Мыекъопэ районым а зы уахътэм врач амбулатории 4 къыщызэ­Iуа­хыгъ: псэупIэхэу Абадзехскэм, Северо-­Восточные Сады, Краснооктябрьскэм ыкIи Победэм.

Хэбзэ къулыкъухэм ялIыкIохэр а Iофтхьабзэм хэлэ­жьагъэх. Адыгэ Республикэм и ЛIышъхьэу КъумпIыл Мурат псэупIэу Победэм къы­щызэIуахыгъэ IэзапIэм изытет зэригъэлъэгъугъ.
ЛIышъхьэм игъусагъэх АР-м псауныгъэм икъэухъу­мэнкIэ иминистрэу Мэрэ­тыкъо Рустем, муниципальнэ образованиеу «Мыекъопэ районым» ипащэу Михаил Марьиныр, АР-м икъэралы-
гъо бюджет учреждениеу «Стройзаказчикым» ипащэу Хьаджымэ Аслъан.
2024-рэ илъэсым Победэм а IэзапIэм ишIын щыфежьэгъагъэх къоджэдэсхэм ме­дицинэ фэIо-фашIэхэр нахь псынкIэу афызэшIохыгъэнхэм пае. Сомэ миллион 36-рэ ащ пэIуагъэхьагъ, медицинэ Iэмэ-­псымэхэмрэ мебелымрэ — сомэ миллиони 5.

Республикэм и ЛIышъхьэ медицинэ учреждениер къыплъыхьагъ. Квадрат метрэ 420-рэ зыубытырэ псэуалъэм кIэлэцIыкIухэр, зыныбжь хэ­кIотагъэхэр зыщырагъэблэ­гъэщтхэ, мэфэ стационарыр, процедурэхэр ыкIи прививкэхэр зыщашIыщтхэр, нэ­мыкI кабинетхэри хэтых. КIэлэцIыкIухэр педиатрэм ригъэблэгъэщтых, нахьыжъхэр — терапевтымрэ цэхэм яIазэ­хэ­рэм­рэ. Нэбгырэ 50-мэ яфэIо-фашIэхэр зы мафэм мыщ щафагъэцэкIэнхэ алъэкIыщт.
АР-м и ЛIышъхьэ медицинэ IофышIэхэмрэ псэупIэм дэс­хэмрэ гущыIэгъу зафэхъум медицинэ IэпыIэгъур нахь Iэрыфэгъуным иIофыгъохэм атегущыIагъэх. АР-м и ЛIы­шъхьэ республикэм фэхъурэ зэхъокIыныгъэ инхэм апае зэрэфэразэхэр къекIолIагъэ­хэм къыхагъэщыгъ, къоджэ­дэсхэм ящыIакIэ нахьышIу зэрэхъугъэри къаIуагъ. Адыге­им и ЛIышъхьэ социальнэ инфраструктурэр нахьышIу шIыгъэнымкIэ тапэкIи Iофэу ашIэщтым фэгъэхьыгъэу къафиIотагъ. Анахьэу ащ ынаIэ зытыридзагъэр псауныгъэм икъэухъу­мэнкIэ технологиехэр гъэфедэгъэнхэр, цIыфхэм ядиспансеризацие тэрэзэу зэхэщэгъэныр, игъом узыр къыхэгъэщыгъэнымкIэ а пстэуми мэхьанэ зэряIэр ары. Узыр къямыутэлIэным фэгъэхьыгъэ Iофтхьабзэхэм къадыхэлъытагъэу врач купхэр дэкIынхэм ыкIи цIыфхэм япсауныгъэ изытет агъэунэфыным ателъытэгъэ IофшIэныр зэшIуахыщт.

Адыгеим и ЛIышъхьэ псауныгъэм икъэухъумэнкIэ Министерствэм пшъэ­рылъ фишIыгъ районхэм медицинэ IофышIэхэр нахьыбэу арыхьанхэмкIэ IофшIэныр ыгъэлъэшынэу, ащкIэ программэхэу «Къоджэ докторыр» ыкIи «Къоджэ фельдшерыр» зыфиIохэрэр къызфагъэфедэнхэу. А программэхэр агъэцакIэхэу зыщырагъэжьэгъэ уахътэм къыщыублагъэу врач 210-рэ, гу­рыт медицинэ IофышIэ 77-рэ къоджэ медицинэ учреждениехэм афагъэ­кIуагъ, мы илъэ­сым — врач 32-рэ ыкIи гурыт звенэм къыхиубытэрэ медицинэ IофышIи 7-рэ.
Ахэм Iоф ашIэным пае ящыкIэгъэ амалхэр арагъэгъотых. Лъэпкъ проектэу «ГъэшIэ кIыхьэр ыкIи чаныр» зыфиIорэм ишъолъыр проектэу «Псауныгъэм икъэу­хъумэнкIэ пэублэ звенэр гъэкIэжьы­гъэным» тегъэпсыхьагъэу мы илъэсым врач амбулатории 7 агъэпсыгъ: Красногвардейскэ районымкIэ псэупIэу Са­до­вэм, Мыекъопэ районымкIэ псэупIэхэу Абадзехскэм, Краснооктябрьскэм, Победэм, къутырэу Северо-Восточные Сады ахэр къадэтэджагъэх. Мы охътэ благъэхэм IэзэпIакIэхэр къащызэIуахыщтых Тэхъутэмыкъое районымкIэ къуа­джэхэу Афыпсыпэрэ Щынджыерэ.
Адыгеим и ЛIышъхьэ къызэрэхигъэщыгъэмкIэ, псауныгъэм икъэухъумэнкIэ пэублэ звенэм игъэкIэжьын, медицинэ псэуалъэхэм яшIын ыкIи ягъэцэ­кIэжьын лъэкIуатэ. Шъугу къэтэгъэкIы­жьы: къэралыгъо программэхэмрэ ­лъэпкъ проектхэмрэ яшIуагъэкIэ мы аужырэ илъэси 8-м сымэджэщи 4, поликлиники 5, фельдшер-мамыку пункт 33-рэ ыкIи врач амбулатории 3 Адыгеим къыщызэIуахыгъэх.
АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.