Адыгеим и ЛIышъхьэ и Координационнэ гупчэ щыкIогъэ зэфэхьысыжь зэхэсыгъор зыфэгъэхьыгъагъэр 2025-рэ илъэсым ныбжьыкIэ политикэр шъолъырым пхырыщыгъэ зэрэщыхъугъэр ары. А Iофтхьабзэм хэлэжьагъ респуб­ликэм ипащэу КъумпIыл Мурат.

КIэуххэм язэфэхьысыжьын фэгъэхьыгъэ зэхэсыгъом щыIагъэх АР-м и Къэралыгъо Совет — Хасэм и Тхьаматэ игуадзэу Цэй Эдуард, министрэхэм я Кабинет и Тхьаматэ игуадзэу, фи­нансхэмкIэ министрэу Виктор Орловыр, АР-м и ЛIышъхьэрэ иминистрэхэм я Кабинетрэ я Администрацие ипащэу Владимир Свеженец, Адыгеим иофициальнэ лIыкIоу УФ-м и Президент дэжь щыIэ Мыгу Бислъан, программэу «Уахътэм и ЛIыхъужъхэр» зыфиIорэм хэлажьэу Сергей Ковалевыр, Адыгеим иминистрэхэм я Кабинет хэтхэр, Къэралыгъо Советым — Хасэм идепутатхэр, муниципалитетхэм япащэхэр, ныбжьыкIэ IофхэмкIэ район ыкIи къэлэ отделхэм яIэшъхьэтетхэр, апшъэрэ ыкIи гурыт гъэсэныгъэ зыщарагъэгъотырэ организациехэм ялIыкIохэр, гупчэу «Адыгеим иныбжьыкIэхэр» зыфиIорэм, ныбжьыкIэхэм я Урысые Союз ишъолъыр организацие, Апэрэхэм я Движение ишъо­лъыр къутамэ ахэтхэр, волонтерхэр, юн­армейцэхэр.
Iофтхьабзэр зырагъажьэм зэIукIэгъум хэлажьэхэрэм къафагъэлъэгъогъэ роли­кыр зыфэгъэхьыгъагъэр республикэм ныбжьыкIэ политикэр щыпхырыщыгъэнымкIэ лъэныкъо шъхьаIэхэу къыдалъы­тэхэрэмрэ гъэхъагъэхэу ашIыхэрэмрэ ары.

Адыгеим и ЛIышъхьэ къэзэрэугъоигъэхэм закъыфигъазэзэ къызэрэхигъэщыгъэмкIэ, республикэм иныбжьыкIэхэр Адыгеим ищыIэныгъэ гъэхъагъэ хэлъэу хэлажьэх: хэбзэ къулыкъухэм къыра­хьы­жьэрэ, гъэсэныгъэ ыкIи патриот Iофтхьабзэхэм яIахь ахашIыхьэ, ежьхэм япроектхэри пхыращых.
«Анахьэу хэзгъэунэфыкIынэу сызыфаер Хэгъэгум иухъумакIо и Илъэсрэ ТекIоныгъэм ия 80-рэ илъэс ихэгъэу­нэфыкIынрэ япхыгъэу ныбжьыкIэхэм Iофышхо зэрэзэшIуахырэр, хэушъхьа­фы­кIыгъэ дзэ операцием хэлажьэхэрэм ыкIи ахэм яунагъохэм, ветеранхэм IэпыIэгъу зэраратырэр ары. Ащ фэдэ гуетыныгъэ ин зыхэлъ IофшIэныр тэркIэ кIэгъэкъонышхоу мэхъу», — къыIуагъ КъумпIыл Мурат.
НыбжьыкIэхэр общественнэ Iофхэм зэрахэщагъэхэм къытегущыIэзэ респуб­ликэм и ЛIышъхьэ къыхигъэщыгъ ныбжьыкIэ движениехэм ахэтхэм япчъагъэ хэпшIыкIэу нахьыбэ зэрэхъурэр. Адыге­им иволонтер организациехэм нэбгырэ мин 56-м ехъу ахэт, анахьыбэр ныбжьыкIэх. Ащ нэмыкIэу ныбжьыкIэ ор­ганизациехэм яактив нэбгырэ мини 5,1-рэ мэхъу.
КъыткIэхъухьэрэ лIэужхэм яхэгъэгу фэшъыпкъэхэу пIугъэнхэмкIэ, щыIэкIэ-псэукIэ тэрэзым рыгъозэнхэмкIэ, зэщы­хъокIо кIуачIэхэм ахэр ащыу­хъумэгъэнхэмкIэ Iофэу агъэцакIэрэм мэхьанэшхо зэриIэр КъумпIыл Мурат къыхигъэщыгъ. НыбжьыкIэ политикэм гомыIу нэшанэхэр къыхэмыфэнхэмкIэ, спортым, нэмыкI лъэныкъохэм нахь чанэу ахэр ахэлэжьэнхэмкIэ зэкIэми зэдегъэштэныгъэ ахэлъэу Iоф­тхьэбзэ гъэнэфагъэхэр зэшIуа­хын фае.
НыбжьыкIэхэм Iэрыфэгъу инфраструктурэ яIэным хэбзэ къулыкъухэм анаIэ зэрэтыра­гъэтырэр ащ къыхигъэщыгъ. Къалэу Мыекъуапэ щызэтырагъэпсыхьажьыгъэ псэуалъэм «Адыгеим иныбжьыкIэхэр» зы­фиIорэ гупчэм Iоф щешIэ. Шэу­джэн ыкIи Теуцожь районхэм ащ фэдэ ныбжьыкIэ гупчэхэр 2026-рэ илъэсым ащызэхащэнхэу рахъухьагъ, 2030-рэ илъэсым нэс республикэм икъэлэ ыкIи ирайон пстэуми ащ фэдэхэр къадэтэджэщтых.
Республикэм и ЛIышъхьэ къызэриIуагъэмкIэ, ныбжьыкIэ политикэм нахь зиушъомбгъунымкIэ, хэхъоныгъэ ышIынымкIэ мылъкоу къыфатIупщырэми хэпшIыкIэу хэхъо. Мы илъэсым сомэ миллиони 170-рэ а гухэлъ­хэм апае бюджетым къыхагъэ­кIыгъ, илъэсэу къихьащтым сомэ миллиони 190-рэ фэдиз агъэфедэщт.
Лъэпкъ проектыкIэхэу «НыбжьыкIэхэмрэ кIэлэцIыкIухэмрэ», «IофышIэхэр» зыфиIохэрэр пхы­рыщыгъэнхэм шъолъыр ныбжьыкIэ политикэм епхыгъэ Iофтхьабзэу кIэщакIо зыфэхъухэрэр адиштэнхэ фае. Муниципальнэ ныбжьыкIэ гупчэхэр, чIыпIэ гъэнэфагъэхэр зэхэщэгъэнхэм, пIуныгъэ IофшIэным чанэу ахэр къыхэгъэлэжьэгъэнхэм мэхьа­нэшхо яI. Тыкъэзыуцухьэрэ ду­наим икъэухъумэн, чъыгхэр, куандэхэр гъэтIысхьэгъэнхэм, къэбзэныгъэм имазэхэр псэупIэ пстэуми ащызэхэщэгъэнхэм мэ­хьанэшхо зэряIэм къыпкъырыкIынхэ фае.
«Тэ зэкIэми гухэлъэу тиIэр зы: ныбжьыкIэхэр нахьыбэу об­щественнэ щыIакIэм хэщэ­гъэнхэр, ахэм акIуачIэ, амалэу яIэхэр республикэм ихэхъоныгъэ фэгъэIорышIэгъэнхэр ары», — къыIуагъ КъумпIыл Мурат.
НыбжьыкIэхэм адыриIэрэ зэIукIэгъухэм анахьэу зигугъу щашIыхэрэр тыкъэзыуцухьэрэ дунаим икъэухъумэнкIэ Iофтхьабзэхэр зехьэгъэнхэр, муниципалитетхэм чъыгхэмрэ къэгъагъэхэмрэ нахьыбэу ащыгъэ­тIысхьэгъэнхэр ары. Адыгеим и ЛIышъхьэ игъо къафилъэгъугъ мы илъэсым республикэм чъыг мини 10 щагъэтIысхьанэу: на­хьы­бэмкIэ остыгъэе чъыг лъэпкъ­хэмрэ тхьапэхэр зыпытхэмрэ. Республикэм ипащэ къызэриIуагъэмкIэ, а Iофтхьа­бзэр ренэу анаIэ зытырагъэтын фаехэм ащыщ. Адыгеим ичIыопс бай къэухъумэгъэным, паркхэр, скверхэр нахьыбэ шIыгъэнхэм зэкIэ цIыфхэр къыхэгъэлэжьэгъэнхэм мэхьанэшхо зэриIэр КъумпIыл Мурат къыкIигъэт­хъыгъ, ныбжьыкIэхэри тыкъэзыуцухьэрэ дунаим икъэухъу­мэнкIэ проектхэм чанэу ахэлэ­жьэнхэ фае.
2025-рэ илъэсым ныбжьыкIэ политикэр пхырыщыгъэ зэрэ­хъугъэм изэфэхьысыжьхэм ыкIи 2026-рэ илъэсымкIэ гухэлъхэу ашIыгъэхэм афэгъэхьыгъэу къэ­гущыIагъ АР-м ныбжьыкIэ Iоф­хэмкIэ и Комитет итхьаматэу Максим Галушкиныр.
Ащ къызэриIуагъэмкIэ, илъэс 14-м къыщегъэжьагъэу 35-м нэс зыныбжь нэбгырэ мини 135-м ехъу республикэм щэпсэу. 2024-рэ илъэсым ныбжьыкIэ политикэр пхырыщыгъэ зэрэхъугъэм­кIэ мониторингэу щыIагъэм изэ­фэхьысыжьхэм нафэ къызэрашIыгъэмкIэ, Урысые Федерацием ишъолъырхэм азыфагу щиIыгъыгъэ я 26-рэ чIыпIэм къикIи я 12-м Адыгеир нэсыгъ. Проектхэу «Тызэгъус» ыкIи «Уры­сыер — амалхэм яхэгъэгу» зыфиIохэрэм республикэр ахэлажьэ. Ахэр лъэпкъ проектэу «НыбжьыкIэхэмрэ кIэлэцIыкIу­хэмрэ» зыфиIорэм изы Iахьых.
Илъэсэу икIыгъэм ныбжьыкIэ мин 70-м ехъу зыхэлэжьэгъэ Iофтхьэбзэ миным ехъу зэхащэгъагъ. ХэушъхьафыкIыгъэ дзэ операцием иветеранхэм я Ассоциацие гъусэныгъэ пытэ ды­ряI, Урысые проектэу «Диалоги с Героями», джащ фэдэу про­ектэу «ТекIоныгъэр къыдэзы­хыгъэхэм къакIэхъухьагъэхэр» зы­фиIохэрэр щыIэныгъэм гъэцэкIагъэ щэхъух, фэхыгъэхэм ямыжъосынхэр зыдэщыт чIыпIэхэр агъэкъабзэх. Террориз­мэр, экстремизмэр, наркоманиер, социальнэ зэмызэгъын, зэщыхъон нэшанэхэр къахэмыфэнхэм пае ныбжьыкIэхэм Iофтхьэбзи 100-м ехъу адызэхащагъ.
Гъэсэныгъэм, спортым, зекIоным, культурэм, волонтер ыкIи гъэсэныгъэм япхыгъэ Iофтхьабзэхэу комитетымрэ ныбжьыкIэ гупчэмрэ хэбзэ къулыкъухэм ягъусэхэу зэдызэхащэхэрэм хэу­шъхьафыкIыгъэу ягугъу къа­шIыгъ.
Зэхэсыгъом илъэхъан Iофэу ашIагъэм фэгъэхьыгъэ псалъэ­хэр къашIыгъэх ныбжьыкIэхэм я Урысые Союз и Адыгэ шъо­лъыр организацие итхьаматэу Хьабый Айтэч, Апэрэхэм я Движение ишъолъыр къутамэ итхьаматэу Ованес Шекерьянц.
Iофтхьабзэм икIэухым шIу­хьафтынхэр афагъэшъошагъэх. Хэгъэгу зэошхом ТекIоныгъэр къызщыдахыгъэм ия 79-рэ ­илъэс фэгъэхьыгъэ Iофтхьабзэхэм язэ­хэщэн чанэу зэрэхэлэжьагъэм пае Урысыем и Президент и Рэзэныгъэ тхылъ фагъэшъошагъ Снежана Беляковам — «Волонтеры Победы» зыфиIорэм ишъолъыр къутамэ чанэу хэла­жьэрэм. Сэнаущыгъэ зыхэлъ ныбжьыкIэхэм я Слетэу «Фыщт» зыфиIорэм изэхэщэн IэпэIэсэныгъэ ин хэлъэу зэрэхэлэжьагъэм пае Адыгеим и ЛIышъхьэ и Рэзэныгъэ тхылъ фагъэшъошагъ Красногвардейскэ районым иадминистрацие ныбжьыкIэ политикэмкIэ ыкIи спортымкIэ иотдел ипащэу Аббасэ Мурат. IофшIэным гъэхъагъэу щишIыгъэхэм апае АР-м и Къэралыгъо Совет — Хасэм ирэзэныгъэ тхылъ афагъэшъошагъ Урысые движениеу «Волонтеры-медики» зыфиIорэм ишъолъыр зэхэща­кIоу Оркъыжъэкъо Ис­лъам, Мые­къопэ къэлэ адми­нистрацием ныбжьыкIэ политикэмкIэ иотдел ипащэу Егор Сергеевым ыкIи гупчэу «Адыге­им иныбжьыкIэхэр» зыфиIорэм ипа­щэ игуадзэу Елизавета Мухамадиевам.
АР-м и ЛIышъхьэ ипресс-къулыкъу
къытырэ къэбархэмкIэ Тхьаркъохъо Сафыет.