IэпыIэгъу афэхъух
Къэралыгъо программэу «ЩыIэкIэ Iэрыфэгъу» зыфиIорэм диштэу Адыгэ Республикэм IофшIэнымрэ социальнэ хэхъоныгъэмрэкIэ и Министерствэ муковисцидозыр къызэузырэ кIэлэцIыкIухэр зэрыс унагъохэм компрессорнэ ингаляторхэр аритыгъ.
— Адыгэ республикэ общественнэ организациеу «ГугъапI» зыфиIорэм илъэIу фагъэцакIэзэ, республикэ бюджетым къыхэкIыгъэ ахъщэмкIэ ахэр къащэфыгъэх. 2016-рэ илъэсым къыщегъэжьагъэу ащ фэдэ IэпыIэгъу Адыгеим щараты, орфаннэ узхэм агъэгумэкIырэ кIэлэцIыкIухэр зэрыс унагъохэм IэпыIэгъу арагъэгъоты. Республикэм ис сымаджэхэм япсауныгъэ зыпкъ игъэуцожьыгъэнымкIэ ищыкIэгъэ амалхэр джы яIэх, — къытыгъ Адыгэ Республикэм IофшIэнымрэ социальнэ хэхъоныгъэмрэкIэ и Министерствэ.
Компрессорнэ ингаляторхэм Iэзэгъу уцхэр кIэлэцIыкIухэм яжьыкъэщапIэхэм куоу алъагъэIэсы. Ахэм яшIуагъэкIэ кIэлэцIыкIухэми, ахэм янэ-ятэхэми къямыхьылъэкIэу Iоф зэфэшъхьафхэр мафэ къэс агъэцэкIэн, япсауныгъэ къаухъумэн, мыгумэкIэу псэунхэ алъэкIы.