ИлъэсыкIэмкIэ гухэлъхэр
Адыгэ Республикэм социальнэ-IофшIэн зэфыщытыкIэхэр щыгъэIорышIэгъэнхэм фэгъэзэгъэ лъэныкъуищ комиссием зэхэсыгъоу иIагъэр зэрищагъ IофшIэнымкIэ ыкIи социальнэ хэхъоныгъэмкIэ министрэу Мырзэ Джанбэч.
2026-рэ илъэсым ибюджет фэгъэхьыгъэ законопроектэу аштагъэм къыдыхэлъытагъэу социальнэ лъэныкъохэм апэIуагъэхьанэу агъэнафэхэрэм афэгъэхьыгъэу къэгущыIагъ АР-м финансхэмкIэ и Министерствэ иотдел ипащэу Наталья Петровар. Ащ къызэриIуагъэмкIэ, ыпэкIэ фэдэу джыри социальнэ лъэныкъохэр къыхагъэщыщтых. 2026-рэ илъэс бюджетым хахъохэмкIэ иIахь сомэ миллиард 47,8-рэ, хъарджхэмкIэ — миллиард 50,2-рэ зэрэхъущтхэр. Сомэ миллиарди 2,4-рэ щыкIагъэ фэхъущт. Бюджетым инахьыбэр, процент 60-р, социальнэ Iофхэм апэIуагъэхьащт, ахъщэкIэ къэпIон зыхъукIэ, сомэ миллиард 29-м ехъу.
Лъэныкъуищ комиссием къихьащт илъэсым иIофшIэн зыфэдэщтым къытегущыIагъ АР-м IофшIэнымкIэ ыкIи социальнэ хэхъоныгъэмкIэ иминистрэ иапэрэ гуадзэу Екатерина Леоновар.
Нэужым Адыгэ Республикэм социальнэ-IофшIэн зэфыщытыкIэхэр щыгъэIорышIэгъэнхэм фэгъэзэгъэ лъэныкъуищ комиссием къихьащт 2026-рэ илъэсым иIофшIэн ыухэсыгъ.
КIАРЭ Фатим.