Унэжъхэм цIыфхэр къачIэщыжьыгъэнхэм фытегъэпсыхьэгъэ лъэпкъ проектым игъэцэкIэнкIэ 2019-рэ илъэсым къыщегъэжьагъэу Адыгеим гухэлъэ ышIыгъэхэм, рихъухьэгъагъэхэм къаригъэхъугъ.

Ахэм афэдэ унэхэм къачIащыжьынэу щытыгъэр нэбгырэ мин 1,28-мэ, къачIащыжьыгъэр мин 1,294-рэ (проценти 101-рэ). Къабгынэнэу щытыгъэр квадрат метрэ мин 19,32-мэ, нэмыкI псэупIэу яIэ хъугъэр квадрат метрэ мин 19,52-рэ.
Адыгэ Республикэм псэолъэшIынымкIэ и Министерствэ къызэритыгъэмкIэ, 2025 — 2026-рэ илъэсхэм шъолъыр программэм тетэу Теуцожь ыкIи Тэхъу­тэмыкъое районхэм фэтэр 18-у квадрат метрэ 618,5-рэ хъурэмэ къачIащыжьынхэу щытыгъ. А пчъагъэм щыщэу 14-р Тэхъутэмыкъуае, 4-р – къэлэ гъэпсыкIэ зиIэ псэупIэу Лъэустэнхьаблэ адэтых.
«НепэкIэ Тэхъутэмыкъое районым ифэтэри 9-у нэбгырэ 25-рэ зычIэсыгъэм, квадрат метрэ 359-рэ хъущтыгъэм, нэмыкI псэупIэхэр яIэ хъугъэ. Ащ нэмыкIэу Тэхъутэмыкъое районым фэтэри 5 ыкIи Теуцожь районым фэтэри 4 щаратынымкIэ зэзэгъыныгъэхэр адашIыгъахэх ыкIи ахъщэри атыгъах. А гухэлъхэм сомэ миллион 60,9-рэ апэIуагъэхьагъ, ащ щыщэу сомэ миллион 34,93-р «ЧIыпIэхэм яхэхъоныгъэкIэ Фондым» къыхэкIыгъ, миллион 14,17-р — республикэ, миллион 11,79-р — чIыпIэ бюджетым икъэкIуапIэхэм къахагъэкIыгъ. Ащ фэгъэхьыгъэу къытыгъ АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ.
КъызэрэхагъэщыгъэмкIэ, 2025 — 2026-рэ илъэсхэм ателъытэгъэ фэтэрхэу къащэфыгъэхэр мы илъэсыр имыкIызэ цIыфхэм аратыщтых.