Мы мэфэ дэдэм АР-м и Лъэпкъ музей къэгъэлъэгъон-проектэу «Флора и фауна мира в марках» зыфиIорэр къыщызэ­Iуахыгъ.
Угъоигъэр зэфэшъхьафыбэу зэхэлъ: маркэхэм атет сурэтхэм лъэныкъуабэ къызэлъаубыты – культурэр, искусствэр, спортыр, техникэр, ботаникэр, зоологиер.
Музеим къыщагъэлъагъорэмкIэ зэкIэ дунаир нэм къыкIэуцо, мыщ маркэ 500 фэдиз хэхьагъ, ахэм яшIуагъэкIэ къэралыгъо зэфэшъхьафхэм ядунай зыфэдэр — къэкIырэ лъэпкъхэр, псэушъхьэхэр зэбгъэшIэн плъэкIыщт. Къэгъэлъэгъоным гъотыгъое экспонатхэр бэу хэлъых. Маркэ пэпчъ къэкIырэ е псэушъхьэ лъэп­къэу шъолъырымкIэ анахь мэхьанэ зиIэр тешIыхьагъ, гущыIэм пае, Болгарием имаркэ — розэр, нэмыкI хэгъэгум ием — бегемотыр, ящэнэрэм — чъыгэешхор.
Филателистическэ коллекциеу Александр Саус иер мы къэгъэлъэгъоным хэлажьэ. 2014-рэ илъэсым Лъэпкъ музеим ар къызIэкIигъэхьэгъагъ. А. Саус филателист цIэрыIуагъ, Урысые филателистическэ обществэм хэтыгъ, 1978-рэ илъэсым къыщыублагъэу ащ маркхэр ыугъоеу ригъэжьэгъагъ, альбом 15 зэIуи­гъэкIагъ (маркэ 5606-рэ хъоу).
Анахь маркэ кIэракIэхэр зиIэхэр Урысыер, Кубэр, Вьетнам, Мавританиер, Польшэр ыкIи Гвианэр.
Маркэхэм сурэтэу атешIыхьагъэхэм анэмыкIэу, текст тхыгъэ кIэкIхэри атетых, ахэр яинагъэкIи якIэрэкIагъэкIи зэтекIых. Мы къэгъэлъэгъоным ихьатыркIэ, ухэтми дэгъоу къэкIыхэрэмрэ псэушъхьэхэмрэ зэбгъэшIэн плъэкIыщт. Мыхэм атет сурэт­хэм ахэтых гъотыгъуае е щымыIэжь хъугъэ псэушъхьэхэр. Маркэхэм яхьатыр­кIэ чIыопсым нахь пэблагъэ тэхъу ыкIи псэушъхьэхэр, бзыухэр, хьацIэ-пIацIэхэр зэтэгъашIэх.
Къэгъэлъэгъоныр анахь зытегъэпсыхьагъэр кIэлэеджакIохэр, студентхэр, тарихълэжьхэр, краеведхэр ыкIи цIыфыбэу къешIэкIыгъэ дунаир ыкIи ащ итарихъ зышIэмэ зышIоигъохэр ары.
МэфэкI къызэIухыгъом къекIолIэгъэ цIыфхэм маркэхэр зыфэдэхэмкIэ экскурсиер къафишIыгъ Нуриет Шадуевам.
Дзэукъожь Нуриет.