ГушIуагъоми, къиныгъоми яшыхьатхэм, къэралыгъор гъэпсыгъэным, цIыфхэм яфитыныгъэхэр ыкIи яшIоигъоныгъэхэр къэухъумэгъэнхэм зиIахьышIу хэлъ ЗАГС-м иIофышIэхэм ямэфэкI мы мафэхэм хагъэунэфыкIыгъ. Ащ ипэгъокIэу ЗАГС-м Адыгэ РеспубликэмкIэ и ГъэIорышIапIэ ипащэу Лариса Волчановскаям «Адыгэ макъэр» IукIагъ. Илъэсэу дгъэкIотэжьырэм икъэгъэлъэгъонхэм ар къатедгъэгущыIагъ.

Ежь Ларисэ Иван ыпхъум 2020-рэ илъэсым къыщегъэжьагъэу мы къулы­къум пэщэныгъэ дызэрехьэ. Ащ ыпэкIэ илъэс 21-рэ прокуратурэм щылэжьагъ, очылхэм я Адыгэ республикэ коллегие иочылэу щытыгъ.
— АР-м и ЛIышъхьэу КъумпIыл Мурат цыхьэ къысфишIи, мыщ сыкъэкIонэу зэрэхъугъэм сырыраз. Iоф­шIэкIэ амалхэр, адрэ сыздэщыIагъэхэм тIэкIу атекIы нахь мышIэми, дэгъоу къызгурыIуагъ, сIэ къихьагъ, лъэшэу сыгу рехьы. Ар къыздэзгъэхъугъэр сыкъызхэфэгъэ IофышIэ купэу IэпэIэсэныгъэ ин зыIэкIэлъыр ары. ТызэгурыIожьэу, зы унагъом фэдэу тызэхэт. Нэбгырэ пэпчъ пшъэ­дэкIыжь ин хэлъэу зыфэгъэзэгъэ IофшIэныр егъэцакIэ, — хигъэунэфыкIыгъ Лариса Волчановскаям.
ЦIыфым ищыIэныгъэ мэхьанэ зиIэ хъугъэ-шIагъэу хэ­хъухьэхэрэр хэбзэгъэу­цугъэм диштэу тхыгъэнхэр ЗАГС-м фэгъэзагъ. Сабыир къызщыхъу­рэм къыщегъэжьагъэу цIыфым идунай зихъожьырэм нэс мы­хэр лъэплъэх: сабыеу къэхъу­хэрэм, зидунай зыхъожьыхэрэм ятхылъхэр тхыгъэнхэр, къэзэрэщэхэрэр, зэхэ­кIыжьхэрэр, сабый зыпIунэу зыштэхэрэр, ятэ зэриIэр гъэнэфэгъэныр, цIэр зэблэ­хъугъэныр, нэмыкIхэри.
— Аужырэ илъэсхэр пштэхэмэ, тиIофшIэн бэ кIэу къыхэхьагъэр. Ар бэкIэ къэзгъэпсынкIагъэхэм ащыщ Урысыем и ЗАГС-хэм якъулыкъухэр системакIэм зэрэтехьагъэхэр, ЗыкI къэралыгъо реестрэ (ЕГР) щыIэ хъугъэ. Тхьапэм тетхагъэу тIыгъыгъэ тхылъхэр зэкIэ электроннэ шъуашэм ралъхьагъэх. Ащ ишIуагъэкIэ федеральнэ базэ щыIэ хъугъэ. ГущыIэм пае, цIыфым документ горэ шIокIодыгъэмэ, ар къызщыратыгъэгъэ отделым кIон ищыкIэгъэжьэп, зыщыпсэурэ чIыпIэм щыIэ ЗАГС-м иотдел къыщыдихыжьын ылъэкIыщт. Къэралыгъо фэIо-фашIэхэм я ЗыкI портал агъэфедэзэ, пэIудзыгъэ шIыкIэм тетэу къэхъугъэкIэ сабыир «Супер-сервис» зыфиIорэмкIэ ны-тыхэм щатхын алъэкIы хъугъэ. Джащ фэдэу ным, къэхъугъэ сабыйхэм яфэIо-фашIэхэр псынкIэу ыкIи зэрифэшъуашэу афэгъэцэкIэгъэнхэм, чэзыухэм ахэмытынхэм афэшI тиIофышIэ сабыйхэр къы­зыщыхъурэ унэм кабинет щыриIэу къэ­хъугъакIэм исвидетельствэ, СНИЛС-р ащ ащыратыжьы, — хигъэунэфыкIыгъ Лариса Волчановскаям.
ТигущыIэгъу къызэриIуагъэмкIэ, мы илъэсым аужырэ зэхъокIыныгъакIэу къежьагъэр зэхэкIыжьырэ зэшъхьэгъусэхэм атырэ къэралыгъо пошлинэм лъэшэу зэрэхэхъуагъэр ары. ЫпэкIэ сомэ 600 нэбгырэ пэпчъ ытыщтыгъэмэ, джы ар сомэ мини 5-м нагъэсыгъ. Арэу е нэмыкI ушъхьагъоу тшIэрэп, ау зэхэкIы­жьыхэрэм япчъагъэ мы лъэсым къызэрэщыкIагъэр ЗАГС-м ипащэ къыхигъэ­щыгъ.
— ИкIыгъэ илъэсым егъэпшагъэмэ, зэхэкIыжьыгъэхэм япчъагъэ мыгъэ унэгъо 403-кIэ нахь макIэ хъугъэ. Джащ фэдэу къэзэрэщагъэхэри унэгъо 31-кIэ нахьыб. Ау, гухэкI нахь мышIэми, са­быеу къэхъугъэр мы илъэсым нэбгырэ 30-кIэ нахь макI. Зидунай зыхъожьыгъэ­хэр 151-кIэ нахьыб, — еIо Ларисэ Иван ыпхъум.
Граждан Iофхэм язытет тхыгъэнымкIэ АР-м и ГъэIорышIапIэ ипащэ мэфэкIымкIэ иIофшIэгъухэм гущыIэ фабэхэр афигъэзагъ:
— Тисэнэхьат епхыгъэ мэфэкIымкIэ сыгу къыздеIэу сышъуфэгушIо! Шъузфэгъэзэгъэ IофшIэныр щытхъу хэлъэу жъугъэцэкIэнэу, псауныгъэ пытэ шъуиIэнэу, унэгъо насыпым шъущымыкIэнэу сышъуфэ­лъаIо. Къэралыгъом лъапсэ фэзышIырэ унэгъо пытэхэр нахьыбэу терэIэх, ахэм кIэлэцIыкIу насыпышIохэр бэу къарэрэхъухьэх!