Адыгеим итхэкIо ныбжьыкIэу Славяна Бушневам илъэсыкIэм ехъулIэу кIэлэцIыкIухэм апае тхылъ къыдигъэкIыгъ.

«История йети Снежика: как Снежик и Горик стали героями на Кавказе» зыфиIорэм Жэнэ Къырымызэ ыцIэкIэ зэхащэрэ дунэе зэнэкъокъум диплом къыщыфагъэшъошагъ.
Пшысэр инджылызыбзэм рилъхьагъ Мыекъопэ гимназиеу N 5-м ипащэу Надежда Бородинам.
— КIэлэцIыкIухэм апае тхылъыр гъэшIэгъонэу зэ­рэзэхэзгъэуцощтым сы­пылъыгъ. Снежик тичIыпIэхэм къэкIонэу зэрэхъу­гъэр, ащ гъогоу къыкIугъэр еджэкIо цIыкIухэм ашIэщт. Снежикрэ ащ иныбджэгъоу Горикрэ лIыхъужъ зэрэхъугъэхэр алъэгъущт. Пшысэм Сне­горикхэм ядунай кIэлэцIыкIухэр хещэх, хъугъэ-шIа­гъэу апэ къикIыхэрэр, шIушIэ Iофэу зыхэлажьэхэрэр ­алъэгъущт, — еIо тхэкIо ныбжьыкIэм.
КIымэфэ пшысэ цIыкIум ыпкIэ хэмылъэу электроннэ ыкIи аудио шIыкIэм тетэу ИнтернетымкIэ ибгъотэщт.
ДЕЛЭКЪО Анет.