Гриппым пэуцужьырэ вакцинэм ихэлъхьан епхыгъэ Урысые Iофтхьабзэр Адыгеим щаухыгъ. Ар Iоныгъом и 1-м къыщегъэжьагъэу ре­кIо­кIыгъ.

— Мэзэ заулэм нэбгырэ 301833-мэ прививкэр ахалъхьагъ, ахэм ащыщэу 53211-р — кIэлэцIыкIух. АщкIэ агъэнэфагъэр гъэцэкIагъэ хъугъэ, — къытыгъ АР-м псауныгъэр къэухъумэгъэнымкIэ и Министерствэ.
Гриппыр ыкIи нэмыкI зэпахырэ пэтхъу-Iутхъу узхэр къызыучъыIырэ лъэ­хъаным къежьэхэ хабзэ. Ау вирусхэм зызэрэзэблахъурэм къыхэкIэу, нэшанэу яIэри зэфэшъхьаф, зэфэмыдэу сымаджэхэм апэкIэкIы. БлэкIыгъэ илъэсхэм ашIыгъэ лъыплъэнхэм къызэрагъэлъагъорэмкIэ, нэшанэхэм зэблэхъуны­гъэшхо афэхъурэп, икIыгъэ илъэсми гриппыр эпидемиологие шапхъэхэм ашъхьэдэкIыгъэп. Ар иммунизациер зэрэкIорэм занкIэу епхыгъ, икъоу захалъхьэкIэ, «коллективнэ иммунитет» зыфаIорэр щыIэ мэхъу ыкIи узым зиу­шъомбгъурэп.