Урысые Федерацием щынэгъончъэнымкIэ икъулыкъухэм яIофышIэ и Мафэ фэгъэхьыгъэу Мыекъуапэ дэт концерт залэу «Налмэсым» мэфэкI зэхахьэ щыкIуагъ. Урысыем щынэгъончъэнымкIэ и Федеральнэ къулыкъу и ГъэIорышIапIэу Адыгеим щыIэм Iоф щызышIэхэрэмрэ иветеранхэмрэ афэгушIонэу ащ къэкIогъагъ Адыгеим и ЛIышъхьэу КъумпIыл Мурат.

Республикэм ипащэ къэзэрэугъоигъэ­хэм афэгушIуагъ ыкIи къызэрэхигъэщыгъэмкIэ, лъэпкъ федэхэр, хэгъэгум иконституционнэ гъэпсыкIэ къэзыухъумэрэ, хэгъэгу кIоцI ыкIи IэкIыб къэрал пыйхэм апэшIуекIорэ бэнэныгъэр лъызыгъэкIотэрэ цIыфхэр ары а мафэм зыфэгушIохэрэр.
«Хэгъэгум иухъумакIо и Илъэсрэ ТекIоныгъэшхом ия 80-рэ илъэсрэ яхэгъэунэфыкIын зыщыкIорэм икъоу къыдгу­рэIо а IофшIэным мэхьанэу иIэр, щынэгъончъэным икъулыкъухэм лIыхъужъ гъогушхоу къакIугъэм уасэ фэтэшIы, лъытэныгъэ зыфытиIэ ветеранхэу Хэгъэ­гум ишъхьафитыныгъэ къэзыухъумагъэ­хэм, нацизмэм изэхэкъутэн зиIахьышхо хэзышIыхьагъэхэм яфэшъошэ уасэ зэра­фэтшIырэр къэтэгъэлъагъо. Урысыем ыкIи ащ щыпсэурэ цIыфхэм яшъхьафитыныгъэ цыхьэшIэгъоу илъэс зэфэшъхьаф­хэм къэзыухъумагъэхэр рэзэныгъэ ин афытиIэу тыгу къэтэгъэкIыжьых. Непэ Адыгеим щынэгъончъэнымкIэ икъулыкъу­хэм ащылажьэхэрэр нахьыжъхэм ягъогу зэрифэшъуашэу рэкIох, зышъхьамысыжьхэу, пшъэдэкIыжьэу ахьырэр зынэсырэр къагурыIозэ апэ рагъэхъу», — къыIуагъ АР-м и ЛIышъхьэ.
КъумпIыл Мурат къызэрэхигъэщыгъэм­кIэ, хэбзэухъумэкIо къулыкъухэм шIуагъэ къытэу яIоф агъэцакIэ, обществэм зыпкъ­итыныгъэ хэлъынымкIэ, цIыф лъэпкъ зэфэшъхьафхэм къахэкIыгъэхэу ыкIи дин зэмылIэужыгъохэр зылэжьыхэу респуб­ли­кэм щыпсэухэрэр зэгурыIонхэмкIэ бэ зэшIуахырэр. Республикэм зыпкъитыныгъэ хэлъэу ыпэ ригъэхъунымкIэ а пстэури лъэпсэшIу мэхъу.
«Федеральнэ гупчэм иIэпыIэгъу къыз­фэд­гъэфедэзэ ыпэкIэ тылъэкIуатэ, экономикэми, социальнэ лъэныкъоми хэхъо­ныгъэ ятэгъэшIы. Лъэпкъ проектхэмрэ къэралыгъо программэхэмрэ къадыхэлъы­тагъэу инфраструктурэмкIэ пшъэрылъхэри зэшIотэхых. Бизнесым пае, тицIыфхэм апае амалыкIэхэм талъэхъу ыкIи ахэр тэгъэфедэх. Ахэм яшIуагъэкIэ республикэм къыщахьыжьырэ гъомылапхъэм хэтэгъа­хъо, инвестициехэр нахьыбэ мэхъух, бюджетым къихьэрэми, цIыф­хэм яхахъо­хэми нахь зыкъаIэты. Ренэу къыхэсэгъэ­щы цIыфхэм ящыIакIэ нахьышIу хъуным пае республикэм социальнэ ыкIи общественнэ-политическэ зыпкъитыныгъэ пытэ илъын зэрэфаер. ТапэкIи шъуикъулыкъу Iофэу ышIэрэр нахь ыгъэлъэшын, лъэныкъо шъхьаIэхэмкIэ гъэхъэгъэшIухэр ышIын­хэм ынаIэ тыригъэтын фае», — къы­Iуагъ респуб­ликэм и ЛIышъхьэ.
Адыгеим ипащэ агу къыкъэкIыжьы­гъэх къулыкъум къыпыщылъ Iофыгъохэр: терроризмэмрэ экстремизмэмрэ апэуцужьыгъэныр, лъэпкъ ыкIи дин джэгъогъуныгъэ щымыIэныр, къэралыгъом пэшIуекIорэ Iофтхьабзэхэм гъогур афыпыбзыкIыгъэныр, къолъхьэ тын-Iыхынымрэ экономикэ бзэ­джэшIагъэхэмрэ апэуцужьыгъэныр. А пшъэ­рылъхэр шIуагъэ хэлъэу зэшIохыгъэ хъунхэм пае къулыкъумрэ шъолъыр хабзэмрэ пытэу зэкъотхэу зэдэлэжьэнхэ фае.
«Республикэм щыпсэухэрэр ящынэгъон­чъэни яфитыныгъэхэм якъэухъумэни яп­хыгъэу бэкIэ къышъущэгугъых, яцыхьи къышъутелъ. ШъуиIэпэIэсэныгъэ, шъуи­пшъэдэкIыжь, Iофэу шъузфэгъэзагъэм шъузэрэфэшъыпкъэм яшIуагъэкIэ шъуапашъхьэ ит пшъэрылъхэр зэкIэ гъэхъагъэ хэлъэу тапэкIи зэрэзэшIошъухыщтхэм сицыхьэ телъ. Урысыем щынэгъончъэнымкIэ и Федеральнэ къулыкъу и ГъэIорышIапIэу Адыгэ Республикэм щыIэм ипащэхэм ыкIи зэкIэ Iоф щызышIэхэрэм сафэраз нэфэгъэ икъу хэлъэу, хэшIыкI ин фыряIэу яIоф зэрагъэцакIэрэм пае. Анахьэу сирэзэныгъэ гущыIэхэр зыфэзгъазэхэрэр къулыкъум иветеранхэу рес­публикэм ихэхъоныгъэ зиIахьышхо хэзышIыхьагъэхэр ары», — къыхигъэ­щыгъ Адыгеим и ЛIышъхьэ.
ИкIэухым КъумпIыл Мурат къэзэрэугъоигъэхэм афэлъэIуагъ псауныгъэ пытэ, щыIэкIэшIу яIэнэу, Адыгеимрэ Урысыемрэ яфедэ зыхэлъ мэхьанэшхо зиIэ IофшIэнэу агъэцакIэрэм тапэкIи гъэхъагъэхэр ща­шIын­хэу.
Джащ фэдэу къэралыгъо щынэгъончъэ­ным икъулыкъухэм яIофышIэхэмрэ яветеранхэмрэ ямэфэкIкIэ къафэгушIуа­гъэх АР-м и Къэралыгъо Совет — Хасэм и Тхьаматэу Владимир Нарожнэмрэ УФ-м щынэгъончъэнымкIэ и Федеральнэ къулы­къу и ГъэIорышIапIэу Адыгэ Республикэм щыIэм ипащэу Михаил Кемеровымрэ.
Анахьэу къахэщыгъэхэм мы Iофтхьабзэм щафагъэшъошагъэх АР-м и ЛIышъхьэ, АР-м и Къэралыгъо Совет – Хасэм, шъолъыр министерствэхэмрэ къулыкъу­хэмрэ ярэзэныгъэ тхылъхэр.
АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.