ПсэупIэ е нэмыкIэу амыгъэкощырэ мылъкум хэхьэрэ псэуалъэ къэпщэфыныр Iоф къызэрыкIоп, теурыкIогъэ екIолIакIэ фыуиIэ хъущтэп. ЦIыфэу псэуалъэр зыщэрэр гъэпцIакIоу къычIэкIымэ, зыщэфырэм чIэнэгъошхо ешIы.

Ащ фэдэ псэуалъэ къэпщэфыным ыпэкIэ ар зые шъыпкъэр, къэбарэу пы­лъыр, зиунаехэм ащэн фимытхэу хьыкумым къышIыгъэмэ е нэмыкIэу зэзэгъы­ныгъэр къэзыгъэхьылъэрэ Iоф хэлъымэ зэбгъэшIэн фае. Ахэр амыгъэкощырэ мылъкум и ЗыкI къэралыгъо реестрэ къыхябгъэтхыкIын плъэкIыщт.
Мыщ къыхэтхыкIыгъэ тхылъхэр зэфэшъхьафых. «Выпискэм» зэпстэумэ алъэгъурэ зэIухыгъэ къэбари, зэфэшIыгъэ шъэфи къаратхэ. Мылъкур зием е цыхьэ зыфишIырэм, хьыкумым, полицием, нотариусым е нэмыкIэу хабзэм илIыкIо нэмыкI къызIэкIимыгъэхьашъун арытэуи мэхъу.
Амыгъэкощырэ мылъкум икъэбар Росреестрэм иинтернет нэкIубгъо е къэралыгъо фэIо-фашIэхэм япортал ащызэбгъэшIэн плъэкIыщт, псэуалъэ къэпщэфыным пае тхылъэу бгъэхьазырыщтхэри ибгъотэщтых.
Джащ фэдэу унэм икъэбар, кадастрэ уасэу иIэр, ар зиунаер, ащэн фитыхэмэ, хьауми гъунапкъэ горэхэр иIэхэмэ интернет нэкIубгъом иедзыгъоу «Справочная информация об объектах недвижимости в режиме онлайн» зыфиIорэр къызэIупхымэ, къызIэкIэбгъэхьанхэ плъэкIыщт.
ШъунаIэ тешъотэгъадзэ, 2023-рэ илъэсым игъэтхапэ и 1-м къыщыублагъэу хэбзэгъэуцугъэм зэхъокIыныгъэхэр иIэ зэрэхъугъэхэм ыпкъ къикIэу унэр зиехэм якъэбар амыгъэкощырэ мылъкум и ЗыкI къэралыгъо реестрэ къыхэтхыкIыгъэ тхылъым къыкIэупчIэрэ пстэуми аIэкIагъэхьажьырэп. Унэр зием ишIэ хэлъын фае, ащ лъэIу тхылъ Росреестрэм къыритыгъэмэ, ар зыщэфы зышIоигъом ратыщтых. Ащ нэмыкIэу, унэр зыщэфы зышIоигъом ар зиер игъусэу нотариусым екIуалIэмэ, ЗыкI реестрэм къыхэтхыкIыгъэу ищыкIагъэр къаIихын ылъэкIыщт.
Джащ фэдэу унэ къэзыщэфыщтым ар зыщэрэм ащ фэдэ фитыныгъэ иIэмэ, хьыкумым гъунэпкъэ гъэнэфагъэхэр къафишIыгъэхэмэ хэбзэIахьхэмкIэ къулыкъум, хэгъэгу кIоцI IофхэмкIэ Министерствэм яиинтернет нэкIубгъохэм ащызэригъэшIэн амал иI.
Ахэм анэмыкIэу нэбгырэ пчъагъэу унэм итхагъэр, псэупIэ-коммунальнэ фэIо-фашIэхэмкIэ чIыфэ ателъымэ, унагъоу зием истатус зэжъугъэшIэнхэр зыщышъумыгъэгъупш.