Пхъэ искусствэм идунэе хьа­лэмэт ухэзыщэрэ мастер классэу «Шы плъыжь» зыфиIорэр Адыгеим и Сурэт къэгъэлъэгъуапIэ щыкIуагъ. АР-м илъэпкъ ыкIи изаслуженнэ сурэтышIэу, Адыгеим исурэтышIхэм я Союз хэтэу Хъуажъ Рэмэзан Iоф­тхьабзэр зэхищагъ.

Тишъолъыр щызэлъашIэрэ сурэтышIэу Хъуажъ Рэмэзан гукъэкI гъэшIэгъонхэр ыгъэфедэзэ Iоф ешIэ. Лъэпкъ нэшанэ зиIэ IэшIэгъабэ ащ ыIапэ къычIэкIыгъ. Ащ игупшысэхэр пхъэм регъэкIух: унэгъо хъызмэтымкIэ Iэмэ-псымэхэр, лэгъэ гъэшIэгъонхэр, тхыпхъэ хьалэмэтхэр зыхэбзыкIыгъэ паннохэр, лIэкъо тамыгъэхэр.
Пхъэм жабзэ къыдэзыгъотыгъэ IэпэIасэм иIофшIагъэхэмкIэ илъэпкъ идэхагъэ къыреIотыкIы. Ар IэшIэхэп, ащыщхэм яшIын охътабэ пэIохьэ, ау ежьым ар шIотхъагъу, гухахъо ­хегъуатэ.
Ижъырэ пхъэ хэбзыкIын шIыкIэр непэ къэухъумэгъэн фаеу Хъуажъ Рэмэзан елъытэ. ПхъэшIэныр лъызыгъэкIотэщт ныбжьыкIэхэр щыIэнхэм фэшI егъэджэн сыхьатыр зэхищагъ. НыбжьыкIэхэм ашIогъэшIэгъон хъущт лъэныкъохэр къыдилъытэзэ десэхэр къафиIотагъ.
— Художественнэ искусствэм рес­публикэм зыщегъэушъомбгъугъэным, цIыфхэр нахьыбэу ащ фищэнхэм Сурэт къэгъэлъэгъуапIэр пылъ. Тэ, сурэтышI­хэм, типшъэрылъыр ныбжьыкIэхэм яамалхэм икъоу зыкъызэIуягъэхыгъэнымкIэ ищыкIэгъэ Iофтхьабзэхэр зэ­хэтщэнхэр ары. 2026-рэ илъэсыр шы плъыжьым и Илъэсэу агъэнэфагъ, ащ непэрэ егъэджэн сыхьатыр фэдгъэ­хьыгъ. Шы плъыжьыр пхъэм хэтыбзыкIыщт ыкIи дгъэлэжьыщт. Пхъэр адыгэ­хэм сыдигъуи апэблагъэу щытыгъ, ар илыягъэу агъэкIэракIэщтыгъэп. Пкъы­гъом пшъэрылъэу ыгъэцэкIэщтым те­гъэпсыхьагъэу бгъэпсын фае, — къы­Iуагъ Хъуажъ Рэмзан.
НыбжьыкIэу къекIолIагъэхэм егъэ­джэныр ашIогъэшIэгъонэу IэпэIасэм едэIугъэх. Пхъэм тхыпхъэхэр хабзы­кIыгъэх, ащ ыужкIэ ахэр агъэлэжьыгъэх. Пхъэ шы плъыжь хьазырхэр
кIэлэцIыкIухэм зыдахьыжьыгъэх ыкIи шIэны­гъакIэхэр агъотыгъэх.

Лъэпшъыкъо Фатим.