КIымэфэ лъэхъаным зэпахырэ узхэм нахь зыкъаIэтэу хабзэ. Ащ елъытыгъэу, республикэм эпидемиологиемкIэ Iофхэм язытет тыщыкIэупчIагъ щэфакIохэм яфитыныгъэхэр ыкIи цIыфым игупсэфыныгъэ къэухъумэгъэнхэмкIэ Федеральнэ къулыкъум и ГъэIорышIапIэу Адыгэ Республикэм щыIэм.

Эпидемиологие лъыплъэнымкIэ отделым ипащэу Гурген Авакян къызэриIуа­гъэмкIэ, тызхэт илъэсым ия 51-рэ тхьамафэ пэтхъу-Iутхъур ыкIи гриппыр къы­зэузыгъэхэм япчъагъэ мыщ фэдэ лъэхъаным ишапхъэхэм аблэкIыгъэп.
ИкIыгъэ тхьамафэм пэтхъу-Iутхъур ыкIи гриппыр нэбгырэ 1382-мэ къяузыгъэу агъэунэфыгъ. Ар эпидемием игъунапкъэхэм процент 37,1-кIэ анахь макI, ау ащ ыпэрэ тхьамафэм ебгъапшэмэ, проценти 46,7-кIэ нахьыб.
Къалэу Мыекъуапэ пштэмэ, пэтхъу-Iутхъур ыкIи гриппыр нэбгырэ 254-мэ къяузыгъэу агъэунэфыгъ
Лабораторнэ уплъэкIунхэм къызэрагъэлъэгъуагъэм­кIэ, мы илъэсым Iоныгъом къыщегъэжьагъэу тыгъэгъазэм нэс республикэм щызекIорэр нахьыбэрэмкIэ риновирусхэр, аденовирусхэр, парагриппыр, коронавирусэу Rs-р ыкIи А/H3N2-р ары.
ЩэфакIохэм яфитыныгъэхэр ыкIи цIыфым игупсэфыныгъэ къэухъумэгъэнхэмкIэ Федеральнэ къулыкъум и ГъэIорышIапIэу Адыгэ Республикэм щыIэм цIыфхэм зафегъазэ зэпахырэ узхэм защаухъумэнэу, япсауныгъэ нахь фэсакъынхэу.
ДЕЛЭКЪО Анет.