Концерт залэу «Налмэсым» шъолъыр проектэу «Апэрэхэм яшIухьафтын» зыфиIорэм текIоныгъэр къыщыдэзыхыгъэхэм щафэгушIуагъэх. Апэрэхэм я Движение ишъолъыр къутамэ хэлажьэхэрэр кIэгъэгушIугъэнхэм, кIэлэцIыкIухэмрэ социальнэ мэхьанэ зиIэ ныбжьыкIэ Iофтхьабзэхэмрэ IэпыIэгъу ятыгъэным апае а проектыр зэхагъэуцуагъ.

Адыгеим и ЛIышъхьэу КъумпIыл Мурат, АР-м и Къэралыгъо Совет — Хасэм и Тхьаматэ игуадзэу Цэй Эдуард, министрэхэм я Кабинет и Тхьаматэ игуадзэу, финансхэмкIэ министрэу Виктор Орловыр, «ЛIыхъужъхэм яуахът» зыфиIорэ программэм хэлэжьэрэ Сергей Ковалевыр, министрэхэм я Кабинет хэтхэр, Урысые политическэ партиеу «Единэ Россием» и Адыгэ шъолъыр къутамэ игъэцэкIэкIо комитет ипащэхэр, фондэу «Хэгъэгум иухъумакIохэр» зыфиIорэм икъутамэ, шъолъыр къутамэхэу «Юнармиемрэ» «Единэ Россием и НыбжьыкIэ гвардиерэ» яIэшъхьэтетхэр.
Iофтхьабзэм хэлажьэхэрэм шIуфэс къарихызэ Адыгеим и ЛIышъхьэ къызэрэхигъэщыгъэмкIэ, «Апэрэхэм я Движение» ишъолъыр къутамэ республикэм иныбжьыкIэ политикэ пытэу хэуцуагъ, УрысыемкIэ анахь дэгъухэм зыкIэ ащыщ хъугъэ.
«Шъо Iофыгъо зэфэшъхьафыбэ зэшIошъохы: тичIыпIэгъухэм, хэушъхьафыкIыгъэ дзэ операцием хэлажьэхэрэм ыкIи ахэм яунагъохэм шъуадеIэ, ветеранхэм шъуафэгумэкIы, а пстэури патриотизмэ шъыпкъэм изы Iахьых. Урысыем щыпсэухэрэмкIэ мэхьанэшхо зиIэ IофтхьэбзитIум – хэгъэгум иухъумакIо и Илъэсрэ ТекIоныгъэшхом ия 80-рэ илъэсрэ зыщы­хэдгъэунэфыкIыхэрэ уахътэм — шъуиIахьышхо ахэшъошIыхьэ. Шъуилэгъухэм щысэшIу шъуафэхъу, IофтхьэбзэшIухэм нахь игъэкIотыгъэу цIыфхэр ахэшъущэнхэмкIэ шъуишIуагъэ къэшъогъакIо», — къыIуагъ КъумпIыл Мурат шIухьафтынхэр къызфагъэшъошагъэхэм зафигъазэзэ.
Ны-тыхэу гухэлъ гъэшIэгъонхэр кIэлэцIыкIухэм ягъусэхэу пхырызыщыхэрэм, кIэлэегъаджэхэу, гъэсакIохэу щыIэны­гъэм гъогу тэрэз къыщыхахынымкIэ ныбжьыкIэхэм зишIуагъэ языгъэкIыхэрэм анахьэу зэрафэразэр къызеIом ыуж Адыгеим и ЛIышъхьэ къыхигъэщыгъ республикэм иныбжьыкIэхэм нахьышIум ылъэныкъокIэ къяшIэкIыгъэ щыIакIэр зэблахъун зэра­лъэкIыщтыр.
Проектым текIоныгъэ къыщыдэзыхыгъэ пстэуми зафэгушIо нэужым «Апэрэхэм я Движениеу» зэхэщагъэм IэпыIэгъоу ратырэр республикэм зэрэщылъагъэкIотэщтыр къыIуагъ.
Шъугу къэтэгъэкIыжьы: шъолъыр проектэу «Апэрэхэм яшIухьафтын» зыфиIоу 2025-рэ илъэсым Iоныгъом и 10-м къыщегъэжьагъэу чъэпыогъум и 15-м нэс кIуагъэм нэбгырэ 763-рэ хэлэжьагъ. Ахэм ащыщэу нэбгырэ 47-р лъэныкъо 15-мкIэ мэкъэтыным хэлэжьагъэх.
Лъэныкъоу «Я Хэгъэгу шIу алъэгъунымкIэ анахь дэгъоу зыкъэзыгъэлъэгъуа­гъэр» зыфиIорэмкIэ текIоныгъэ къыда­хыгъ кIэлэцIыкIу-ныбжьыкIэ творчествэмкIэ Гупчэм ипащэ игуадзэу Илья Донцовым, къуаджэу Щынджые дэт гурыт еджапIэу N 24-м ипащэ иупчIэжьэгъоу Мэзыужьэ­къо Саниет, предпринимателэу Денис Герасименкэм.
Лъэныкъоу «Илъэсым иунагъу» зыфиIорэмкIэ къыхагъэщыгъэх Красильников Антонрэ Ксениерэ, Вьюшин Константинрэ Екатеринэрэ, Уайкъокъо Рустамрэ Сусанэрэ яунагъохэр.
Лъэныкъоу «Апэрэхэм я Движение» анахь чанэу хэлажьэрэр» зыфиIорэмкIэ атекIуагъэх Анастасия Бердюгинар (къуа­джэу АдыгеякIэм игурыт еджапIэу N 19-р), Дыхъу Алан (Адыгэкъалэ игурыт еджапIэу N 3-р), Хьаджэбыекъо Даринэ (къуаджэу Пэнэжьыкъуае игурыт еджапIэу N 1-р), Вадим Рябенкэр (Мыекъопэ районымкIэ гъэсэныгъэ гупчэу N 2-р), Матвей Жилиныр (къалэу Мыекъуапэ илицееу N 35-р), Арина Овчаренкэр (къалэу Мыекъуапэ игурыт еджапIэу N 7-р), Брафтэ Эммэ (къуаджэу Еджэркъуае игурыт еджапIэу N 3-р), Анастасия Бодневар (Джэджэ районымкIэ Дондуковскэ мэкъумэщ техникумыр).
Iофтхьабзэм илъэхъан нэмыкI лъэныкъохэмкIэ текIоныгъэр къыдэзыхыгъэхэм афэгушIуагъэх АР-м и Къэралыгъо Совет – Хасэм и Тхьаматэ игуадзэу Цэй Эдуард, программэу «ЛIыхъужъхэм яуахът» зыфиIорэм хэлажьэу, ЛIыхъужъныгъэм иордениплI къызфагъэшъошэгъэ полковникэу Сергей Ковалевыр.
Лъэныкъо пстэухэмкIи анахь гъэсэкIо, упчIэжьэгъу дэгъухэр къагъэнэфагъэх, илъэсым иунэгъо, ипэублэ къутэмэ, культурэм, спортым, гъэсэныгъэ тедзэм яучреждение, патриот пIуныгъэмкIэ анахь лъэшхэр, юнармейскэ отряд ыкIи инспектор ныбжьыкIэхэм яотряд анахь дэгъу­хэр къыхагъэщыгъэх.
«Апэрэхэм яхор, фольклор-лъэпкъ ансамблэу «Ащэмэзым», дзэ частым икъулыкъушIэхэм ыкIи кIэлэцIыкIу твор­че­скэ купэу «Шпаргалкэм», адыгэ къашъом­кIэ ансамблэу «Синдикэм» концерт къатыгъ.