэр зыхэлъхэр агъэфедагъ.

Апч хъэгъэ зэпэIутхэм аммонит-мыжъо бзыгъэхэр, септариехэр, илъэси 10 пчъа­гъэм Хьаджыкъо дэтыгъэ заводэу «Русские самоцветы» гипсыр агъэфедэзэ пкъыгъоу щашIыщтыгъэхэр къыщыгъэлъэ­гъуагъэх.
Мы чIыопс баиныгъэхэр — къушъхьэ мыжъо лъэпкъхэр Адыгеим имызакъоу, зэкIэ Темыр Кавказым, Урал, Казахстан ыкIи Якутием къащаугъоигъэх. ЗэкIэмкIи къэгъэлъэгъоным щагъэфедэгъэ къушъ- хьэ мыжъо зэфэшъхьафхэр пчъагъэмкIэ 173-рэ мэхъу, ахэм ащыщэу — 63-р Лъэпкъ музеим ифондхэм къаха­хыгъ.
ЧIыопс баины­гъэ­хэм анахь чIыпIэшхо щызыубытхэрэр мыжъо зэ­фэ­шъхьафхэр ары. Мыхэр зэкIэ шэпхъэ гъэшIэгъонхэр зиIэх, сурэт тхы­хьа­гъэ атет, уащызэкIоцIырэплъы, зэпэ­жъыужьых, нэмыкI шIуагъэу ахэлъри макIэп — уаумэхъы.

ЦIыфэу музеим къакIохэрэр мы деко­ративнэ мыжъохэр лъэныкъуищкIэ зэрагъэфедэхэрэм нэIуасэ фэхъущтых: ювелирнэ Iофым, художественнэ-мыжъобзыгъэ IэшIагъэм ыкIи архитектурэм. Экспо­зицием къыщыгъэлъэгъуагъэх гъэдэхэлъэ ыкIи нэмыкI пкъыгъо кIэракIэхэр, бгъэхалъхьэхэр, Iэлъынышхохэр, нэмыкIхэр. Мыжъом хабзыкIых унагъом щагъэфедэрэ пкъыгъохэр, ахэр шIухьафтын-нэпэеп­лъэу щытых. Декоративнэ мыжъохэр унэ гупэ дэпкъхэр ыкIи унэкIоцIхэр гъэкIэрэкIэгъэнхэм щагъэфедэх.
Къэгъэлъэгъоным иэкспонатхэм мыхэр зышIыгъэхэм IэпэIэсэныгъэшхо зэрахэлъыр къыуагъашIэ. «Магия камня» зыцIэ Iофтхьабзэр анахьэу зытегъэ­псыхьагъэр цIыфхэу чIыопсым идэхагъэ зигунэсхэу, минерал ыкIи мыжъохэр зышIогъэшIэгъонхэр ары. Мыжъохэр ашъокIэ зэрэзэтекIыхэрэм фэдэу, яамалхэмкIи зэтекIых: фабэх, чъыIэх, Iэзэгъух, узыухъумэрэх ыкIи узгъэкIэракIэх.