Адыгеим и ЛIышъхьэу КъумпIыл Мурат республикэм щыпсэухэрэм бэмышIэу адыри­Iэгъэ зэIухыгъэ зэдэгущыIэгъум зэрэщыри­хъу­хьэгъагъэу, Мыекъопэ районымкIэ псэупIэу Удобнэм щыIагъ.

Республикэм ипащэ телевидениемкIэ къэгущыIэзэ псэупIэ пэпчъ хэхъоныгъэ егъэшIыгъэнымкIэ социальнэ Iофыгъохэм язэшIохын мэхьанэшхо зэриIэр хигъэунэфыкIыгъагъ, псэупIэу Удобнэм дэсхэм аIукIэнэу къы­гъэгугъэгъагъэх.
Зигугъу къэтшIыгъэ псэупIэм ЛIышъхьэр зэкIом, Iофхэм язытет зыщигъэгъозагъ. Ащ игъуса­гъэх АР-м иминистрэхэм я Ка­бинет и Тхьаматэ игуадзэу Хъоткъо Хъызыр, псэолъэшIынымкIэ, транспортымкIэ, псэу­пIэ-­комму­нальнэ, гъогу хъызмэ­тымкIэ Министерствэм ипащэ игуадзэу Лафышъэ Рэмэзан, Мыекъопэ районым ипащэу Ми­хаил Марьиныр, нэмыкIхэри.
Къоджэдэсхэр зыгъэгумэкIырэ Iофыгъохэр зэIукIэм къыщаIэтыгъэх, псэупIэм хэхъоныгъэ егъэшIыгъэнымкIэ зигъо пшъэрылъхэм ыкIи ахэр зэрэзэшIуахыщт шIыкIэхэм щатегущыIагъэх. КъаIэтыгъэ Iофыгъо­хэм ахэхьэх урамхэм ягъэнэ­фэн, гъогухэмрэ щагухэмрэ ягъэцэкIэжьын, общественнэ чIыпIэм изэтегъэпсыхьан, Мые­къуапэ зэрэкIощтхэ транспортыр тегъэуцогъэныр. Унэхэр жъу­гъэу зэрагъэпсырэм, микрорайоныкIэхэр ащ зэрэщызэ­хащэхэрэм япхыгъэу инфраст­руктурэм зегъэушъомбгъугъэн зэрэфаер къоджэдэсхэм къа­Iуагъ. Джащ фэдэу къызэхэонкIэ щынагъоу щыт чъыгхэмрэ куан­дэхэмрэ иупкIыжьыгъэнхэм, лъэс гъогухэм ягъэпсын, гъогу тамыгъэхэм ягъэуцун япхыгъэ Iофыгъохэри къаIэтыгъэх.
КъумпIыл Мурат цIыфхэр къыгъэгугъагъэх социальнэ Iофыгъоу къаIэтыгъэхэр зэкIэ Адыгеим ихэбзэ къулыкъухэм рахъухьэрэ IофшIэнхэм зэрахагъэхьащтхэмкIэ, ахэр зэрэзэшIуахыщтхэмкIэ. Iофыгъо пэпчъкIэ пшъэрылъ гъэнэфагъэхэр афашIыгъэх, ахэм ащыщхэр зэ­шIуахыгъэх. ГущыIэм пае, зэ­Iухыгъэ зэдэгущыIэгъум ыуж общественнэ транспортыр псэу­пIэм щызекIоу ригъэжьагъ. Мые­къуапэ къикIызэ, Шаумяным нэсырэ транспортыр джы ренэу псэупIэу Удобнэм дахьэзэ ышIыщт.
Къоджэдэсхэр зыгъэгумэкIырэ Iофыгъохэм ащыщ япсэупIэ иурам гупчэ икъэгъэ­нэфын. Мы охътэ благъэм ар зэшIохыгъэн фае. Джыдэдэм километрэ 1,4-рэ зикIыхьэгъэ электрорыкIуапIэм игъэпсынкIэ проект документациер агъэхьазыры.
Культурэм и Унэ къыпэIулъ пчэгум изэтегъэпсыхьанкIэ пшъэрылъ шъхьафхэр афашIыгъэх. Фэтэрыбэу зэхэт унэхэу псэупIэм дэтхэм ящагухэр къы­зызэпеплъыхьэ нэужи ищыкIэгъэ пшъэрылъхэр республикэм ипащэ афишIыгъэх. АР-м псэо­лъэшIынымкIэ и Министерствэ къызэритыгъэмкIэ, 2026-рэ илъэ­сым иапэрэ кIэлъэныкъо шапхъэу щыIэхэм адиштэу зигугъу къашIыгъэ щагур зэтырагъэпсыхьащт.
КъумпIыл Мурат фельдшер-­мамыку IэзапIэм изытет зызэ­регъэлъэгъу нэуж, ащ гъэцэ­кIэжьын IофшIэнхэр рашIылIэнхэу, псауныгъэр къэухъумэгъэнымкIэ пэублэ звенэр уахътэм диштэу зэтегъэпсыхьэгъэнымкIэ АР-м ипрограммэ диштэу фельдшер-мамыку IэзэпIакIэм игъэ­псын пае ищыкIэгъэ документациер агъэхьазырынэу пшъэрылъ афишIыгъ. Джащ фэдэу псэолъэшIынымкIэ шапхъэхэр къызэрэдалъытэрэм гъунэ лъафынэу, лъэс гъогухэмрэ кIэлэ­цIыкIу джэгупIэмрэ агъэцэкIэжьынхэу, псэупIэм иукъэбзынкIэ Iофтхьэбзэ заулэ зэрахьанэу афигъэпытагъ.
«ПсэупIэу Удобнэм IофшIэнхэр зэрэщыкIохэрэм ренэу гъунэ лъысфыщт. Ар зэтедгъэпсыхьэу едгъэжьагъэшъ, лъэныкъо пстэури къыдэтлъытэзэ Iофхэр зэхэтщэщтых. ПсэупIэ цIыкIухэри дэ­гъоу зэтегъэпсыхьэгъэнхэм, уащыпсэункIэ гуIэтыпIэу щытынхэм мэхьанэшхо ятэты. ПсэупIэхэу Чернышевыр, Кужорскэр, Родниковэр, нэмыкIхэр зэтедгъэ­псыхьэхэ зэхъум джащ фэдэ шапхъэ-
хэм тарыгъо­зэгъагъ. Джыдэдэм Iофхэм язытет ахэм ащызэхъокIыгъ. Пшъэры­лъэу щытхэр тэгъэцэкIэфэ тынаIэ зытедгъэтыхэрэмкIэ анахь шъхьаIэу псэупIэу Удобнэр щытыщт», — къыIуагъ АР-м и ЛIышъхьэ.
КъумпIыл Мурат джащ фэдэу мы псэупIэм изэтегъэпсыхьанкIэ Iофэу зэшIуахыгъэхэм уасэ къафишIыгъ. ГущыIэм пае, псэупIэм игаз-, иэлектрорыкIуапIэхэм зыпкъ итэу Iоф ашIэ. Псыры­кIуапIэхэр уахътэм диштэу зэ­тырагъэ­псыхьажьыгъэх, канализациехэр агъэ­кIэжьыгъэх. Лъэпкъ проектым диштэу псэупIэр къэзыухьэрэ гъогоу социальнэ псэуалъэхэм якIуалIэрэр агъэцэкIэ­жьыгъ. КIэлэцIыкIу ибэхэм апае унэхэр ашIыгъэх. Къуаджэхэм зэдиштэу хэхъоныгъэ зэрарагъэшIырэ программэм диштэу культурэм и Унэ агъэцэкIэжьыгъ, кIэлэ­цIыкIу джэгукIэхэр агъэпсыгъэх.
ЦIыфхэм яшIоигъоныгъэхэр къыда­лъытэзэ, псэупIэм изэтегъэпсыхьанкIэ пшъэрылъ гъэнэфагъэхэр Адыгеим и ЛIышъхьэ афишIыгъэх, федеральнэ, республикэ программэхэм къадалъытэрэ амалхэр къызфагъэфедэзэ, тхылъ пэпчъ икъоу хэплъэнхэу афигъэпытагъ. Къо­джэдэсхэр гъэпсын Iофхэм чанэу къахагъэлэжьэнхэ зэрэфаер республикэм ипащэ къыIуагъ.
«ЦIыфхэм ящыIакIэ республикэм ипсэупIэ пэпчъ зыкъыщегъэIэтыгъэным тэркIэ мэхьанэшхо иI. Ау ежь къоджэ­дэсхэри псэупIэхэм язэтегъэпсыхьан къыхагъэлэжьэнхэ, шIыхьафхэр зэхащэн, хэушъхьафыкIыгъэ дзэ операцием щы­Iэхэм IэпыIэгъу ягъэгъотыгъэнымкIэ, патриотическэ Iофтхьабзэхэм язэхэщэнкIэ чаныгъэ нахь къызхагъэфэн, зэкIэри тызэгъусэу къоджэ, республикэ гупсэм тафэгумэкIын фае», — къыIуагъ КъумпIыл Мурат.