Адыгеим и ЛIышъхьэу КъумпIыл Мурат Iоф­шIэгъу зэIукIэгъу адыриIагъ ВТБ-м икраснодар къутамэ и Шъолъыр операционнэ офис ивице-президентэу Сергей Кадакинымрэ ВТБ-м икъутамэ имыекъопэ операционнэ офис ­ипащэу Былымыхьэ Руслъанрэ.

ЗэдэгущыIэгъум хэлэжьагъэх АР-м иминистрэхэм я Кабинет и Тхьаматэ ипшъэрылъхэр зыгъэцэкIэрэ ЛIыхэсэ Махьмудэрэ АР-м экономикэ хэхъоныгъэмкIэ ыкIи сатыумкIэ иминистрэ иапэрэ гуадзэу Александр Павловскэмрэ.
Сергей Кадакиным респуб­ликэм и ЛIышъхьэ къыфиIотагъ илъэсэу икIырэм банкым Адыгеим Iофэу щызэшIуихырэм икIэуххэр.
«ШъуишIуагъэу къытэкIырэм къыхэкIэу 2025-рэ илъэсым офисыкIэ Мыекъуапэ къыщызэ­Iутхыгъ, цIыфэу ащ къеуалIэхэ­рэри нахьыбэ хъугъэ. Сомэ миллиард 13,5-м шIокIыгъ чIы­фэу яттыгъэр. Сэ зэрэслъытэ­рэмкIэ, республикэм иэкономи­кэ инвестициеу къыхахьэрэр нахьыбэ зэрэхъурэм ар елъытыгъ. ТиIоф­шIэн зетэгъэушъомбгъу, социальнэ проектхэм та­хэ­лажьэ. Мы илъэсым псэупIэу Яблоновскэм пшъэрылъыбэ зэ­шIозыхыщт офи­сышхо къыщызэIутхын мурад тиI», — къы­Iуагъ ВТБ-м ишъо­лъыр организациеу «Краснодарский» зыфиIорэм ивице-­президент.
Республикэм ихэхъоныгъэ къызэрэхэлажьэхэрэм, цIыфхэр зычIэсыщтхэ унэхэм япроектхэу шъолъырымкIэ мэхьанэ зиIэхэм, логистикэм ыкIи нэмыкI лъэ­ныкъохэм ахъщэ къазэраIэкIагъахьэрэм апае зэрафэразэр КъумпIыл Мурат къыIуагъ.
«Банкхэм азыфагу зэнэкъо­къуныгъэ зэрилъыр игъоу тэ­лъэгъу. ЦIыфхэмрэ бизнесымрэ яфинанс фэIо-фашIэхэм язытет шапхъэхэм адиштэнымкIэ ащ ишIуагъэ къэкIо. Республикэм иэкономикэ ихэхъоныгъэкIи ар федэу щыт. Пэрыт банкхэм производствэм игъэкIэжьынкIэ, социальнэ проектхэм язэшIо­хынкIэ типредприятиехэм ахъщэ IэпыIэгъу арагъэгъоты. Ащ фэдэ зэдэлэжьэныгъэм ифэшъошэ уасэ фэтэшIы ыкIи тапэкIи ащ зедгъэушъомбгъуным ыуж титыщт», — къыIуагъ Адыгеим и ЛIышъхьэ.
ЗэIукIэгъум илъэхъан лъэныкъо зэфэшъхьафхэмкIэ язэдэлэжьэныгъэ зэрэгъэпсыгъэщтым бгъуитIуми ялIыкIохэр тегущы­Iагъэх. ГущыIэм пае, республи­кэм иучреждениехэу гъэсэныгъэ зыщарагъэгъотыхэрэм цифрэ лъэныкъомкIэ ишIуагъэ аригъэ­кIыным, цIыфхэр зычIэсыщтхэ унэхэм, экономикэм епхыгъэ проект зэфэшъхьафхэм язэшIохын къыхэлэжьэным чIыфэт учреждениер афэхьазыр.
ЗэдэгущыIэгъум икIэуххэмкIэ республикэм и ЛIышъхьэ пшъэ­рылъ афишIыгъ АР-м иминист­рэхэм я Кабинет и Тхьаматэ ипшъэрылъхэр зыгъэцакIэрэмрэ министерствэ зэфэшъхьафхэм япащэхэмрэ зэдэлэжьэныгъэм илъэныкъохэу агъэнэфагъэхэм игъэкIотыгъэу Iоф адашIэнэу.