Илъэс къэс Адыгеим и ЛIы­шъхьэу КъумпIыл Мурат зэхищэрэ зэIухыгъэ зэдэгущыIэгъум тишъолъыр щыпсэухэрэр зы­гъэгумэкIыхэу къыщаIэтыхэ­рэм ащыщых общественнэ чIы­пIэхэм язэтегъэпсыхьан, яIыгъын. Мыгъэ къыхагъэщы­гъэхэм ащыщ щэрэхъхэм ателъ хьашъохэм ягъэкIодыжьын иIо­фыгъо.

Мыекъуапэ ихэкIитэкъупIэхэм ахэр мымакIэу атеплъэгъощтых, амыгъэунэфыгъэ чIыпIэхэми хэкIэу ащыратэкъу­хэрэми ахэлъых. Джырэ уахътэм ахэм яугъоин Мыекъуапэ жъугъэу щыфежьагъэх: я 3-рэ гъогу-псэолъэшI гъэIорышIапIэм иIофышIэхэмрэ итехникэрэ ащ хэлажьэх.
Республикэм икъэлэ шъхьаIэ ипащэ къызэрэхигъэщыгъэмкIэ, мы IофшIэныр тапэкIи лъагъэкIотэщт.
— Къалэм иурамхэм яукъэбзын лъы­тэгъэкIуатэ. Анахьэу тызгъэгумэкIыхэрэм ащыщ хэкIитэкъупIэхэм щэрэ­хъхэм къатырахыжьыгъэ хьашъохэр бэу ателъы зэрэхъугъэр. Мы лъэныкъомкIэ гумэ­кIыгъоу щыIэхэр тикъэлэдэсхэм къыраIотыкIых, зэIухыгъэ зэдэ­гущыIэгъоу ЛIышъхьэу КъумпIыл Мурат ригъэкIокIыгъэми къыщаIэтыгъэх, — къыIуагъ Геннадий Митрофановым.

Коммунальнэ пыдзэфэ пытэхэм зигугъу тшIырэ хьашъохэр аха­хьэ­хэрэп ыкIи хэ­кIэу шъолъыр опе­раторым дищырэм халъхьа­нэу щытэп. Джащ ыпкъ къикIэу машинэ щэрэхъхэр зэблэзыхъухэрэ гъэцэкIэжьыпIэ­хэми, гъэIоры­шIэкIо компа­ниехэми зэзэ­гъы­ныгъэ адашIынышъ, ахэм ягъэкIоды-
жьын пылъ организациехэм аратыхэзэ ашIын фае.
Непэрэ мафэм ехъулIэу къэбзэныгъэм лъыплъэрэ къулыкъухэм яIофы­шIэхэм Мыекъуапэ ихэкIитэкъупIэхэр ауплъэкIугъэх, джащ фэдэу зыщафамыгъэнэфэгъэ чIыпIэхэу пыдзэфэ щына­гъохэр зыдэщылъхэри къыхагъэщыгъэх.
Хьашъохэр зызэкIаугъоехэрэ ужым ахэм ягъэкIодыжьын иIофыгъо зэшIуа­хыщт. Илъэсыр къызихьагъэм къыщыублагъэу ащ фэдэ пыдзэфэ тонни 150-рэ фэдиз дащыгъ.
Александра Балабась.