ИлъэсыкIэ шIушIэ Iофтхьабзэхэу АР-м и ЛIышъхьэу КъумпIыл Мурат кIэщакIо зыфэхъугъэхэр рагъэжьагъэх. Ахэм республикэм ис кIэлэцIыкIу 10000 фэдиз ахэлэжьэщт: хэушъхьафыкIыгъэ дзэ операцием щыIэхэм, социальнэу мыухъумэгъэ унагъохэм якIэлэцIыкIу­хэр, зипсауныгъэкIэ пыч зиIэхэр, сэнаущыгъэ зыхэлъ кIэлэеджакIохэр.

Пшысэхэм атехыгъэ спектаклэхэр, театрэ къэгъэлъэгъонхэр АР-м и Театральнэ ыкIи и Концерт зэхахьэхэм ащыкIощтых. КIэлэцIыкIухэр пшысэхэу «Золушка», «По щучьему велению» зыфиIохэрэм яплъыщтых Ахэм анахьы­жъыIо кIэлэцIыкIу 1800-рэ кинотеатрэхэм арагъэблэгъагъэх фильмэу «Три Богатыря» зыфиIорэм еплъынхэу. ХьакIэхэм IэшIу-IушIухэр ыкIи пхъэкIычэ цIыкIухэр зэрылъ Iалъмэкъхэр аратыщтых. Респуб­ликэм икIэлэеджакIохэу ублэпIэ классхэм арысхэм илъэсыкIэ шIухьафтынхэмрэ республикэм и ЛIышъхьэ зыщафэгушIорэ тхыгъэмрэ афагъэхьазырыгъэх. А 1 — 4-рэ классхэм арысхэм апае шIухьафтын 26000-рэ муниципалитетхэм аIэкIагъэ­хьэгъах. КъумпIыл Мурат итхыгъэ псауныгъэ пытэ яIэнэу, еджэным гъэхъагъэхэр щашIынэу кIэлэцIыкIухэм щафэлъэIуагъ. Краснодар краим икъуаджэхэм якIэлэеджакIохэм апайи шIухьафтын 730-рэ агъэхьазырыгъ. Джащ фэдэу Адыгеим щагъэхьазырыгъэ IэшIу-IушIу Iалъмэкъ 10200-р Херсон хэкум ис кIэлэцIыкIухэм афарагъэ­щагъ.

Iофтхьабзэу «ШIоигъо­ныгъэхэм яилъэсыкIэ чъыг» зыфиIорэм илъэс къэс Адыгеир хэлажьэ. Хэбзэ къулыкъухэм япащэхэм, депутатхэм, бизнесменхэм щыIэныгъэм чIыпIэ къин ригъэуцогъэ кIэлэцIыкIу мин пчъагъэ­мэ яшIоигъоныгъэхэр афагъэцакIэх. 2018-рэ илъэсым щегъэжьагъэу зэрэ Урысыеу мыщ фэдэ Iофтхьабзэр щызэхащэ, шIу зышIэ зышIоигъо нэбгырэ мин пчъагъэ илъэс къэс ащ зэрепхы.
«АшIуабэ дашIэу кIэлэцIыкIухэр илъэсыкIэ мэфэкIхэм, хьалэмэт горэхэм яжэх. КIэлэцIыкIухэр къызэрэтщыгугъы­хэрэр къэдгъэшъыпкъэжьыным пае тфэлъэкIырэр зэкIэ тшIэщт. КIэлэцIы­кIу­хэу зятэхэр хэу­шъхьафыкIыгъэ дзэ операцием хэла­жьэхэу ыкIи ягупсэхэм афэгушIон амал зимыIэхэмкIэ, щы­Iэныгъэм чIыпIэ къин ригъэуцогъэ кIэлэцIыкIухэмкIэ ащ мэхьанэшхо иI. Ащ фэдэ кIэлэцIыкIухэм нахьыбэу тынаIэ атед­гъэтыщт, тафэгумэкIыщт», — къыIуагъ Адыгеим и ЛIышъхьэ.